BYAMBAPO BAIBOLO

Kupopwela Mipashi Kupopwela Mipashi

Nanchi kwisamba na bafu kwatama nyi?

“Kechi mukalulukile ku besamba na mipashi . . . ne, mwakeya kwizhilulula mambo a abo.”—Bena Levi 19:31.

BYAMBA BANTU Kya kine, bantu bakeba kwibakwasha kuyuka kuba’mba mutemwe wabo wafwa kechi ubena kumanama ne. Onkao mambo, bamba’mba: “Ibyepi inge naya ku wisamba na mipashi pa kuba’mba nkesambe na mutemwe wami wafwa? Kampe kuba bino kwakonsha kukepeshako bulanda bwami ne kunkwasha kukasuluka mu milanguluko.”

BYAMBA BAIBOLO Baibolo kechi wapita mu mbaji pa kwamba pa kyubilo kya kwisamba na bafu ne. Kino kyubilo bekitemenwe bingi kimye kya kala. Kyakumwenako, Muzhilo Yehoba Lesa ye apele mukoka wa bena Isalela wajinga wa kuba’mba: “Kechi mukatanwe mukachi kenu nangwa umo . . . wisamba na bapashi, nangwa . . . wipuzha bafu ne. Mambo bonse boba bino bintu bo ba bunya kwi Yehoba.” (Mpitulukilo ya mu mizhilo 18:10-12) Baibolo wanungapo amba bonse bapopwela mipashi mu mashinda onse “kechi bakaswana bufumu bwa kwa Lesa ne.”—Ngalatiya 5:19-21.

Nanchi bafu bakonsha kukwasha nangwa kukabisha bantu bomi inyi?

“Bomi bayuka’mba tukafwa, bino bafu kafwako kyo bayuka ne.”—Musapwishi 9:5.

BYAMBA BANTU Bantu bavula bamba’mba muntu inge wafwa, utwajijila kwikala mumi ku mpunzha ikwabo. Onkao mambo, bantu bamo bakonsha kweseka kwisamba na bafu na mulanguluko wa kuba’mba batambuleko mabulañano amo afyamika, nangwa kupopwela bafu pa kuba’mba babulenga kukabisha bantu bomi.

BYAMBA BAIBOLO “Bomi bayuka’mba tukafwa, bino bafu kafwako kyo bayuka ne. . . . Butemwe bwabo ne lupato lwabo ne kichima kyabo [byo bajinga nabyo saka bakyangye kufwa] byaonaika kala.” (Musapwishi 9:5, 6) Kya kine, Baibolo ufunjisha kuba’mba bafu kechi batwajijila kwikala bomi ne. Kechi balanguluka, kwingila nangwa kupopwela Lesa ne. Salamo 115:17 waamba’mba: “Bafu kechi batota Yehoba ne, nangwa umotu waya mwazhindama ne.”

Nanchi mipashi bimye bimo kechi ibuluñana bishinka nenyi?

“Lelo [bantu] bakepuzhe bafu amba bakwashe bominyi?”—Isaya 8:19.

BYAMBA BANTU Bamo bamba’mba bantu besamba na mipashi bakonsha kubulañana bintu byafyamika, byayukatu muntu wafwa ne balongo banji nangwa balunda nanji.

BYAMBA BAIBOLO Kitango 28 kya buku wa 1 Samwela kyaamba pa mfumu wabujile bukishinka aye Saulo, awo walajile muzhilo wa Lesa wa kuba’mba kafwako wafwainwa kwipuzha muntu wisamba na bapashi ne. Wayile ku mwanamukazhi wisambanga na bapashi. Uno mwanamukazhi wabepekezhe nobe ubena kwisamba na kalume wa Lesa wafwile kala, aye Samwela. Bino, nanchi kine wisambilenga na Samwela nyi? Ine. Kishinka ke kya kuba’mba wisambilenga na mujimbijimbi wibepekezhenga nobe ye Samwela wafwa.

Uno mujimbijimbi wajinga mupashi watama waimejilengako Satana “shanja bubela.” (Yoano 8:44) Mambo ka bapashi batama nangwa’mba bandemona o batundaikila lufunjisho lwa kuba’mba bafu batwajijila kwikala bomi? Kine kyo bakeba ke kubepela Lesa ne kulengulula Mambo anji, Baibolo.—2 Timoti 3:16.

Nanchi byo twaambapo peulu po bibena kulumbulula’mba bafwa kechi bakasangulwa nenyi? Ine. Baibolo walaya’mba kukekala lusanguko lwa bafwa baji nobe ‘balaala tulo’ mu bilende.a (Yoano 11:11-13; Byubilo 24:15) Pa kino kimye, kitutekenesha bingi kuyuka’mba batemwe betu bafwa kechi babena kumanama ne.

[Tubyambo twa mushi]