Nkondo iji ku Middle East—Baibolo Waambapo’mba Ka?

Bantu mu ntanda baakamwa bingi pa nkondo iji pakachi ka kyalo kya United States, Israel ne Iran. Nanchi ino nkondo ikekala ya ntanda yonse nyi? Nanchi makafulumende akonsha kupwisha milukuchi ne kuleta mutende pa ntanda nyi?

Bantu bayuka bungauzhi bwa mu Baibolo bakonsha kulanguluka’mba kampe nkondo iji ku Middle East yo ikakolomona nkondo ya Amagedonyi yo baambapo mu buku wa Lumwekesho.

Baibolo waambapo’mba ka?

Nanchi makafulumende akapwisha nkondo iji ku Middle East nyi?

Baibolo waamba’mba: “Kange muketekele mu baana ba bamfumu nangwa mu mwana muntu ukabula kukonsha kwimupulusha ne.”—Salamo 146:3.

Kechi twayuka inge kyakuba makafulumende akapwisha nkondo iji ku Middle East ne kuleta mutende ku yoya mpunzha ne. Nangwa byonkabyo, Baibolo waamba’mba kafwako ndamakyalo, kafulumende wa bantu nangwa jibumba ja bantu jakonsha kupwisha nkondo ne kuleta mutende wa myaka ne. Lesa ye yenkatu wafwainwa ‘kupwisha nkondo pa ntanda ponse.’—Salamo 46:9

• Pa kuba’mba mufunjilepo bikwabo, tangai magazini wa Kyamba kya Usopa wa kuba’mba “Ñanyi Ukapwisha Nkondo?”

Nanchi nkondo iji ku Middle East ibena kufikizha bungauzhi nyi?

Baibolo waamba’mba: “Mukomvwanga makondo ne nkuwa ya makondo. . . . Kisaka kikalukuka kisaka kikwabo ne bufumu bukalukuka bufumu bukwabo.”—Mateo 24:6, 7.

Milukuchi iji ku Middle East ke kintu kikwabo kibena kumwesha’mba tuji ku “mpelo ya buno bwikalo” ne kuba’mba tubena kwikala “mu moba a kupelako.” (Mateo 24:3; 2 Timoti 3:1) Nkondo ijiko lelo jino ibena kumwesha’mba katatakatu Lesa akapwishe nkondo ne makatazho onse alengela bantu kuyanda.

• Pa kuba’mba mufunjilepo bikwabo, tangai kibaaba kya kuba’mba “Kiyukilo kya “Moba a Kupelako,” nangwa’mba “Bimye bya ku Mpelo” kyo ki ka?”

Nanchi nkondo ya Amagedonyi ikatendekela ku Middle East nyi?

Baibolo waamba’mba: “Bebakonkenye pamo ku mpunzha itelwa mu Kihebelu amba Amagedonyi.”—Lumwekesho 16:16.

Nkondo ya Amagedonyi kechi yo nkondo ya makafulumende a bantu yatendeka ku Middle East ne. Pakuba ke nkondo ya Ntanda yonse ikalwa makafulumende a bantu ne Lesa.

• Pakuba’mba mufunjilepo bikwabo, tangai kibaaba kya kuba’mba “Nkondo ya Amagedonyi yo i Ka?”

Ki ka kyakonsha kwitukwasha kubula kukizhamo kwakamwa inge tubena kupita mu makatazho?

Baibolo waamba’mba: “Kange mubambishenga michima yenu na mambo a kintu nangwa kimo ne, bino mu bintu byonse mu lulombelo ne milombelo ya misashijilo pamo na kusanta, saka musolola kwi Lesa bintu byo mukeba.”—Filipai 4:6.

Yehobaa Lesa ukeba’mba tulombenga kwi aye. Na mambo a kuba’mba Lesa wituta muchima, uteleka ku milombelo yetu ne kwitukwasha kuyuka bya kuba na makatazho. (1 Petelo 5:7) Yehoba kechi witubuulatu ene mambo makondo kyo aikelako ne, pakuba witubuula ne byo akeapwisha ne byo akafumyapo misongo ne buyanji.—Lumwekesho 21:3, 4.

• Pa kuba’mba mufunjilepo bikwabo pe Lesa byo etukwasha, tangai kibaaba kya mu Kizungu kya kuba’mba “You Can Find Words of Comfort in the Bible.”