Oceania

Nasapwijile kwa Kubula Kuchina

Emily wa myaka 12 wikala mu Australia. Juba jimo, mufunjishi wanji waambijile baana ba sukulu amba kyawama kusala balunda bawama. Akino kyalengejile Emily kumwesha mufunjishi wanji vidyo wa kuba’mba Ñanyi Mulunda wa Kine? Mufunjishi byo atambishe baana ba sukulu uno vidyo, bateleko bingi muchima. Byo bapwishishe kutamba uno vidyo besambilepo jiola jimo. Kabiji mufunjishi watambishe uno vidyo ku baana ba sukulu bakwabo. Emily wamwesheshe mufunjishi wanji ne bakwabo baana ba sukulu keyala wa jw.org. Emily waambile’mba: “Yehoba wankoseshe kuba’mba mbuule baana ba sukulu bavula uno keyala. Kine, wampesheshe.”

Kumwesha bya Busulu mu Mpunzha ya ku Muzhi

Basapwishi batanu baendele maola atanu na ana kupita mu mitumba kuya na kutanchika mabuku ku mpunzha ko bamwesheshenga bya busulu mu Suai ku Timor-Leste. Bantu baishilenga ko batanchikile mabuku bakuminye bingi pa kumona mabuku alumbulula Baibolo mu milaka 12, mambo kechi kwajingapo mabuku akwabo o banembele mu ino milaka ne. Mwanamukazhi umo wamwene mutwe wa buloshuwa ne kwamba’mba, “Awe ye mulaka wami!” Kyo kyajinga kimye kitanshi kutangapo buku wa mu mulaka wanji wa Bunak. Mu mobatu ana, basapwishi bapaine mabuku 4,571 kabiji bantu bavula bebambijile’mba mwiyenga na kwitufwakesha pa mazubo etu. Bantu bavula bakebelenga kwibafwakesha, kechi bamwenepo Bakamonyi ba kwa Yehoba ne. Banyike baikele maola avula na kutamba mavidyo avula a Ikala Mulunda na Yehoba mu mulaka wa Tetun Dili. Banyike bamo balabijile byambo bya mu lwimbo ne kumwimba na lusekelo.

“Byo Bintu Byakebelenga Baana ba Sukulu”

Brian ne Roxanne bamishonale balombele luusa kuba’mba batanchike mabuku pa sukulu mukatampe pa jikuji ja Palau. Bayile na kwisamba na mukulumpe wa pa sukulu ne kumutambisha vidyo waamba pa mwingilo wetu uji pa keyala wetu wa jw.org. Bebashijile ne mabuku amo o bakebelenga kuleta na kutanchika. Uno mukulumpe wabuujile Brian ne Roxanne amba bafwainwa kwisamba na mukulumpe utala pa baana ba sukulu. Byo basambakene na uno mukulumpe, bebambijile’mba bafwainwa kwisamba na mukulumpe mukwabo.

Brian waambile’mba, “Twisambile na mukulumpe, pakuba naye witwambijile kuya jibiji na kumona mukulumpe ye twisambile nanji patanshi, kabiji witwambijile’mba tunembe nkalata ya kwituswisha kutanchika mabuku. Betupishañenyengamotu kya kuba ketukebe ne kwikileka, nangwa byonkabyo twanembele nkalata.”

Brian ne Roxanne bayile jibiji ku mukulumpe wa pa sukulu kuba’mba ebabuule mukumbu pa nkalata yo banembele, balangulukilenga’mba usakukana. Brian waambile’mba, “Twakuminye bingi mukulumpe wa pa sukulu byo etubuujile’mba natangile mabuku enu kabiji awama bingi. Waambile’mba o mabuku akeba baana ba sukulu.” Kabiji wituswishishe!

Brian waambile’mba: “Mukulumpe utala pa baana ba sukulu witwambijile’mba, pa Mulungu tutwala baana ba sukulu ku chechi konse ko bakeba kuya. Waambile’mba, ‘Umvwe bakeba kuya ku chechi kwenu, twakonsha kwibatwala.’ Amiwa ne Roxanne twakuminye bingi. Twaketekejilenga’mba basakwitukaina, pano bino bakulumpe ba pa sukulu bepaine kutwala baana ba sukulu ku Nzubo ya Bufumu!”

Juba jitanshi Brian ne Roxanne jo batanchikile mabuku pa sukulu, bapaine mabuku 65, magazini 8 ne mabuloshuwa 11. Kabiji besambile bintu byavula bingi na baana ba sukulu. Bakulumpe bonse ba pa sukulu bebambijile’mba bakabwele ne jikwabo.

Bapota Bintu Babena Kutamba Mavidyo Etu

Lipson wingijila pa musampi, byo apwishishe kusapwila lukelo, wabwelelenga ku musampi wa ku Solomon Islands. Byo ayilenga, waumvwine nyimbo ya Bufumu saka ijila mu shitolo. Byo akebelenga kuyuka, watwelele mu shitolo. Wakuminye bingi kutaana’mba banyike ne bakulumpe bonse babena kutamba vidyo wa lwimbo nambala 55 uji na mutwe wa kuba’mba, “Bumi bwa Myaka!” kufuma mu vidyo wa Ikala Mulunda na Yehoba. Lwimbo byo apwile, mwina shitolo waambijile bantu amba, “Nji na vidyo mukwabo ye nkeba kwimutambisha.” Wabikilepo ne vidyo wa kuba’mba, Kwiba Kwatama. Uno vidyo byo apwile, waambijile bonse amba kange mungibilenga bintu mu shitolo ne.

Bantu bavula byo batwelele mu shitolo saka abena kutambisha vidyo, mwina shitolo wibambijile’mba, “Mbena kukeba namba anweba bonse mumvweko lwimbo ye natemwa bingi.” Wabwezhezhepo jikwabo lwimbo 55. Kabiji mwina shitolo wikala mu Solomon Islands Pidgin wafuukwilepo kutambisha vidyo wa kuba’mba Mambo ka a Kufunjila Baibolo? ne Kikala Byepi pa Kufunda Baibolo?

Bantutu bacheche mu Solomon Island bo bengijishatu intaneti mambo yauba mutengo kabiji kechi iji kwavula ne. Onkao mambo, uno mwina shitolo wabula Kamonyi wa kwa Yehoba ubena kukwasha bantu kuyuka bukine pa kutambisha mavidyo ku boba beya mu shitolo wanji.

Wataaine Jizhina ja Lesa mu Buku

Kimye kyonse pa Kimo, ba mulume ne mukazhi batemwa kutanchika mabuku mu muzhi mukatampe wa Nouméa mu New Caledonia. Juba jimo, mwanamukazhi wajinga bingi na bumvu waishile kishinshi po batanchika mabuku ne kutolapo buku wa Nanchi Baibolo Kine Ufunjisha’mba Ka? Byo papichile jiola jimo, wabwelele saka aji na buku mu kuboko. Waambijile ba mulume ne mukazhi amba, “Mwijimona je nyi?” Wazhikwile buku ne kutongola paji jizhina ja Yehoba. Waambile’mba, “Ajino jo jizhina ja Lesa. Naji kukebanga pa milungu yavula mu mabuku kuba’mba ngyuke bukine bwaamba pe Lesa. Bino byo naji kusenda buku wenu na kutwela mu motoka wami. Byo naji kumuzhikula, kintu kitanshi kyo naji kumona ke jizhina ja Lesa, Yehoba. Kyo kyo nabwelela namba nemusanchile.” Abano ba mulume ne mukazhi besambile bintu byawama bingi na uno mwanamukazhi ne kumumwesha mutwe wa kuba’mba “Jizhina ja Lesa—byo Bejingijisha ne byo Jilumbulula” uji mu bya kulumbulula mu buku wa Baibolo Ufunjisha. Uno mwanamukazhi waambile’mba nakebelenga kutwajijila kukebakeba mu mabuku, pano nayuka ko batanchika mabuku kimye kyonse pa Kimo!