Mwingilo wa Kusapwila Watwajijila

Bamishonale Baingijilenga mu Bufyamfya

Kulekesha mwingilo yo yajinga ntendekelo ya bimye byakatazha ku balongo. Ba Alma Parson bamishonale baambile’mba: ‘Mazubo etu a Bufumu be ashinkile kabiji ne mwingilo naye bamukainye. Balongo betu mu kino kyalo bamanamine ne kupita mu makatazho avula bingi.’ Kabiji bavula makito apwile ne kukaswa. Nangwa byonkabyo, bano banyenga bavuluka na lusekelo amba: ‘Twimwenejile lutangijilo lwa Yehoba ne byo etuzhikijilenga pa bimye byavula bingi.’ Kuketekela ‘mu lutangijilo lwa Yehoba’ kwakwashishe balongo kutwajijila kwingila uno mwingilo mu bufyamfya.

Kechi betuswishishe kupwila pamo ne. Ba Lennart Johnson bavuluka’mba: ‘Balongo batatwile kupwila mu bufyamfya mu tumabumba tucheche mu mazubo. Twafundanga lufunjisho lwa Kyamba kya Usopa kyo bakopololanga kwingijisha munkinyi utelwa’mba mimeograph. Bonse balongo bakishinka banemekele bingi bukwasho bwa ku mupashi bwibapanga Yehoba bo twatambwilanga mu tuno tumabumba tucheche.’

Mu kuya kwa moba kafulumende wakizhizhemo ne kukizhamo kwituketa ne kwitumanyika. Bino balongo ne banyenga kechi bakakijilwe na moyo ne. Pa 15 September mu 1950, Munembeshi aye Hungría wanembejile Ndamakyalo amba: “Ba Lee Roy Brandt ne bakwabo batangijila jibumba ja Bakamonyi ba kwa Yehoba, bebeta pa bimye byavula mu uno ofweshi pa kuba’mba baleke kusampanya bubela bwa jino jibumba jabo. Nangwa byonkabyo, kechi babena kulondela uno mukambizho ne. Pa juba pa juba tutambula masawakya a kuba’mba batwajijila kusampanya mu bufyamfya bya bubela ne kulengulula kafulumende.” Ino nkalata yapwile na byambo bya kuba’mba “bakulumpe ba mu byalo bingi” ba Bakamonyi ba kwa Yehoba bebapange mu kyalo.

‘Kitulengejile Kuchinchika’

Mulongo Knorr ne Mulongo Henschel baishile na kumpempula mu kino kyalo na ku mpelo ya mwaka wa 1950. Kepo bamishonale bamo bebatumine kuya na kwingijila ku Argentina, ku Guatemala, ne ku Puerto Rico. Bakwabo batwelele nkito mu kyonka kino kyalo pa kuba’mba bekale monka. Mulongo Brandt watwelele nkito ku kampanyi ka malaichi, bakwabo batwelele nkito ya kufunjisha Kizungu. Sawakya wajinga mu Buku wa Mwaka wa 1951 waambile pa bano bamishonale amba: “Kwikala kwabo mu kino kyalo kwalengejile baana ba bwanga bakishinka ba kwa Nkambo bafunjile bukine kuchinchika. Bonse batemenwe bingi pa kumona byo bachinchikile ne kutwajijila na mwingilo wabo.”

Ba Dorothy Lawrence ke bamo pa bamishonale bafunjishanga Kizungu. Kununga pa kufunjisha Kizungu, baingilanga ne mwingilo wa kufunjisha bantu Baibolo batelengako muchima. Kyafuminemo bakwashishe bantu bavula bingi kufunda bukine.

Bapopweshi ba Yehoba bakishinka batwajijile kuya mu mwingilo nangwa kya kuba bebaketelenga. Kimye kimo basusaulanga mabuku ne kusendatu mapa acheche o bachimpa mu fwangalito wa jilaya nangwa mu kyola kya kupotelamo bintu pa kuba’mba basapwilenga kwa kubula kulengela bantu kwibata muchima. Tupepala twa kunembapo masawakya a mu mwingilo betulengele nobe mutanchi pa kunemba bya kupota. Pa mabuku, banembelepo mapopo, pa mabuloshuwa banembelepo nkunde, pa magazine banembelepo make, pa kubwelako pajinga kabiki, ne pa maola banembelepo sipinachi. Kyamba kya Usopa kyo bakopololanga na munkinyi utelwa’mba mimeograph bekitelanga’mba yuca, ko kuba’mba makamba. Mu kino kyalo bajima bingi makamba.

Mwingilo wa Kufunjisha Bantu Kwikala Baana ba Bwanga Watwajijile

Pa 16 June mu 1954, Rafael Trujillo wafwachikile ku pepala wa lumvwañano na Mukulumpe wa Bakatolika. Luno lumvwañano lwabo lwalengejile bantangi ba mu Loma Katolika kwikala bingi na bulume mu kyalo kya Dominican Republic. Kino kyaubiwe saka papita ne myaka ina kufuma po balekeshe mwingilo wetu. Nangwa byonkabyo, mu 1955 mu Dominican Republic mwajinga basapwishi 478. Pano ki ka kyalengejile basapwishi kuvujilako nangwa kya kuba bintu byakatezhe bingi? Sawakya wajinga mu Buku wa Mwaka wa 1956 waambile’mba: “Mupashi wa kwa Yehoba ye ubena kwitulengela kuchinchika. Balongo bakwatankana, baji na lwitabilo lwakosa kabiji bachinchika bingi.”

Mu July mu 1955, ofweshi wetu wa ntanda yonse watumijile Trujillo nkalata. Ino nkalata yalumbulwile byavula pa Bakamonyi ba kwa Yehoba kyo bakaina kutwela bushilikale, ne kulomba Trujillo kuba’mba alekeshe muzhilo wa kukanya Bakamonyi ba kwa Yehoba ne kipamo kyetu kya Watch Tower Bible and Tract Society. Ki ka kyafuminemo?