Bebakasa na mambo a lwitabilo lwabo—Russia
Kafulumende wa kyalo kya Russia wiyeka na kulukuka Bakamonyi ba kwa Yehoba byonkatu byo kyajinga mu kimye kya kafulumende wa Soviet. Kutendeka pa 21 January 2019, bakapokola bakasa Bakamonyi 22 kabiji bakwabo 26 bebakashila mu mazubo abo kabiji bakwabo nabo 40 kechi bebaswisha kufuma mu mapunzha mo bekala ne. Abano bonse bebapamo mambo a kuba’mba banengezhenga ne kupana mali a kukwasha jino jibumba “jibena kutundaika lupato.”
Mu July 2018, bakapokola mu mpunzha ya Omsk batotolweshe Kamonyi mwanamukazhi, akino kyashinkula jishinda ja kumanyikilamo Bakamonyi. Nangwa kya kuba uno Kamonyi mwanamukazhi bamukasulwile bamukashila mu kaleya ka mu nzubo, kabiji byo papichiletu bañondo bacheche mu October 2018, bakapokola mu muzhi wa Sychevka bakashile Bakamonyi babiji banabakazhi. Ne lunotu bakiji mu kaleya kabiji kechi baji pa mutanchi wa kwibakasulula ne, kufikatu ne pa 19 February 2019.
Kufumatu mu April 2017, bakapokola bebingishenga bene byo bafuukwilepo kushinka kipamo kya Bakamonyi ba kwa Yehoba ne kwingijisha kutama muzhilo wa ntanda wa 282 waamba pa bya Kutotolwesha Muntu Walenga Mambo. Pano bino, babena kumanyika Bakamonyi ba kwa Yehoba na mambo a mpopwelo yabo ya mutende. Inge bakebazhachishe na mambo, ko kuba’mba bamo bo bakasa bakekala mu kaleya myaka jikumi.
Kufumatu mu February 2018, bakapokola balenga muzhilo wa kulondela pa kukasa Bakamonyi ba kwa Yehoba. Bakapokola batwela mu mazubo a Bakamonyi kwa kubula luusa, bashishika mata ku mitwe ya bangikizha kuvwangakotu ne baana ne bakulumpe ne kwibakanjikizha kulaala panshi. Inge bakapokola babena kupikita mu mazubo a bantu, basenda bintu byabo ne kutwala Bakamonyi mu kaleya na kwibepuzha. Abano bakapokola bakebakeba biji mambo, bapamo mambo Bakamonyi bamo amba babena kwingila mwingilo ubena kutundaika bumbanzhi kabiji batundaika makochi kuba’mba bebafwishe na mambo. Inge Bakamonyi bebakasa, mitonyi yambila bije kunungako moba avula a kwibakashilamo, makochi nao alondela byonkatu byo bebabuula.
Ba Dennis Christensen Bebakasa kwa Kubula Mambo
Pa 25 May, 2017, bakapokola ne ba mu kipamo kya Federal Security Services bavulañenye kupwila kwa mukachi ka mulungu kwa Bakamonyi ba kwa Yehoba mu Oryol mu Russia. Ba Dennis Christensen, bena Denmark nabo bajinga mu kupwila kimye kyo balukukile, bebakashile ne kwibatebawizha bingi. Ba Christensen bebapelemo mambo a kuba’mba baji mu kipwilo kibena kutundaika mwingilo wa jibumba ja bantu “batundaika lupato.”
Nangwa kya kuba baeseka bimye byavula kutwala mambo ku bije bikwabo kuba’mba bambe ano mambo, ba Christensen batwajijila kwikala mu kaleya kwa kubula kwibatotolwesha. Katataka papo kije kya mambo kya mu kibunji kya Oryol kyaambile kuba’mba ba Christensen bebanungileko moba a kwikala mu kaleya kwa kubula kwibatotolwesha kufika pa 1 February, 2019. Na mambo a kuba’mba ba Christensen bena Denmark, bukiji bukiji babuujile ofweshi wa ntomesha wa kyalo kya Denmark mu Moscow kuba’mba bebakasa. Babinemanga ba ku Denmark bayile na kumona ba Christensen mu kaleya mo bajinga kabiji babena kulondela byo babena kwamba mambo abo.
Mambo a ba Christensen batatwile kwiamba pa 26 February, 2018, kabiji byo beatotolwele pa bimye 50, bafuukwilepo kuba’mba bakatwajijila kutotolola ano mambo kufika mu January.
Batwajijila Kukeba Mashinda a Kuba’mba Baleke Kukasa Bantu Kyanshijitu
Kutwajijila kumanyika Bakamonyi ba kwa Yehoba mu Russia kubena kumwesha’mba kafulumende kechi ubena kukebatu kushinka bipamo byanembesha Bakamonyi mwayila mizhilo ne, bino ubena kukeba kwibangata luusa lwa kupopwela Lesa. Bashabyambo babena kwimenako Bakamonyi baeseka mashinda apusana pusana kuba’mba bantu bo bakasa kwa kubula mambo bebakasulule, bino bapulwilamotu mabula, kabiji banemba makalata a kwijizhanya ku kipamo kitala pa luusa lwa bantu kya ba UN ne ku kochi utala pa luusa lwa bantu mu Europe. Bakamonyi ba kwa Yehoba mwaya ntanda yonse baji na luketekelo lwa kuba’mba bije bichiba mambo a mu byalo byonse bya mu Europe bisakutundaika kafulumende wa Russia kunemeka luusa lwa bantu lwa kukasuluka mu bya bupopweshi.
Ndonda ya Byamwekele
21 January, 2019
Bakamonyi 22 bebakasa.
12 December, 2018
Bakapokola mu muzhi wa Neftekumsk bakwachile Kamonyi wamulume kimye ayile ku ofweshi wa bakapokola byo bamutumijile kapepala ka kumwita kuba’mba akaye ku ofweshi wabo.
9 December, 2018
Bakapokola balukukile mazubo mu Neftekumsk. Bakwachile Bakamonyi babiji ne kwibakasa kwa kubula kwibatotolwesha.
10 November, 2018
Bakapokola balukukile kishimikwa kya makompyuta. Bakamonyi bavula babalume bebakwachile ne kwibakasa kwa kubula kwibatotolwesha.
9 November, 2018
Bakapokola balukukile mazubo a bantu mu muzhi wa Novosibirsk kabiji bakwachile Kamonyi umo ne kumukasa kwa kubula kumutotolwesha.
18 October, 2018
Bakapokola balukukile mazubo mu Dyurtuli kabiji bakwachilepo Kamonyi umo wamulume ne kumukasa kwa kubula kumutotolwesha.
9 October, 2018
Bakapokola balukukile mazubo mu muzhi wa Kirov. Bakamonyi bavula babalume, kubikapo ne ba Andrzej Oniszczuk, bafumine ku Poland, bebakwachile ne kwibakasa kwa kubula kwibatotolwesha.
7 October, 2018
Bakapokola ne kipamo kikwabo kya bashilikale balukukile mazubo mu muzhi wa Sychevka kabiji bakwachile ba Nataliya Sorokina ne ba Mariya Troshina. Bano banabakazhi babiji bebakashile kwa kubula kwibatotolwesha kufika pa 19 February, 2019. Kubikapo ba Anastasiya Polyakova bo bakashile mu July, Bakamonyi babakazhi bo bakasa mu Russia na mambo a kuba’mba batundaika lupato bafika ke basatu.
2 August, 2018
Bakapokola ne ba mu kipamo kya FSB balukukile mazubo mu muzhi wa Khabarovsk. Bakwachile Kamonyi umo wamulume ne kumukasa kwa kubula kumutotolwesha.
28 July, 2018
Bakapokola balukukile nzubo ya inetu wakoma bingi uji na mwana wamulume Kamonyi ne kukwata uno mwana. Bamukasa kwa kubula kumutotolwesha ne.
25 July, 2018
Bakapokola ba mu kipamo kitala pa kukana kiwowo (Special Rapid Response Unit of the Russian National Guard) balukukile mazubo mu Kostroma. Bakwachile Kamonyi wa wamulume ne kumukasa kwa kubula kumutotolwesha.
22 July, 2018
Bakapokola ne ba mu kipamo kya FSB balukukile mazubo mu Berezovskiy. Bakwachile Bakamonyi babiji babalume ne kwibakasa kwa kubula kwibatotolwesha.
15 July, 2018
Bakapokola bapikichile mu mazubo a Bakamonyi bavula bingi mu Penza. Bakwachile Kamonyi umo wamulume ne kumukasa kwa kubula kumutotolwesha.
4 July, 2018
Bakapokola balukukile mazubo mu Omsk. Bakwachile ba Sergey ne ba Anastasiya Polyakov kabiji bebakashile kwa kubula kwibatotolwesha. Ba muka Polyakova ye Kamonyi mutanshi wamukazhi ye bakasa mu Russia ne kumupamo mambo a kuba’mba utundaika “lupato.”
3 July, 2018
Bakapokola bakwachile ba Andrey Stupnikov ku kibanza kya ndeke mu Krasnoyarsk ne kwibakasa kwa kubula kwibatotolwesha.
12 June, 2018
Bakapokola balukukile mazubo mu Saratov. Bakwachile Bakamonyi bavula bingi ne kwibakasa kwa kubula kwibatotolwesha.
Ku Ntendekelo ya Ñondo wa June 2018
Bakapokola balukukile mazubo mu Tomsk ne mu Pskov. Bakwachile Kamonyi wamulume umo ne kumukasa kwa kubula kumutotolwesha.
May 2018
Bakapokola balukukile mazubo mu Orenburg, Birobidzhan, Perm, Naberezhnye Chelny, Magadan, ne mu Khabarovsk. Bakwachile Bakamonyi babalume jikumi ne kwibakasa kwa kubula kwibatotolwesha.
April 2018
Bakapokola balukukile mazubo mu Ufa, Polyarny, Vladivostok, ne mu Shuya. Bakwachile Bakamonyi babalume bavula ne kwibakasa kwa kubula kwibatotolwesha.
26 February, 2018
Batendekele kutotolola mambo a ba Dennis Christensen mu kije kya mu nkambi ya Zheleznodorozhniy, kabiji mutonyi wa jizhina ja Aleksey Rudnev ye wachibilenga ano mambo.
20 July, 2017–November 2018
Ba Dennis Christensen bebanungijileko moba a kwikala mu kaleya kwa kubula kwibazhachisha na mambo pa bimye byavula, patanshi kije kya mu nkambi ya Sovietskiy apa bino ne kije kya mu nkambi ya Zheleznodorozhniy. Pa kino kimye bakiji mu kaleya kufika pa 1 February, 2019.
26 May, 2017
Kije kya mu Nkambi ya Sovietskiy mu kibunji kya Oryol kyakashile ba Dennis Christensen bañondo babiji kwa kubula kwibatotolwesha ne.
25 May, 2017
Bakapokola balukukile bantu bapwijilenga mu Oryol kabiji bakwachile ba Dennis Christensen.