Yukilaipo bya Katataka Kimye kyo Mubena Kufunda

Kimye kyo tubena kunengezha kufunda, twakonsha kwiipuzha’mba, ‘Ñanyi bintu byo mbena kukeba kufunda?’ Nangwa kya kuba kuji bintu byo tukeba kufunda, pano bino, twafwainwa kuvulukanga kuba’mba kuji ne bintu bikwabo bya katataka Yehoba byo abena kukeba’mba tufunde. Kimye kyo tubena kufunda, twakonsha kwikala byepi na muchima wa kukeba kufunjilapo bikwabo bya katataka?

Lombai maana. Lombai kwi Yehoba kwimukwasha kukwatakanya bintu Yehoba byo akeba’mba mufunde pa kyokyo kimye. (Yako. 1:5) Kechi mwafwainwa kufundangatu bintu byo mwayukila jimo ne.​—Maana 3:5, 6.

Swishai Mambo a Lesa kupimpula byubilo byenu. “Mambo a Lesa o omi.” (Hebe. 4:12) Mambo a Lesa omi akonsha kwitukwasha kimye kyonse kyo tufunda Baibolo. Pano bino, akonsha kwitukwashatu inge ke tufunjilepo ne bikwabo bya katataka Yehoba byo akeba’mba tuyuke.

Sanchilainga Yehoba pa byonse byo emufunjisha. Bintu byo etufunjisha biji nobe “kijiilo kya kajo kawama.” (Isa. 25:6) Kechi twafwainwa kukananga kajo ka ku mupashi ko etunengezhezha nangwa kya kuba kechi twikatemwa ne. Inge mwauba bino, Lesa ukemukwasha kupimpula byubilo byenu kabiji mukomvwanga bingi bulongo kufunda Baibolo.