Bakapokola Bashinjikinyeko Joseph
Inge kya kuba’mba mwi Bakamonyi ba kwa Yehoba, nanchi mwakonsha kufwanyikizha bakapokola kwimushinjikinyako pa kuya na kusapwila ku nzubo ku nzubo nyi? Kino kyo kyamwekejile Joseph ku Micronesia mu 2017. Aye ne Bakamonyi bakwabo basatu bajinga na mukwekele wa kusapwila bantu bekala pa makuji aji kwalepa.
Pa kushinkimana juba, bano Bakamonyi bana bafikile pa kajikuji kacheche pekala bantu 600. Byo bafikile ku kitulu, bano Bakamonyi bebemwine ku mukulumpe wimenako kafulumende pa jino jikuji. Joseph walumbulwile kyalondejilepo amba: “Uno mukulumpe wa mu kafulumende waambile’mba motoka wa bakapokola usakwitutwala pa mazubo onse. Twakuminye bingi, bino twakaine na mushingi. Twakebelenga kufwakesha bantu ku nzubo ku nzubo byonka byo twaubanga kimye kyonse.”
Bano basapwishi batendekeleko kuya panshi, mambo bakebeshe kwisamba na bantu bavula. Bano Bakamonyi baambile’mba: “Bantu betutambwijilenga bulongo kabiji bakebeshe bingi kuteleka ku byambo byetu. Kyafuminemo, twaikelenga kimye kyabaya pa nzubo imo kukila byo twaketekejilenga.”
Mu kuya kwa kimye, motoka wa bakapokola wapichile kwajinga Joseph jibiji, kabiji byo apichile ja busatu, waimene. Bakapokola baipwizhe Joseph inge kya kuba bakonsheshe kumutwala ku mazubo o abujile kufikako. Joseph uvuluka’mba: “Naambile’mba ine. Pano pa kikye kimye bañambijile’mba, ‘Mwashalatu na kimye kicheche, onkao mambo, tusakwimutwala ku mazubo onse ashalako.’ Nakankelwe kukana mambo kwashajile mazubo acheche o nafwainwe kuyapo. Inge ketufike pepi na nzubo, bakapokola bambuujilenga mazhina a bantu bekala pa yoyo nzubo kabiji baambile’mba inge inge nakonkonsha bantu babula kulupuka, basavumya ntolompita yabo pa kuba’mba bena nzubo bayuke’mba paji bantu pangye.
“Na bukwasho bwa bakapokola, twafikile pa mazubo onse pa jonkaja juba. Twashijile bantu mabuku avula kabiji twanengezhezhe kubwela ku bantu bamwesheshe kizaku.”
Bakapokola babuujile Joseph amba “baumvwine bingi bulongo kusampanya mambo awama.” Bakamonyi byo bafumineko pa kuzhika juba, bakapokola bajinga ku kitulu basokwenenga saka bamwemwesela pa kwamba’mba mwende bulongo saka balama ne mabuku etu mu maboko abo.