Byambo Bikwabo bya mu Mutanchi wa Kupwila kwa Bwikalo ne Mwingilo
DECEMBER 7-13
BYA BUNEME BIJI MU MAMBO A LESA | BENA LEVI 10-11
“Twafwainwa Kutemwa Yehoba Kukila byo Twatemwa Kisemi Kyetu”
it-1 1174
Kubula Kuswishiwa
Mujilo Ungi ne bya Kufutumuna. Pa Bena Levi 10:1 kyambo kya Kihebelu kya zar (ne za·rahʹ kyo bengijisha ku banabakazhi kilumbulula kyenyi). Kino kyambo bekingijisha pa kwamba pa “mujilo ungi Lesa ye abujile kwibakambizha” waingijishe baana ba kwa Alona aye Nadaba ne Abihu pa kupana mulambo kwi Yehoba kabiji kino kyalengejile Yehoba kwibepaya na mujilo. (Le 10:2; Nu 3:4; 26:61) Kabiji Yehoba waambijile Alona amba: “Pa kutwela mu tente wa lusambakeno kechi wafwainwa kutoma binyu nangwa maalwa akwabo ne, obewa ne baana bobe bo uji nabo, kuchina’mba mwakafwa. Jino ke jilamuna ja myaka ku bisemi byenu byonse. Akino kyo kikapusanya kintu kyazhila ne kyabula kuzhila, kya muzhilo ne kyabula muzhilo, ne kufunjisha bena Isalela malamuna onse Yehoba o ebabuula kupichila mwi Moses.” (Le 10:8-11) Kyamweka Nadaba ne Abihu bapendelwe kabiji kyo kibalengejile kwingijisha mujilo ungi ye babujile kwibakambizha pa kupana mulambo. Kyamweka uno mujilo bamwingijishe pa kimye kyabula kufwainwa, mpunzha nangwa jishinda jo bapanyijilemo mulambo. Nangwa kampe bya kufutumuna byo bapaine kechi baingijishe byo baambapo pa Kulupuka 30:34, 35 pa kwibilenga ne. Kupendwa malwa kechi kwalengejile kwibalekelako mambo ne.
Nanchi Mwatwela Mwakukokolokela Lesa Nyi?
16 Kolojanji Mosesa, aye Alona wajinga na lukatazho lukatampe pa mambo a baana banji babiji. Akilangulukai pa byo eumvwine kimye baana banji, ba Nadaba ne Abihu byo baipaiwe kwi Lesa na mambo a kulambula mujilo kwi Yehoba ye abujile kwibakambizha. Kino kyalengejile kupwanañana kwafwainwe kwikalako pakachi ka bano banabalume ne bansemi babo kupwa. Kechi kupwanañanatu konka ne, kuji ne bintu bikwabo byavwangiwemo. Yehoba wakambizhe Alona ne baana banji bakishinka amba: ‘Kechi muleke nsuki yenu ivwatakane nangwa kutabaula bivwalo byenu [pa kujila] ne, kuchina’mba mwakafwa, ne kuletesha bukaji [bwa Yehoba] pa bantu bonse.’ (Levi 10:1-6) Kishinka kibena kwambiwapo ke kino. Butemwe bwetu pe Yehoba bwafwainwa kukosa kukila bwa pa balongo ba mu kisemi kyetu babula bukishinka.
Kukeba Bishinka Bikwabo Byanema
Twafwainwa Kwikala Bazhila mu Byubilo Byetu Byonse
18 Pa kuba’mba twikale bazhila, twafwainwa kupesapesa bulongo Binembelo ne kuba bintu bikeba Lesa. Akilangulukai pa kyamwekejile baana ba kwa Alona ba Nadaba ne Abihu bo baipaile na mambo a kupana “mujilo ungi.” Kyamweka baubile kino saka bapendwa. (Levi 10:1, 2) Pano akyumvwai Lesa byo aambijile Alona. (Tangai Bena Levi 10:8-11.) Nanchi byambo biji mu bino byepelo bimwesha kuba’mba kechi twafwainwa kutoma malwa pa kuya ku kupwila kwa bwina Kilishitu nenyi? Akilangulukai pa bino bishinka: Kechi tuji mu Mizhilo ya Mosesa ne. (Loma 10:4) Kabiji mu byalo bimo, bakwetu ba mu lwitabilo pa kajo ka kwisongezha saka bakyangye kuya na kupwila pekala ne tumalwa tucheche. Pa Kijilo kya Lupitailo pajinga ne tutomeno tuna twa binyu. Pa kutendeka Kivuluko, Yesu wapele batumwa banji binyu byaimenejilengako mashi anji kuba’mba batome. (Mat. 26:27) Baibolo wakanya kupendwapendwa ne bukitomi. (1 Ko. 6:10; 1 Timo. 3:8) Bena Kilishitu bavula jiwi ja muchima wabo jibalengela kubula kutoma malwa saka bakyangye kwingila mwingilo wazhila. Nangwa byonkabyo, bintu byapusana pusana kwesakana na byalo, bino kintu kyanema ku bena Kilishitu ke kuyuka “mo byapusena byazhila ne byabula kuzhijikwa” pa kuba’mba bekale na byubilo byazhila bitokesha Lesa ku muchima.
it-1 111 jifu. 5
Banyama
Bantu balondelanga Mizhilo ya Mosesa bebakambizhe kubula kuja banyama bamo, byonka byaamba Bena Levi 11:8 amba: “Bo ba muzhilo kwi anweba,” kulumbulula bena Isalela. Mizhilo ya Mosesa byo yalekele kwingila na mambo a lufu lwa kitapisho kya kwa Yesu, mizhilo yaambile pa kubula kuja banyama balekele kwiilondela, kabiji bantu bonse batendekele kuja banyama jikwabo byonkatu byo bamukambizhe Nowa panyuma ya Muyulo.—Kol 2:13-17; Nt 9:3, 4.
DECEMBER 14-20
BYA BUNEME BIJI MU MAMBO A LESA | BENA LEVI 12-13
“Byo Tufunjilako ku Mizhilo Yaambile pa Mbumba”
Nanchi Baibolo Waleka Kwingila Nyi, Inyi Wambatu Pa Bikamweka Kulutwe?
• Kulama bantu bakolwa kwa bunke.
Mizhilo Lesa yo apele Mosesa yaambile’mba bantu baji na mbumba bafwainwa kwikala kwa bunke. Byo kwamwekele bikola mu myaka kitota kya butanu na bubiji C.E., Badokotala popo batendekele kulondela ino mizhilo yaamba pa bantu bakolwa. Kabiji ne mu ano moba batwajijila kwiilondela.—Bena Levi kitango 13 ne 14.
Nanchi Mwayuka Nyi?
Bayudea bachinanga kikola kya mbumba kimye kyanembejilwengamo Baibolo. Kino kikola kyonauna mishipeshipe ne kulengela mubiji kuvimba. Kechi kwajingapo muchi wa kubuka kikola kya mbumba ne. Onkao mambo, bantu bakolwanga kino kikola baikalanga kwa bunke bwabo kabiji bebakambizhe kujimunako bakwabo pa kikola kyabo.—Bena Levi 13:45, 46.
it-2 238 jifu. 3
Mbumba
Ku bivwalo ne mu mazubo. Mbumba yakonsheshe ne kusombesha kivwalo kyo balenga na boya nangwa na kisapi kya linenyi nangwa kyo balenga na kiseba. Pa kuba’mba kikola kifumeko, bebichapanga kabiji kwajinga ne lunengezho lwa kubika kwa bunke kiseba kyasombela na kikola. Pano bino inge kivwalo kya kiseba kyatwajijila kusombela na bya manzhamatamba nangwa na byachiluluka, bekisokanga mu mujilo mambo byamweshanga’mba kino kikola kipayañana ko kikiji ku kino kivwalo. (Le 13:47-59) Umvwe bataana musombelo wa manzhamatamba nangwa panekuka pachiluluka mu nzubo pa lubumbulu, ñanga washinkangamo mu nzubo. Kabiji bafumyango mabwe aji na kikola ne kupalamo bulongo mu nzubo yonse mukachi, mabwe ne maloba o bapalamo beatayanga pangye ya muzhi ku mpunzha ya muzhilo. Umvwe kikola kyabwela jikwabo, nzubo yaikalanga ya muzhilo ne kwiikundula, kabiji bintu byonse bayanga na kwibitaya ku mpunzha ya muzhilo. Bino pa kuba’mba nzubo beitele’mba pano yatooka, kuji bintu bimo byo baubanga pa kuba’mba beitokeshe. (Le 14:33-57) Bantu bamo bamba’mba mbumba yasombelanga ku bivwalo nangwa yo bataananga mu mazubo yakwatangatu nobe kabuwa. Nangwa byonkabyo, bishinka kechi byayukanyikwa bulongo ne.
Kukeba Bishinka Bikwabo Byanema
w04 5/15 23 jifu. 2
Bishinka Bikatampe Kufuma mu Buku wa Bena Levi
12:2, 5—Mambo ka kusema mwana o kwalengelanga wamukazhi kwikala “ke wa muzhilo” nangwa’mba wa biko? Bibese bya lusemo byalengelwe kusemenamo baana balumbuluka. Pano bino, na mambo a byafumine mu bundengamambo bo baswana bantu, bumi bwa bumbulwakoloka ne bundengamambo bwasambukijile ne ku mwana. Kimye kicheche kya kwikala “wa muzhilo” nangwa’mba wa biko pa kupapa, pamo ne bintu bikwabo nabiji kuya ku ñondo, ne kwitayila bya bwanabulume byalengelanga bena Isalela kuyuka bundengamambo bo baswaine. (Bena Levi 15:16-24; Masalamo 51:5; Loma 5:12) Malamuna aambilenga pa bya kwitokesha akwashishenga bena Isalela kumvwisha buneme bwa kitapisho kya bukuzhi kya kufumyapo bundengamambo bwa bantu ne kubwezha bulumbuluke. Mu jino jishinda Mizhilo yaalukile ke ‘kalama wabo wa kwibaleta kuji Kilishitu.’—Ngalatiya 3:24.
Nanchi Baibolo Waleka Kwingila Nyi, Inyi Wambatu Pa Bikamweka Kulutwe?
• Kimye kya kuchiba kalomolomo.
Mizhilo ya Lesa yaambile’mba mwana wa mulume inge wasemwa bafwainwe kumuchiba kalomolomo pa kupitapo moba atanu na asatu. (Bena Levi 12:3) Inge mwana wasemwa, mashi atendeka kuchimba pa kupitapo mulungu umo. Mu bimye byanembejilwemo Baibolo, bapembelanga papita mulungu umo ne kukilapo pa kuba’mba bebachibe kalomolomo, kuba bino kwazhikijilanga baana ba balume mambo kechi kwajinga mashinda o babena kwingijisha mu bipatela lelo jino ne.
DECEMBER 21-27
BYA BUNEME BIJI MU MAMBO A LESA | BENA LEVI 14-15
“Yehoba Ukeba Kumupopwela Kwakubula Bubipisho”
it-1 263
Kowa
Kowa kyajinga kisho kya bena Isalela kabiji bebakambizhe kubanga bino na mambo a bintu byapusana pusana.Nabiji muntu uji na mbumba inge yapwa, muntu yense wakwachile bintu byaingijishenga muntu uji na “kikola kya kusuuma,” mwanamulume witayila malume, mwanamukazhi ubena kupita mashi nangwa waya ku mwenzhi nangwa muntu yense walaala na mwanamukazhi nangwa mwanamukazhi walaala na mwanamulume baikalanga ba “muzhilo” kabiji bafwainwe kowa. (Le 14:8, 9; 15:4-27) Muntu yense wajinga mu tente wakwachile kitumbi bamumonanga’mba “wa muzhilo” kabiji bafwainwe kumusansa mema a kumutokesha. Inge muntu wakaana kulondela uno muzhilo, “bafwainwa kumuchibako ku kipwilo, mambo wazhilulula nzubo yazhila ya Yehoba.” (Ba 19:20) Onkao mambo nanchi kowa bekwingijisha mu bukifwanyikizho kulumbulula kwikala babula bubipisho kwi Yehoba. (Sl 26:6; 73:13; Is 1:16; Ezi 16:9) Kowa na Mambo a Yehoba a bukine kwimenwako na mema kuji bingi na bulume bwa kwitutokesha.—Ef 5:26.
it-2 372 jifu. 2
Kuya ku mwenzhi
Mwanamukazhi bamumonanga’mba wa muzhilo mu kimye kyo abena kupita mashi moba avula o abula kuya ku mwenzhi nangwa “ubena kusuuma kupitaila moba o ayilamo ku mwenzhi,” kabiji pa kikye kimye walengelanga bivwalo po alaalanga nangwa kwikala ne muntu yense wakwatanga ku bino byonse kwikala wa muzhilo. Inge waleka kusuuma mashi, wafwainwe kubala moba atanu na abiji apa bino waikala wabula muzhilo. Pa juba ja butanu na busatu, mwanamukazhi waletanga tutela tubiji nangwa twana twa nkunda tubiji ku ñanga pa kuba’mba amufuchileko mambo anji, kamo wikapananga kwi Yehoba kwikala mulambo wa mambo, kakwabo wikapananga kwi Yehoba kwikala mulambo wa kusoka.—Le 15:19-30; monai KUTOOKA, KWITOOKESHA.
it-1 1133
Mpunzha Yazhila
2. Tente wa lusambakeno ye batendekele kutela’mba nzubo ya Lesa. Bintu byonse, kuvwangakotu ne kipango kya mu tente wa lusambakeno ne bipango bya mu nzubo ya Lesa, yajinga mpunzha yazhila bingi. (Lup 38:24; 2 Mo 29:5; By 21:28) Kya kusokelapo bitapisho ne shomeka wa mukuba byo bintu bikatampe byajinga mu kipango. Abino bintu byajinga byazhila. Kwesakana na mwayijile kisho, bantu babujile kwikala ba muzhilo bo bonkatu batwelanga mu kipango kya mu tente wa lusambakeno pa kimye kiji kyonse; bino inge baikala ba muzhilo, kechi bebaswishanga kutwela mu bipango bya mu nzubo ya Lesa ne. Nabiji mwanamukazhi wa muzhilo kechi bamuswishanga kukwata ku kintu kiji kyonse kyazhila nangwa kutwela mu mpunzha yazhila ne. (Le 15:31) Aba baletanga milambo ya kwibatookesha ku mbumba, batulanga bitapisho byabo kwalepa na kibelo kya kipango. (Le 14:11) Kafwako muntu wa muzhilo wajangako kitapisho kya mutende pa tente wa lusambakeno nangwa’mba nzubo ya Lesa ne. Inge wauba bino bamwipayanga. —Le 7:20, 21.
it-1 665 jifu. 5
Kutwi
Bañanga ba katataka byo bebatongwele mu Isalela, Mosesa bamukambizhe kushikulapo mashi amo a mukooko mulume ne kwiashinga ku kalebelebe ka ku kutwi kwa kwa Alona kwa kilujo ne ku matwi a baana banji bonse, ne ku kyala kya kilujo ne ku jina jikatampe ja kilujo, kumwesha kuba’mba bintu byo batelekelengako, mwingilo ye baingijilenga ne mu ñendelo yabo bafwainwe kulondela byonse byamwekelenga. (Le 8:22-24) Kabiji inge muntu uji na mbumba ubena kwitookesha, mizhilo yaambile’mba ñanga wafwainwa kushikulapo mashi amo a mukooko mulume ye bapana wa mulambo wa mambo ne manyi o bapana ne kwiashinga ku kalebelebe ka ku kutwi kwa kilujo kwa muntu ubena kwitokesha. (Le 14:14, 17, 25, 28) Kino kipasha bingi na byo baubanga ku muntu wakebanga kutwajijila kwikala muzha ku nkambo yanji myaka ne myaka. Inge kyaikala bino, uno muzha bamuletanga ku jishiki ja kibelo kabiji nkambo yanji wamusabanga kutwi na kyela kya kusabilako. Kano kayukilo ka ku kutwi kamweshanga patoka’mba kine uno muzha waswa kukookelanga nkambo yanji kikupu.—Lup 21:5, 6.
g 1/06 14, kakitenguluzha
Kabuwa Kakonsha Kukwashañana ne Kwipayañana!
NANCHI KWAJINGA KABUWA MU MOBA A KALA NYI?
Baibolo waamba pa ‘kikola kya mbumba kiji mu nzubo,’ kulumbulula mu kishimikwa. (Bena Levi 14:34-48) Bantu bamo bamba’mba kino kikola, kyo batela ne kuba’mba “mbumba isambukila,” yajinga mu mutundu wa kabuwa, pano bino bishinka kechi byayukanyikwa bulongo ne. Monse mo kyakonsha kwikela, Mizhilo ya Lesa yakambizhe bena mazubo kufumyamo mabwe ajinga na kikola, kupala mu nzubo monse mukachi ne kutaya bintu byonse byafwainwe kwikala na kikola pangye ya muzhi ku “mpunzha ya muzhilo.” Umvwe kikola kyabwela, nzubo yonse beimonanga‘mba ya muzhilo, kwiikundula ne kwibitaya. Ino mizhilo yonse yamweshanga Yehoba byo atemwa bantu banji ne byo akebesha kwibazhikijila.
DECEMBER 28–JANUARY 3
BYA BUNEME BIJI MU MAMBO A LESA | BENA LEVI 16-17
“Byo Tufunjilako ku Juba ja Kufuchilamo Mambo”
Byo Tufunjilako ku Buku wa Bena Levi
4 Tangai Bena Levi 16:12, 13. Fwanyikizhai kyamwekanga pa Juba ja Kufuchilamo Mambo: Ñanga Mukatampe watwela mu tente wa lusambakeno. Kino kyo kimye kitanshi kyo atwela pa bimye bisatu byo afwainwa kutwela Mwine Mwazhijisha pa jije juba. Mu kuboko kumo walama kipe muji bya kufutumuna binunka bulongo, kabiji mu kuboko kukwabo walama kya kwapwilamo mujilo kya ngolode mwayula makala a mujilo. Waimana kulutwe ya kipembe kyavweta pa kibelo kya Mwine Mwazhijisha. Watwela Mwine Mwazhijisha na mushingi ne kwimana kulutwe ya jikwachi ja lulayañano. Mu bukifwanyikizho waimana ku meso a Yehoba Lesa. Kepo ñanga aitulwila bya kufutumuna binunka bulongo pa makala a mujilo, kabiji mu kibamba kyonse mwakutakanatu bwema bwawama. Palutwe kacheche, watwela jibiji Mwazhijisha saka asenda mashi a mulambo wa bubi. Vulukai kuba’mba, patanshi waji kusoka bya kufutumuna binunka bulongo saka akyangye kupana mashi a mulambo wa bubi.
Byo Twakonsha Kufunjilako ku Buku wa Bena Levi
5 Twakonsha kufunjilako ka ku byo baingijishanga bya kufutumuna pa Juba ja Kufuchilamo Mambo? Baibolo umwesha kuba’mba milombelo ya bapopweshi ba Yehoba ba kishinka iji nobe bya kufutumuna binunka bulongo. (Sala. 141:2; Lum. 5:8) Vulukainga kuba’mba ñanga mukatampe wamweshanga mushingi mukatampe kimye kyo aletanga bya kufutumuna ku meso a Yehoba. Ne atweba pa kulomba kwi Yehoba, tulomba na mushingi mukatampe. Tuba bino mambo tumwakamwa. Tusanchila bingi Mulenga walengele bintu byonse pa kwituswisha kumusolomoka ne kufwenya kwipi ne aye byonkatu mwana byo asolomoka bashanji. (Yako. 4:8) Kabiji Lesa wituswisha kwikala balunda nanji. (Sala. 25:14) Tusanta bingi pa kino kintu kya kuba kechi tukeba kumufichisha ku muchima ne.
Byo Twakonsha Kufunjilako ku Buku wa Bena Levi
6 Vulukai kuba’mba ñanga mukatampe wasokanga bya kufutumuna saka akyangye kupana bitapisho. Kupichila mu kuba bino, watokeshanga Lesa ku muchima pa kuba’mba atambwile bitapisho. Twakonsha kufunjilako ka ku kino? Yesu byo ajinga pano pa ntanda, waubile kintu kyanema bingi kyakila pa kupulusha bantu saka akyangye kupana bumi bwanji kwikala kitapisho. Ñanyi kintu kyonkakyo? Watwajijile kwikala wa kishinka ne kukookela Yehoba mu byonse pa kuba’mba Yehoba atambwile kitapisho kya bumi bwanji. Kupichila mu kuba bino, Yesu wamwesheshe kuba’mba kuba kyaswa muchima wa Yehoba kyo kintu kyawama bingi kukila bintu byonse. Yesu wabingishe, nangwa’mba wamwesheshe’mba Shanji ye uji na luusa lwa kulama bilengwa byanji.
it-1 226 jifu. 3
Azazela
Byonkatu byalumbulwile mutumwa Paulo, Yesu byo apaine bumi bwanji bwalumbuluka kwikala kitapisho kya kufwila bantu bandengamambo, waubile kintu kikatampe kyakila “mashi a bañombe balume ne a bambuzhi.” (Heb 10:4, 11, 12) Kabiji byonka byajinga yewa “mbuzhi,” naye ‘wasendele bikola byetu,’ byo ‘bamwashile na mambo a mambo etu.’ (Is 53:4, 5; Mat 8:17; 1Pe 2:24) ‘Wasendele’ bundengamambo bwa bonse baitabila mu kitapisho kyanji. Wamwesheshe kintu kyaubile Lesa kya kufumyapo bundengamambo myaka ne myaka. Onkao mambo mbuzhi wa kwa Azazela wimenako kitapisho kya kwa Yesu Kilishitu.
Mambo ka o Twafwainwa Kwikela Bazhila?
10 Tangai Bena Levi 17:10. Yehoba wakambizhe bena Isalela kubula kuja “mashi nangwa a byepi.” Bena Kilishitu nabo bebakambizha kubula kuja mashi a bantu nangwa a banyama. (Byu. 15:28, 29) Kitukola bingi ku muchima inge twalanguluka pa kuba kintu kyakonsha kulengela Lesa ‘kwitunankama’ ne kwitupanga mu kipwilo. Twamutemwa bingi kabiji tukeba kumukokela, nangwa kya kuba bumi bwetu buji mu kizumba, nangwatu umvwe bantu babula kuyuka Yehoba kebakebe amba tubule kumukokela. Onkao mambo, twafwainwa kuketekela kwitwendeleka pa kukana mashi, bino tusalapo kukokela Lesa. (Yuda 17, 18) Ki ka kyakonsha kwitukwasha kubula kuja mashi nangwa kuswa kubikwa mashi?—Mpitu. 12:23.