Babikile Bipepala byo Banembelepo Byambo Munshi ya Munkinyi wa Kuchapilamo Bivwalo

Zarina byo abatizhiwetu ne kwikala Kamonyi wa Yehoba, wafumine ku Russia ne kubwela kwabo ku Central Asia, kabiji wafuukwilepo kukomeshesha baana banji babakazhi babiji mu bukine. Na mambo a kuba’mba kechi wajinga na mali avula ne, wayile na kwikala pamo na bansemi banji mu nzubo imo pamo ne nkasanji wamulume ne mukazhanji. Bansemi banji bamukanyishe kufunjisha baana banji bukine bwa mu Baibolo. Kabiji babuujile baana banji amba kechi bafwainwa kwisambanga ne inabo bya mu Baibolo ne.

Zarina walangulukilepo bingi pa byo afwainwe kukwasha baana banji kufunda pe Yehoba. (Byambo bya Maana 1:8) Onkao mambo, walombele na mukoyo kwi Yehoba kuba’mba amutangijile ne kumupa maana. Kepo Zarina aubilepo kimo pa kuba’mba afikizhe kyo alombelepo. Wafuukwilepo kuyanga na baana banji na kupitañana ne kwisamba nabo pa bilengwa na Lesa. Ino misambo yo baikalanga nayo pa kuya na kupitañana yakwashishe bansongwakazhi kwikala na kizaku kya kukeba kuyuka byavula pa Mulenga.

Kabiji Zarina walangulukilepo jishinda ja kufunjishamo baana banji byavula pe Lesa kupichila mu kwingijisha buku wa Nanchi Baibolo Kine Ufunjisha’mba Ka?a Wakopolwele mafuka ne mepuzho ne kwianemba pa bipepala. Kabiji wanungilepo ne byambo bikwabo bya kukwasha baana banji kumvwisha mafunjisho ajimo. Kepo afile ano bipepala pamo ne pezulu munshi ya munkinyi wa kuchapilamo bivwalo wajinga mu kibamba kimo. Baana byo bayile mu kino kibamba, batangile mafuka ne kunemba mikumbu yabo.

Kupichila mu kwingijisha jino jishinda, Zarina wafunjile na baana banji bitango bibiji mu buku wa Baibolo Ufunjisha saka bakyangye kukeba nzubo ikwabo mwa kwikala. Byo bataaine nzubo, wakasulukile kufunjisha baana banji kwa kubula wakumukatazha ne. Mu October 2016, baana banji bonse babiji babatizhiwe, kabiji bajinga bingi na lusekelo pa kuyuka’mba bainabo baingijishe maana ne milangwe pa kuba’mba bebafunjishe bukine.