Nanchi Baibolo Waambapo’mba Ka?

Nanchi bantu bo batendekele bupopweshi nyi?

BANTU BAMO BAITABILA amba bantu bo batendekele bupopweshi; bakwabo balanguluka’mba Lesa wingijisha bupopweshi kukwasha bantu kufwenya kwipi ne aye. Nga anweba mulangulukapo’mba ka?

BYAMBA BAIBOLO

Kuji ‘bupopweshi bwatoka kabiji bwabula kutama kwi Lesa wetu kabiji Tata.’ (Yakoba 1:27) Bupopweshi bwatoka, nangwa’mba bwa kine bufuma kwi Lesa.

ÑANYI BINTU BIKWABO BYO TWAKONSHA KUFUNDA MU BAIBOLO?

• Pa kuba’mba bupopweshi butokeshenga Lesa ku muchima, bwafwainwa kwimena pa bukine bwa mu Baibolo.—Yoano 4:23, 24.

• Bupopweshi bwaimena pa milanguluko ya bantu ke bwatutu.—Mako 7:7, 8.

Nanchi kyanema kwikala mu bupopweshi nyi?

MWAKONSHA KWAMBA’MBA KA?

• Ee

• Ine

• Kwesakana na bintu byo biji

BYAMBA BAIBOLO

“Twayai twitenga muchima atwe bene na bene kuba’mba twitundaikenga kwitemwa atwe bene na bene ne kuba mingilo yawama, kabiji kange tuleke kupwila pamo . . . ne.” (Bahebelu 10:24, 25) Lesa ukeba bapopweshi banji kupwilanga pamo.

ÑANYI BINTU BIKWABO BYO TWAKONSHA KUFUNDA MU BAIBOLO?

• Bantu bapopwela Lesa bafwainwa kukwatankana mu byo baitabilamo.—1 Kolinda 1:10, 11.

• Bantu baji mu bupopweshi bo baitabizha kwi Lesa balenga jibumba ja balongo ba ntanda yonse.—1 Petelo 2:17.