England: Balongo ne banyenga batambwijile benyi baishile ku kukonkana kwa byalo
KUSAPWILA NE KUFUNJISHA BANTU MWAYA NTANDA
Europe
Byalo 47
BANTU BONSE 743,421,605
BASAPWISHI 1,614,244
BANTU BAFUNJILENGA BAIBOLO 842,091
Kutamuka Muntu Kwalengejile Kutendeka Kufunda Baibolo
Kukonkana kwa byalo kwaikejile mu London ku England, kwatundaikile bingi balongo ne banyenga bafumine ku byalo bingi ne ku Bakamonyi bekala monkamwa. Andrew ne Elizabeth bayile ku hotela wa ku London, kuba’mba bemune benyi baishile. Byo bamwene mwanamukazhi wavwala bulongo saka aji mu kibamba mufikila benyi, Elizabeth walangulukile’mba ye mwenyi kabiji wamwimwine ne kumupakachilamo. Uno mwanamukazhi wakuminye bingi jishinda jo amwimwijilemo, akino kyalengejile Elizabeth kulomba lulekelo lwa mambo. Waambile’mba: “Ndekelaiko mambo, naji kulangulukanga’mba yenu benyi betu!”
Uno mwanamukazhi wamushikishe’mba: “Benyi baiya na kuba ka?”
Elizabeth watongwele kayukilo pajinga byambo bya kutambwila Bakamonyi ba kwa Yehoba, kabiji watemenwe bingi byaambile mwanamukazhi. Waambile’mba, “Kyawama bingi! Nanchi mbena kumweka nobe ne Kamonyi wa kwa Yehoba nyi?”
Byo besambilenga, Elizabeth washikishe uno mwanamukazhi jizhina janji, wamubuujile’mba Vivien, kabiji wafuma ku Nigeria, paikalanga Elizabeth ne aye kechi palepele ne. Vivien waswile kufunjilanga pamo Baibolo na baana banji. Andrew ne Elizabeth bayile ku nzubo ya kwa Vivien, kabiji wibatambwijile bingi bulongo. Kusambakana kwabo mu central London kwalengejile kumvwañananga ne Vivien. Andrew ne Elizabeth byo bamwesheshe Vivien buku wa Baibolo Ufunjisha, bakuminye bingi byo ebabuujile’mba uno buku uji nanji kabiji umutanga na baana banji bana. Byo bamubuujile’mba uno ye buku ye bengijisha kufunjishamo bantu Baibolo, Vivien waambile’mba, “Twayai tutendeke kufunda lonka luno!”
Nkalata Yatumine Mulongo wa ku Loma
Mu November 2014, balengele kipwilo kitanshi mo bamba mulaka wa Romany mu Slovakia. Pa kubuñana kwa mwanzo kwajingako katataka, bantu 21 bamba mulaka wa Romany babatizhiwe. Bonse bafuminetu mu muzhi umo. Bantu 495 ba mu kipwilo kya Romany baishile ku Kivuluko. Mulongo wabatizhiwetu, wanembele’mba:
Slovakia: Basapwishi ba Bufumu babiji babena kusapwila mwanamukazhi mwina Roma
“Amiwa ne mwina Loma wa ku Žehra ku Slovakia. Mpunzha ko ngikela, bazungu bavula betumona’mba twibakañenda kabiji twi bantu bandochi, bamba bubela kabiji bangivi. Byo nakebelenga kuya ku chechi, mukulumpe wa chechi wañambijile’mba kechi wafwainwa kwiyanga kuno ne. Na mambo a bino bintu byo bangubanga, mwakonsha kufwanyikizha byo nalangulukanga pa bazungu. Pano bino, Bakamonyi ba kwa Yehoba bangichile ku Nzubo ya Bufumu. Nayilenga saka nzhinauka namba nako kampe basakungubatu kintutu kimo. Nakuminye bingi, saka nkyangye kutwela mu Nzubo ya Bufumu, muzungu wangimwine mu kuboko ne kuntambwila. Kimye kyo baambilenga jashi ja Baibolo, kechi nateleko muchima ne. Nalangulukilenga namba, ‘Mambo ka bantu bonse kyo bammweshesha butemwe bibye?’
“Bufuku bonse najinga na kilabila, mambo nalangulukilengatu pa byammwekejile pa Nzubo ya Bufumu. Onkao mambo, nabweleleko jikwabo namba mmone inge lusa lo bammwesheshe lwajinga lwa kine nangwa ne. Byo nayileko ja bubiji, bantu bakijilemo kummwesha butemwe nobe muntu ye bayukile kala. Kechi nalekele kuya na kupwila ne, kabiji nabatizhiwe. Byo nabatizhiwetu, balongo kechi balekele kunta muchima ne, batwajijiletu kumwesha’mba nanema. Bimye bimo, bampa kajo kawama kukila ne ko bajapo abo bene! Nkeba bingi kwikala mu jino jibumba kabiji nkeba kwingijila Yehoba Lesa myaka ne myaka.”
Lulombelo lwa Kusapwila Mambo Awama Belukumbula
Nyenga wa jizhina ja Aysel waingijishe bbasi kufuma mu muzhi wa Ganja kuya ku Baku mu Azerbaijan. Walombele kwi Yehoba amba amukwashe kutaana muntu wa kwisamba nanji Baibolo pa lwendo lwanji. Nangwa kya kuba Aysel bamupelejile jimo kipona kya kwikalapo mu bbasi, mwanamukazhi umo wakoselekotu amba bekale pamo nanji. Aysel watendekele kwisamba na uno mwanamukazhi pa bintutu bikwabo, ko kyakayanga batendekele kwisamba pa bya mu Baibolo. Uno mwanamukazhi walumbulwile’mba watemwa bingi Yesu kabiji ukeba kuyuka byavula byaamba pe aye. Aysel ne uno mwanamukazhi bepeele manambala a foni ne kumvwañana kusambakana jikwabo. Mwanamukazhi waambijile Aysel kumuletela Baibolo.
Aysel byo abwelele ku Ganja, wayile na kumona uno mwanamukazhi pa nkito. Uno mwanamukazhi waambile’mba, uji na “kabuku ka milombelo” ko atangamo pa juba pa juba. Nyenga yetu wakuminye bingi kutaana’mba kabuku ka milombelo ko aambilengapo kajinga kabuku ka Kubalaula Binembelo Moba Onse ka mu 2013! Watendekele kumufunjisha Baibolo, kabiji Aysel watemenwe bingi kuba’mba Yehoba wamukwashishe kwisamba na uno muntu.
Kaili Watumine Nkalata ya Kusanta
Ku Spain kwafumine nkalata ya kuba’mba:
“Patanshitu, mbena kwimusanchila pa byo mubena kukwasha bantu bonse kumvwa mambo awama a mu Baibolo.
“Papita myaka 15 kufuma po nesambijilepo na Bakamonyi ba kwa Yehoba mu Tiranë ku Albania. Nakuminye bingi Kamonyi byo etusolomokele, mambo twajinga kajibumba ka banyike jikumi bajinga na byubilo byatama. Kafwako wakebanga kwisamba ne atweba ne, pakuba uno mulongo witusolomokele nangwa twajinga na bilwilo. Wisambile ne atweba biji mu Baibolo. Natemenwe bingi byo abujile moyo.
“Papita myaka ina kuno ku Spain kufuma pamfwakashijile Kamonyi mu kaleya kabiji wañambijile kufundanga Baibolo. Naswile kabiji kufumatu kyokya kimye, naleka byubilo byatama. Aluno kechi ne muntu wakanama ne. Papita myaka yavula kufuma po natainwepo mu lukatazho. Pano namuyuka Yehoba kabiji kino kyandengela kuyuka kyo naikelako. Nebikako kwikala bulongo na bantu kabiji ne musapwishi wabula kubatizhiwa pa mwaka umo.
“Nangwa kya kuba naikele myaka 12 mu kaleya, pa myaka ina yapitapo, nji na lusekelo ne mutende ye nabujile kwikalapo nanji kala. Namusanchila Yehoba pa juba pa juba.
“Pa milungu yapitapo, natambile mavidyo amo pa keyala wa jw.org. Natemenwe bingi byo natambile vidyo wamwesheshenga mulongo wajinga mu kaleya mu United States. Amiwa kechi njilajilatu ne, bino byo namwene byo apimpwile bwikalo bwanji, najijile.
“Yehoba atwajijile kwimukwasha byo mubena kwibikako kusapwila bantu bonse pa kutuntulula mambo awama mu milaka yavula ne pa kufwakesha atweba tuji mu tuleya.
“Nasanta bingi. Napwa amiwa mulongo wenu.”
“Pano Nakasuluka mu Milanguluko”
Felicity wa myaka 68 wikala mu Sweden, waambile’mba, “Kuji bintu bimo byo nabujile mu bwikalo bwami kabiji kino kyandengelanga kubula kuyuka bya kuba, natwajijile na kukeba mutende bino kechi namutaaine ne.” Byo abujile kutemwa bifunjisha Bakatolika, watendekele kuya mu machechi apusana pusana, kyapeleleko waikeletu ke mulozhi ne kutendeka kuponga.
Byo abujile kutaana bintu byawama byo akebelenga mu bwikalo bwanji, akino kyamulefwile bingi kya kuba wakebelenga ne kwiipaya. Byo najilangatu kikupu, nalombele kwi Lesa namba ambuule bintu byo abena kukeba amba ngubenga. Byo papichiletu milungu ibiji, naumvwine muntu umo wakonkonsheshe ku kibelo. Nsongwalume umo wangipwizhe umvwe nakonsha kutemwa kuteleka ku Mambo a Lesa. Naambile mu muchima namba, ‘Anweba Lesa, kechi naji kukebanga Bakamonyi ba kwa Yehoba ne!’”
Nangwa kya kuba wakebelenga kushinka kibelo, wafuukwilepo kuteleka kabiji waswile kufunda Baibolo kwingijisha buku wa Baibolo Ufunjisha. Waambile’mba: “Byo nafunjile mu Baibolo byankwashishe bingi. Felicity wabatizhiwe pa kushonkena kwa kijiiji kwajingako mu Sweden mu 2014. Waamba’mba: “Abino byo byo nakebelenga mu bwikalo bwami bonse. Pano nakasuluka mu milanguluko.”