BYAMBAPO BAIBOLO

Bupopweshi

Mambo ka o kwaikela bupopweshi bwavula?

“Anweba mulengulula mikambizho ya Lesa ne kukakachila ku mizhilo ya bantu.”—Mako 7:8.

BYAMBA BAIBOLO Bantu basemwa na “muchima wa kukeba kuyuka Lesa.” (Mateo 5:3) Pa kukeba kuyuka Lesa balenga bupopweshi bwavula bingi bwaimena pa maana a bantu kukila a Lesa.

Baibolo waamba pa jibumba jimo ja bupopweshi jajingako mu myaka kitota kitanshi amba: “Baji na mukoyo wa kwingijila Lesa; bino kechi mwayila maana alumbuluka a kuyuka Lesa ne; mambo kechi bakokejile bololoke bwa Lesa ne. Byo babujile kwibuyuka, bemwesheshenga abo bene amba baoloka. Mambo nebamona namba baji na mukoyo wa kwingijila Lesa, bino kechi mwayila maana alumbuluka ne. Na mambo a kubula kuyuka bololoke bwa Lesa ne kukeba bololoke bwabo bene, kechi bakookejile bololoke bwa Lesa ne.” (Loma 10:2, 3) Ne lelo jino, kuji bupopweshi bwavula bingi ‘bufunjisha mafunjisho afumatu ku bantu.’—Mako 7:7.

Nanchi kyawama kwikalapo mu bupopweshi bumo nyi?

‘Saka twita muchima atwe bene na bene kuba amba twitundaikenga kumwesha butemwe ne kuba mingilo yawama. Kange tuleke kupwila pamo ne.’—Bahebelu 10:24, 25.

BYAMBA BAIBOLO Pa Bahebelu 10:25 paji byambo bya kuba’mba ‘kange tuleke kupwila pamo ne.’ Bino byambo bimwesha kuba’mba Lesa ukeba bantu kupwila pamo mu jibumba na kumupopwela. Nanchi mupopweshi yense wafwainwa kwikala na ndumbulwilo yanji bunke ya bishinka pe Lesa ne byo akeba kwesakana na mo ebyumvwina nyi? Ine. Baibolo waamba’mba aba bapopwela Lesa mu jishinda jo aitabizha bafwainwa ‘kwamba na jiwi jimo’ ne ‘kulamankana pamo na muchima umo ne milanguluko imo.’ (1 Kolinda 1:10) Bafwainwa kupwilanga pamo mu bipwilo ne ‘kutemwa balongo bonse’ mwaya ntanda. (1 Petelo 2:17; 1 Kolinda 11:16) Kukwatankana kwa uno mutundu kutokesha Lesa ku muchima.

Nanchi bupopweshi bwa kine bwakonsha kuyukanyikwa nyi?

“Pa kyo kino po po bakayukila bonse amba mwi baana bami ba bwanga umvwe mwitemwa anwe bene na bene.”—Yoano 13:35.

BYAMBA BAIBOLO Pa kulumbulula bya kuyuka boba banji mu bupopweshi bwa kine, Baibolo waamba’mba: “Mukebayukila ku bipangwa byabo. Nanchi bantu bapa mañanzañanza nangwa makuyu ku miba nyi?” (Mateo 7:16) Kechi mwafwainwa kwikala shayuka wa bichi pa kuba’mba muyuke lupusano luji pakachi ka kichi kya mwiba ne mukuyu ne. Kyo kimotu ne ku bupopweshi, kechi mwafwainwa kwikala shayuka wa bupopweshi pa kuba’mba muyuke lupusano luji pakachi ka bupopweshi bwa kine ne bwa bubela ne. Ñanyi bipangwa byo mwakonsha kuyukilako bupopweshi bwa kine?

• Bupopweshi bwa kine bufunjisha bukine bwa mu Mambo a Lesa, Baibolo. (Yoano 4:24; 17:17) Kechi bwaimena pa maana a bantu ne.

• Bupopweshi bwa kine bukwasha bantu kuyuka Lesa ne jizhina janji ja Yehoba.—Yoano 17:3, 6.

• Bupopweshi bwa kine bufunjisha kuba’mba Bufumu bwa Lesa bo bukapwisha makatazho a bantu, kechi makafulumende a bantu ne.—Mateo 10:7; 24:14.

• Bupopweshi bwa kine butundaika butemwe bwa kine. (Yoano 13:35) Bufunjisha bantu kunemeka mitundu ya bantu yonse, kwingijisha kimye kyabo ne bintu byabo mu kukwasha bakwabo, ne kubula kwivwanga mu makondo.—Mika 4:1-4.

• Bupopweshi bwa kine kechi buji nobe kisho nangwa mutanchi wa kubilamo bintu ne, bino bumwekela mu bwikalo bonse bwa muntu. Bapopweshi ba kine boba bintu byo bafunjisha.—Loma 2:21; 1 Yoano 3:18.

Bakamonyi ba kwa Yehoba, banembi ba uno magazini, bebikako kunemeka Lesa mu ñambilo ne mu byubilo byabo. Twimutundaika kuya ku Nzubo ya Bufumu ne kumona byo bapwila.

Inge mukeba kutana Nzubo ya Bufumu kwipi na ko mwikala ne kuyuka kimye kya kupwila, monai pa Keyala wetu wa www.jw.org/kqn. Monai panembwa’mba BAKAMONYI BA KWA YEHOBA > KUPWILA.

[Mabulañano pa peja 13]

Bupopweshi bwa kine bumwekela mu bwikalo bonse bwa muntu, kechi buji nobe kisho ne