Yehoba Upesha Boba Babwela ku Kyalo ko Bafumine

BALONGO ne banyenga bavula bafumine mu byalo biyanji ne kuvilukila ku byalo byanonka babwela ku byalo ko bafumine. Na mambo a kutemwa Yehoba ne bantu, baya na kwingijila ku mapunzha kubena kukebewa basapwishi ba Bufumu bavula. (Mat. 22:37-39) Ñanyi bintu byo basankijilepo, kabiji Yehoba wibapesheshe byepi? Pa kuba’mba tutaane mukumbu, twayai twisambe pa kyalo kya Cameroon kiji ku muzhika wa Africa.

“MPUNZHA YAWAMA ‘KUKWACHILAMO MASABI’”

Mu 1998 mulongo wa jizhina ja Onésime wafumine mu kyalo kya Cameroon. Waikele mu kyalo kingi pa myaka 14. Juba jimo pa kupwila kwa bwina Kilishitu, waumvwine kimwesho kyaambilenga pa mwingilo wa kusapwila. Ñambi waambile’mba, “Inge bantu babiji babena kukwata masabi pa mapunzha apusana kabiji umo ubena kukwata masabi avula kukila mukwabo, nanchi awa ubena kukwatatu masabi acheche kechi wakonsha kuya pa mpunzha po akonsha kukwata masabi avula nenyi?”

Kino kimwesho kyalengejile Onésime kulanguluka pa kubwela ku Cameroon kuji bantu bavula bakeba kufunda Baibolo na kukwasha basapwishi baji mu kino kyalo. Pano bino, waakaminwe. Wishikizhenga’mba, abya ukakonsha kukwatakanya bwikalo mu kino kyalo kyo afuminemo kala ne kuya na kwikala ku kyalo kingi nyi? Pa kuba’mba ayuke inge wakonsha kukwatakanya bwikalo, Onésime wakiyile na kufwakesha kyalo kya Cameroon pa bañondo batanu na umo. Kepo mu 2012, wabwelele na kwikala mu kino kyalo.

Onésime washimikizhe’mba: “Nafunjile bya kwikala mu kino kyalo kyatwa bingi kyuya ne mwakumwena bya mu bwikalo. Mu Nzubo ya Bufumu, natendekele kupijilwa kwikala pa mabenchi akosa. Bino kuta muchima ku majashi kwandengejile kutendeka kulubako ku bipona byawama byo napijilwe kwikalapo.”

Mu 2013, Onésime wasongwele Géraldine, wabwelele ku Cameroon kufuma ku France ko aikele myaka itanu na ina. Ñanyi mapesho o bamwenejilemo bano ba mulume ne mukazhi mu katangizhako mwingilo wa Lesa mu bwikalo bwabo? Onésime waambile’mba: “Twataainwe ku Sukulu wa Basapwishi ba Bufumu ne kwingijila pa Betele. Mwaka wapwa, twajinga na bantu 20 babatizhiwe mu kipwilo kyetu. Luno pano nayuka kuba’mba mbena ‘kukwachila masabi’ pa mpunzha pawama.” (Mako 1:17, 18) Géraldine wanungilepo’mba: “Namwenamo mapesho avula kukila ne byo naketekejilenga.”

LUSEKELO LUFUMA MU KUFUNJISHA BANTU KWIKALA BAANA BA BWANGA

Judith wavilukijile ku United States bino wakebelenga kwingilako pakatampe mwingilo wa kusapwila. Washimikizhe’mba, “Kimye kyonse inge naya na kumonapo kisemi kyami ku Cameroon, najilanga pa kufumako mambo nashanga bantu bo natendekele kufunjisha Baibolo.” Nangwa byonkabyo, Judith wakankazhaminenga kubwela ku Cameroon. Waingilanga nkito yawama ya kufola mali avula kabiji watuminanga bashanji bakolelwe mali a kupotamo muchi ne kuya ku kipatela. Bino na mambo a kuketekela mwi Yehoba, Judith wabwelele ku Cameroon. Waambile’mba watonganga bintu bimo byawama byo eyowanga ku kyalo ko aikalanga. Walombele kwi Yehoba kuba’mba amukwashe kupimpula milanguluko kabiji watambwile lutundaiko kufuma ku kalama wa mwanzo ne mwinakwanji.

Judith inge wavuluka bintu byo byajinga kimye kyo abwelele ku Cameroon, waambile’mba: “Pa myaka isatu, najinga na lusekelo pa kufunjisha bantu bana kufika ne lubatizhilo.” Judith watendekele kwingila bupainiya bwiikajila. Lelo jino ubena kwingijila pamo na bamwatawanji ba Sam-Castel, mwingilo wa mu mwanzo. Pano ki ka kyamwekele kwi bashanji Judith? Aye ne kisemi kyanji bataaine kipatela kimo ku kyalo kingi kipaine kupaina bashanji mali a kwibatumbwila. Kabiji bebatumbwiletu bulongo.

KWIMWENA BUKWASHO BWA YEHOBA

Mulongo wa jizhina ja Victor wavilukijile ku Canada. Byo atangile kibaaba mu Kyamba kya Usopa kyaambilenga pa kufunda kufika palepa, walangulukilepo pa bintu byo afunjilenga. Wafuukwilepo kuleka kufunda pa univesiti ne kufundako busendwe bumo pa bañondo bacheche. Waambile’mba: “Kino kyankwashishe kutaana nkito bukiji ne kukonsha kwingila mwingilo ye nakebeshenga bingi, ko kuba’mba kwikala painiya.” Mu kuya kwa kimye, Victor wasongwele Caroline, kabiji bayile na kufwakasha ku Cameroon. Byo bajinga ku kino kyalo, bayile na kufwakasha pa ofweshi wa musampi kabiji bebatundaikile kulangulukapo kwiya na kwingijila mu Cameroon. Victor waambile’mba, “Kechi kwajingapo kintu kyakonsheshe kwitulengela kukana luno lwito ne, mambo twaikalanga bwikalo bwapeela.” Nangwa kya kuba Caroline wajingako na lukatazho lumo mu mubiji, bino baswile kuviluka.

Victor ne Caroline batendekele kwingila bupainiya bwa kimye kyonse pa kuba’mba bakwashe bantu bo bataaine bakebelenga kufunda Baibolo. Balamine mali avula pa kuba’mba babule kwikala na lukatazho lwa kukeba nkito bukiji. Kabiji mu kuya kwa kimye babwelele ku Canada na kwingilako nkito pa bañondo bacheche kabiji babwelele ku Cameroon ne kutwajijila kwingila bupainiya. Ñanyi mapesho o batambwijile? Bataainwe ku Sukulu wa Basapwishi ba Bufumu kabiji bebatumine kuya na kwingila bupainiya bwiikajila, kabiji luno babena kwingila mwingilo wa buntungi. Victor waambile’mba, “Kwipana kusha bwikalo bwawama ne kwiya na kwingijila Lesa kwitulengela kwimwena bukwasho bwa Yehoba.”

LUSEKELO LUFUMA MU KUKWASHA BANTU KWIPANA BENE KWI YEHOBA

Mu 2002, Alain, saka abena kufunda pa sukulu mukatampe mu Germany, watangile talakiti wa kuba’mba Anweba Bakyanyike—Mukobapoka Mubwikalo Bwenu? Byambo bijimo byamutundaikile kwibikila bikonkwanyi bingi. Mu 2006, wataainwe ku Sukulu wa Lufunjisho lwa Mwingilo kabiji bamutumine kuya na kwingijila ku Cameroon, kyalo ko asemekejilwe.

Mu Cameroon, Alain wataanine nkito ya kwingilakotu moba acheche mu mulungu. Mu kuya kwa kimye, wataaine nkito ya kufola mali avula, bino waakaminwe’mba ino nkito ikamulengela kubula kwikala na kimye kyabaya kya kusapwila ne kufunjisha. Onkao mambo, byo bamupele mwingilo wa bupainiya bwiikajila, waswile kwa kubula ne kukankazhamako ne. Muntu wamutwezhezhe nkito wamwambijile’mba ukamufoleshanga mali avula bingi, bino Alain kechi wapimpwile milanguluko yanji ne. Mu kuya kwa kimye, Alain wasongwele Stéphanie, waikele myaka yavula bingi mu France. Ñanyi makatazho Stéphanie o apichilemo byo avilukijile ku Cameroon?

Stéphanie waambile’mba: “Natendekele kukolwa bikola byapusana-pusana, bino natambulanga muchi kabiji nakasulukile.” Bano ba mulume ne mukazhi bamwenejilemo byawama mu kuchinchika kwabo. Alain washimikizhe’mba: “Byo twayile na kusapwilo mu muzhi waikela kwalepa bingi utelwa’mba Katé, twataaineko bantu bavula bakebelenga kufunda Baibolo. Mu kuya kwa kimye, twatendekele kwibafunjisha kwingijisha mafoni. Babiji pa bano bantu bo twafunjishanga babatizhiwe, kabiji kwalengelwe jibumba ja basapwishi.” Stéphanie wanungilepo’mba: “Kukwasha bantu kufika pa kipimo kya kwipana bene kwi Yehoba mu lubatizhilo kwituletela bingi lusekelo. Kwingijila kuno kwandengela kwikala bingi na lusekelo bimye byavula.” Lelo jino, Alain ne Stéphanie bengila mwingilo wa bukalama bwa mwanzo.

“TWAUBILETU KYONKA KYO TWAFWAINWE KUBA”

Gisèle wabatizhiwe saka abena kufunda bya michi pa sukulu mukatampe mu Italy. Uno nyenga watundaikilwe bingi pa kumona ba mulume ne mukazhi bapainiya bamufunjishanga Baibolo baikelenga bwikalo bwapeela kabiji naye wakebelenga kwingilako pakatampe mwingilo wa kusapwila. Onkao mambo, Gisèle watendekele bupainiya mu yenka mwaka ye apwishijilengamo Sukulu.

Gisèle wakebeshe kubwela ku Cameroon kuba’mba akengileko pakatampe mwingilo wa Yehoba, bino waakaminwe bintu bimo. Waambile’mba: “Kubwela ku Cameroon kwalumbulwilenga kuleka kwikala ngikazhi mwina Italy ne kusha balunda ne balongo bami baikalanga mu Italy.” Nangwa byonkabyo, mu May 2016, Gisèle wabwelele ku Cameroon. Mu kuya kwa kimye, wasongwelwe kwi Léonce, kabiji ofweshi wa musampi mu Cameroon watumine bano ba mulume ne mukazhi kuya na kwingijila mu muzhi wa Ayos mwakebewenga basapwishi ba Bufumu bavula.

Bwikalo bwajinga byepi ku Ayos? Gisèle washimikizhe’mba: “Papita milungu yavula kwa kubula kwikalapo na malaichi, kabiji kechi twakonsheshenga kuchaja mafoni etu ne. Bimye byavula mafoni etu kechi aingilanga ne. Nafunjile bya kuteka kajo pa mujilo wa nkunyi, ne kuya na kutapula mema bufuku na ngolofwana ne matochi mambo kyo kimye kyo kwakepanga bantu ku mushima.” Ki ka kyakwashishe bano ba mulume ne mukazhi kuchinchika? Gisèle waambile’mba: “Mupashi wa Yehoba, lutundaiko lwa mwinakwami, byambo lutundaiko ne bukwasho bwa mali bwafumanga ku balongo betu ne balunda netu bitukwashishe bingi.”

Nanchi Gisèle uji na lusekelo pa kubwela ku kyalo ko afumine nyi? Waamile’mba “Ee! Kwa kubula ne kuzhinaukatu ne. Patanshi, kwajinga makatazho o twapichilengamo, bimye bimo ne kulefulwa, bino byo twashinjiletu bino bintu, twamwene’mba twaubiletu kintu kyonka kyo twafwainwe kuba. Twaketekela mwi Yehoba kabiji tumvwa’mba tuji pepi ne aye.” Léonce ne Gisèle bataainwe ku Sukulu wa Basapwishi ba Bufumu, kabiji luno babena kwingila bupainiya bwiikajila bwa pa kimye kicheche.

Byonkatu bakwata masabi byo bachinchika bintu byapusana pusana pa mema, aba babwela ku byalo byabo basankilapo bintu bimo pa kuba’mba bakwashe bantu bakeba kufunda Baibolo. Kwambatu kine, Yehoba kechi ukalubako bano basapwishi bengila na ngovu pa butemwe bo bamwesha jizhina janji ne. (Ne. 5:19; Hebe. 6:10) Inge kya kuba mubena kwikala mu kyalo kingi kabiji kubena kukebewa basapwishi ba Bufumu bavula ku kyalo ko mwafumine, nanchi mwakonsha kubwela nyi? Inge mwauba bino, mukamwenamo mapesho avula bingi.—Maana 10:22.