BYA KUKWASHA KISEMI | MASONGOLA
Bya Kuleka Kwipachika
LUKATAZHO
Nanchi anweba ne bena kwenu kimukatazha kwisamba bulongo nyi? Nanchi mwakamwa kuba’mba byambo byo musakwamba bisa kuzhingijisha bena kwenu ne kutendeka kutoboka nyi?
Umvwe byo byo kiji, yukai kuba’mba mwakonsha kutendeka kwisamba bulongo. Patanshi mwafwainwa kuyuka bine bintu bimulengela kwipachika.
BILENGELA
Kubula Kumvwisha Bibena Kwamba Mukwenu. Mwanamukazhi uji mu masongola wa jizhina ja Jillian.a Waambile’mba: “Kimo kimye ñambila bamwata wami byambo bya kupulumukatu kwa kubula kuyuka ne kyo mbena kwamba ne. Kabiji ndubamo ne byo naji kwamba. Abino byo byo nguba.”
Kupusenamo mu Ndangulukilo. Nangwa kya kuba mwitemwa byepi na bena kwenu, kimye kimo mukapusenangamo mu bintu byo muba. Mambo ka? Mambo kafwako bantu balangulukatu kintutu kimo ne. Kino kyakonsha kuleta makatazho mu masongola. Mu masongola avula umvwe kyaikala bino, mwikala makatazho.
Bya kumwenako byatama. Mwanamukazhi uji mu masongola wa jizhina ja Rachel waambile’mba: “Bansemi bami batobokanga bingi ne kwiambila mwenga kabiji kimye kyo nasongwelwe ne amiwa naubangatu byonka byaambanga bamama ku batata. Kechi najinga na mushingi ne.”
Kwakamwa. Javula, kutoboka kufuma pa kintu, kechi kwiyakotu ne. Nabiji kwambila mwina kwenu kuba’mba “Mukelwatu kimye kyonse!” Kino kechi kyo kine kintu kyakonsha kulengela mwina kwenu kuzhingila ne, pano bino wakonsha kumona kuba’mba kechi mu mulangulukilako ne.
Kwitobosha kimye kyonse kwakonsha kuleta bikola ne kupwisha masongola enu. Pano mwakonsha kuba byepi pakuba’mba muleke kutoboka?
BYO MWAKONSHA KUBA
Kintu kyafwainwa kwimukwasha ke kuyuka kine kintu kilengela kuba’mba mwipachikenga. Umvwe bintu bijitu bulongo, esekai kuba bino byalondelapo na bena kwenu.
1. Pa mapepala abiji apusana, bonse babiji nembaipo kyalengejile kuba’mba mwipachike. Nabiji wamulume wakonsha kunemba’mba, “Jazhikijilemotu na bakwenu kwa kubula ne kuumbula ko wajinga nangwa kuntuminakotu foni pa kuba’mba umbuule kowajinga ne.” Wamukazhi naye wakonsha kunemba bino’mba, “Mwaji kuzhingila mambo naji kuzhikisha juba na bakwetu.”
2. Saka mwabula kuzhingila, isambai pa bino byalondelapo: Nanchi luno lukatazho lwajinga lukatampe nyi? Nanchi inge mwakulengululatu nyi? Kimye kimo, pa kuba’mba pekale mutende, kyakonsha kuwama kwitaba nangwa kukana kuba’mba bonse twa kupusenamotu ne kutwajijila mu butemwe.—Jifunde ja mu Baibolo: Byambo bya Mana 17:9.
Umvwe anweba ne bena kwenu mwamona kuba’mba kafwapotu ne kine kintu kyaji kulengela kutoboka ne, ilekelaiko mambo ne kulubako.—Jifunde ja mu Baibolo: Kolose 3:13, 14.
Inge lukatazho lwamweka kubaya kwi anweba bonse babiji, isambai pa kishinka kyalondelapo.
3. Nembai byo mwaumvwine kimye kyo mwatobokelenga, ne bena kwenu nabo banembe. Nabiji wamulume wakonsha kunemba kuba’mba, “Naji kumona amba waji kutemwa bingi kwikala na bakwenu kukila amiwa.” Wamukazhi wakonsha kunemba kuba’mba, “Naji kumona amba mwaji kummonanga nobe ne mwanyike wa kwendatu na kusopa ku bashanji.”
4. Ipimpulai mapepala na bena kwenu, ne kutanga bya kunemba bena kwenu. Ñanyi kintu kya kulengela bena kwenu kwakamwa kimye kyo mwa kutobokanga? Isambai pa byo mwakufwainwa kuba anweba bonse babiji pa kuba’mba mwisambe bulongo kwa kubula kutoboka.—Jifunde ja mu Baibolo: Byambo bya Mana 29:11.
5. Isambai pa byo mwafunjilako ku bino. Mwakonsha kwingijisha byepi byo mwafunda pa kuba’mba mukabule kutoboka jibiji pa kimye kya kulutwe?
[Tubyambo twa mushi]
a Mazhina apimpulwa.
BINEMBELO BYAKONSHA KWIMUKWASHA
“Awa uvwetapo pa mambo ukeba butemwe.”—Byambo bya Mana. 17:9.
“Saka mwitekenya anwe bene na bene ne kwilekelako mambo umvwe umo uji na mambo na mukwabo.”—Kolose 3:13, 14.
“Wakosama usolola bukaji bwanji bonse; pakuba wa mana wibukanya kumweka ne kwibuzhindamika.”—Byambo bya Mana. 29:11.
[Kitenguluzha pa peja 5]
UMVWE MWATOBOKA . . .
Yukai kyalengela: Kimye kyo mubatobokenga, ñanyi kintu kyo mubakebenga? Yukai bintu byaji kulengela.
“Langulukai jikwabo” pa kya kulengela kutoboka: Mu kifulo kya kwipachika, ñanyi bintu byo mwa kufwainwa kuba anweba bonse babiji ku mukwenu pa kuba’mba mubule kutoboka?
[Mabulañano pa peja 5]
Umvwe kafwapo ne kine kintu kya kulengela kutoboka, ilekelaiko mambo ne kulubako