Biji Kyalo kya Dominican Republic

Kyalo Kyalo kya Dominican ­Republic kyo kyabayilapo pa jikuji ja Hispaniola; ku lubaji lukwabo kuji kyalo kya Haiti. Mu kino kyalo munoka bingi mvula, muji mitumba ikatampe, mikola ya mato ne biselebwa. Mpunzha ya Pico Duarte yo mpunzha yazanduka bingi mu kyalo kya Dominican Republic, yaikela kumutunta kufuma ku kalunga ka mema patuntama mamita 3,175. Ku kitulu kya kalunga ka mema kwawama bingi mambo kuji busenga butoka, kabiji ku mutunta kuji bikuji biji na mushiji wafuka bingi, nabiji Kikuji kya Cibao.

Bantu Mu kino kyalo mwikala bantu bapusana pusana, bazungu bafumine ku Europe ne bantu bafita bafumine mu Africa. Kabiji muji ne mitundu ikwabo, bino bavujilamo bena Haiti.

Mulaka Mu kino kyalo bengijisha mulaka wa Kisipanishi.

Bwikalo Bamwena mali mu mikochi, shuka, kofi ne fwanka. Mu moba a kulutwe kuno, bukomo bwa kino kyalo bwayilako bingi palutwe na mambo a bantu beya na kufwakasha ne tumpanyi tulenga bya kulengalenga.

Nkiilo Pa jino jikuji kechi pakabisha ne. Kabiji panoka bingi mvula ku mapunzha a mitumba, pano bino kechi mu mapuzha onse munoka mvula mukatampe ne. Kabiji pa jino jikuji papita bingi binkunkwila bikatampe.

Bisho Kajo ko baja ke mupunga, nkunde ne bishu. Kabiji bena Dominican baja ne bankala ne bikwabotu bya mu kalunga ka mema, bipangwa bya mungye, papulika, ne makonde akusalula. Kano kajo kamo inge bekanengezhezha pamo bekate­la’mba La Bandera Dominicana, (ko ku­ba’mba mbandela ya bena Dominican) kajo ko batemwa bingi bena Dominican. Bantu bekala pa jino jikuji batemwa bingi mpila ya ku maboko itelwa’mba baseball, nyimbo ne kuzha kikatakata mazha obate­la’mba merengue. Batemwa kujizha mambanjo ne mimpempe, kwimba ñoma, ne njimba.