Byo Baubile na Kibelengelo Kyayijilengako Peulu

“Wakeba’mba Bantu Bonse Bapuluke”

Kyo kyaswa muchima wa Yehoba kuba’mba, “bantu bonse bapuluke ne kuyukisha bulongo bukine.” (1 Timo. 2:⁠4) Kwesakana na byaamba kino kinembelo, Bakamonyi ba kwa Yehoba ba mu kyalo kya Dominican Republic bebikako bingi kusapwila bantu bonse mu manyaunda mo bengijila, kubikapotu ne boba baji mu tuleya ne mwakulamina bambanzhi.

Mu 1997, bapainiya babiji beikajila baingijilenga byonka byo bengila kimye kyonse mu mulungu mu Kaleya ka Najayo kaji mu San Cristóbal, ko bataine ba Gloria bena Colombia bajinga na myaka ya kusemwa 23 bo bakashile na mambo a kusenda bizhima bya kuya na kupotesha. Besambanga javula na nyenga ye bakashile pa kubula mambo. Pa kuba’mba uno nyenga akumbule mepuzho aipuzhanga ba Gloria, balongo bamuletejile buku wa Ukupelulula Ukufuma mu Malembo ne mabukutu akwabo. Kukebesha kufunda ne kizaku kyabo kyalengejile bakwabo bajinga mu kaleya kutako muchima. Onkao mambo, jibumba ja bantu bo bayanga na kupempula pa mulungu pa mulungu jabayijilengako.

Bukine bwapimpwile bwikalo bwa ba Gloria, kabiji mu mwaka wa 1999 bafikijilemo kwikala musapwishi wabula kubatizhiwa. Pa ñondo pa ñondo baingilanga maola 70 mu mwingilo wa kusapwila mu kaleya, kabiji bafunjishanga Baibolo bakaili bakwabo babakazhi batanu na umo. Bino, mu 2000, balombele kuba’mba bebakasulule ne kya kine bebakasulwile kimye ndamakyalo kyo akakasulula bantu bamo. Bebakasulwile na mambo a byubilo byabo byawama. Bebakasulwile ne kwibambila kubwela ku Colombia. Mu 2001, byo bafikiletu mu kyalo kyabo, babatizhiwe, nangwa kya kuba ba mu kisemi kyabo kechi batemenwe pa byo bafukwilepo ne.

Ba Gloria batendekele bupainiya aku babatizhiwatu. Basongwelwe ku mukulumpe mu kipwilo, bonse bengila mwingilo wa bupainiya bwa kimye kyonse. Luno babena kwingijila mu Colombia ku mpunzha kuji kukajilwa kukatampe. Ba Gloria bakwasha bantu bavula bo bafunjisha Baibolo kwipana ne kubatizhiwa. Baambile’mba, ñumvwatu nobe nji na nkongole kwi Yehoba, kabiji jishinda jawama ja kupainamo ino nkongole ke kukwasha bantu kuyuka bukine.

Byapichilemo ba Gloria mu kaleya bimwesha kuba’mba bukine bukakwasha bantu kupuluka bubena kufika ne mu tuleya. Bemenako ofweshi wa musampi bayile na kwisamba na bakulumpe ba ku ofweshi utala pa tuleya na kulomba luusa lwa kuba’mba balongo batwelenga mu tuleya na kufunjisha mafunjisho a Baibolo. Kyafuminemo ke kya kuba’mba, balongo 43 ne banyenga batanu na umo bebaswisha kwingila mwingilo wa kufunjisha Baibolo mu tuleya 13.

“Lepesha Ntambo ya Tente Wobe”

Ku mpelo ya kitota kya myaka kya bu 20, mu kyalo kya Dominican Republic mwajinga basapwishi ba mambo awama 21,684 mu bipwilo 342, kabiji bafunjishenga mafunjisho a Baibolo 34,380. Batainwe ku Kivuluko bajinga 72,679. Na mambo a bino bibena kufumamo, bantu ba Yehoba babena kwingila na ngovu kwesakana na byambo bya kwa Isaya bya kuba’mba: “Bayisha mpunzha ya tente wobe. Tandubula bisapi bya tente wobe wa lusambakeno.Kange umukepeshe ne, lepesha ntambo ya tente wobe, ne kukosesha mpopo ya ku tente wobe.”​—Isaya 54:⁠2.

Kyakatezhe bingi kutana mpunzha pa kushimikila Nzubo ya Kubuñenamo mambo basapwishi bavujijilengako. Mu mwaka wa 1996, Nzubo ya Kubuñenamo iji kwipi na musampi mu Santo Domingo yapwile. Muno mo mwayanga baikalanga mu muzhi mukatampe wa kino kyalo ne baikalanga mu mapunzha aji kipi kipi. Nangwa byonkabyo, Nzubo ya Kubuñenamo yajinga mu Villa González yo baingijishanga mu kino kyalo, yakebewenga kwiiwamisha nangwa kushimika ingi.

Mu 2001, Jibumba Jitangijila jaswishishe kushimika Nzubo ya Kubuñenamo muji bipona 2,500 ponka pa mpunzha paji ikwabo mu Villa González. Balongo baumvwine bingi bulongo byo baumvwine kuba’mba basa kushimika kishimikwa kikwabo kyo bakengijishanga bakeyanga ku Sukulu wa Lufunjisho lwa Mwingilo (luno utelwa’mba Sukulu wa Basapwishi ba Bufumu). Kikekelatu kwipi na Nzubo ya Kubuñenamo, kabiji kikekala na bibamba mwa kulaala, kibamba mwa kufunjila, mwa mabuku, kibamba mwa kutekela ne mwa kujiila. Mu 2004, ba Theodore Jaracz ba mu Jibumba Jitangijila baambile jashi ja kupana bino bishimikwa. Kufumatu kyo kya kimye, masukulu 15 apwisha uno sukulu.