Kwashai Bantu Kwikala na Lwitabilo mwi Yehoba ne Yesu Kupichila mu Kwingijisha Buku wa Kuba’mba Mukekala Myaka ne Myaka!

Bo tufunjisha Baibolo bafwainwa kwikala na lwitabilo lwakosa pa kuba’mba batokeshenga Lesa ku muchima. (Heb 11:6) Twakonsha kwibakwasha kuba bino kwingijisha buku wa Mukekala Myaka ne Myaka! Mu uno buku muji binembelo bya kwisambapo, ndumbulwilo yapeela kumvwa, mepuzho, mavidyo ne bipikichala byawama bingi. Inge ke tukwashe bo tufunjisha Baibolo kwikala na byubilo bya bwina Kilishitu ne kukosesha bulunda bwabo ne Lesa, ko kuba’mba tubena kwibakwasha kushimika na bintu byakosa bibula kupya na mujilo.—1Ko 3:12-15.

Bantu bamo kibakatazha kuswa’mba bakonsha kwikala balunda ne Lesa, mambo kechi bamumona ne. Onkao mambo, twafwainwa kwibakwasha kuyuka Yehoba ne kumuketekela.

TAMBAI VIDYO WA KUBA’MBA KWASHAI BANTU KWIKALA NA LWITABILO MWI YEHOBA KUPICHILA MU KWINGIJISHA BUKU WA KUBA’MBA “MUKEKALA MYAKA NE MYAKA!” APA BINO MUKUMBULE ANO MEPUZHO:

• Twayuka byepi kuba’mba nyenga waji kunengezha bingi bulongo lufunjisho?

• Nyenga waji kwingijisha byepi bulongo mepuzho akwabo pa kukwasha ye aji kufunjishanga kumvwisha mwatala kinembelo kya Isaya 41:10, 13?

• Vidyo ne kinembelo byaji kukwasha byepi ye baji kufunjishanga?

Bantu bavula kechi bayuka bilumbulula bukuzhi ne, kabiji kechi bebumona’mba bupe bwibapa Lesa pa muntu pa muntu ne. (Nga 2:20) Onkao mambo, twafwainwa kwibakwasha kwikala na lwitabilo lwakosa mu kitapisho kya bukuzhi bwa kwa Yesu.

TAMBAI VIDYO WA KUBA’MBA KWASHAI BANTU KWIKALA NA LWITABILO MWI YESU KUPICHILA MU KWINGIJISHA BUKU WA KUBA’MBA “MUKEKALA MYAKA NE MYAKA!” APA BINO MUKUMBULE ANO MEPUZHO:

• Twayuka byepi kuba’mba mulongo waji kunengezha bingi bulongo lufunjisho?

• Waji kwingijisha byepi biji pa kipungu kya kuba’mba “Kebai Bishinka Bikwabo” pa kukwasha ye abena kufunjisha?

• Mambo ka o kyanemena kulombelako ye tubena kufunjisha?