Kwesakanya Byo Mwaitabilamo Na Byaamba Baibolo

NANCHI mwitela’mba mwina bena Kilishitu nyi? Inge ibyo, ko kuba’mba muji pa bantu bavula bingi pano pa ntanda bamba’mba baana ba bwanga ba kwa Kilishitu. Lelo jino, kuji machechi avula bingi etela’mba bena Kilishitu, pano bino, bapusenamo bingi mu bintu byo baitabilamo. Onkao mambo, byo mwaitabilamo byakonsha kupusana na byaitabilamo bakwabo betela’mba bena Kilishitu. Nanchi byo mwaitabilamo byanema nyi? Ee, byanema inge mukeba kwikala bena Kilishitu balondela byaamba Baibolo.

Baana ba bwanga batanshi ba kwa Yesu Kilishitu batendekele kutelwa’mba “bena Kilishitu.” (Byubilo 11:26) Kechi kwakebewenga mazhina akwabo a kwibayukilako ne, mambo bo bonka bena Kilishitu bajingako. Bena Kilishitu balondelanga mafunjisho ne mikambizho ya mwine watendekele bwina Kilishitu aye Yesu Kilishitu. Nga chechi wenu kiji byepi? Nanchi mwaitabila’mba chechi wenu ufunjisha byafunjishanga Kilishitu ne byaitabijile baana ba bwanga ba kwa Kilishitu batanshi nyi? Mwakonsha kushiinwa byepi? Kujitu jishinda jimo jo mwakonsha kwingijisha, ko kuba’mba Baibolo.

Akilangulukai pa kino: Yesu Kilishitu wanemekele bingi Binembelo amba Mambo a Lesa. Kechi waswishishe bantu balengululanga mafunjisho a mu Baibolo ne kuswishako bisho bya bantu ne. (Mako 7:9-13) Onkao mambo, twakonsha kwamba’mba baana ba bwanga ba kwa Yesu ba kine, mafunjisho abo afwainwa kwimena pa Baibolo. Mwina Kilishitu yense wafwainwa kwishikisha’mba, ‘Nanchi mafunjisho a mu chechi yami aswañana na byamba Baibolo nyi?’ Pa kuba’mba mukumbule buno bwipuzho, mwafwainwa kwesakanya bifunjisha chechi wenu na byamba Baibolo.

Yesu waambile’mba twafwainwa kupopwelanga Lesa mu bukine, kabiji buno bukine butanwa mu Baibolo. (Yoano 4:24; 17:17) Kabiji mutumwa Paulo waambile’mba lupulukilo lwetu lwaimena pa “kuyukisha bulongo bukine.” (1 Timoti 2:4) Onkao mambo, kyanema bingi kuba’mba byo twaitabilamo byaimena pa bukine bwa mu Baibolo. Mambo ka? Mambo bumi bwetu buji mu kizumba.

KWESAKANYA BYO TWAITABILAMO NA BYAMBA BAIBOLO

Twimutundaika kutanga mepuzho aji mu kino kibaaba ne kumona mikumbu ya mu Baibolo. Tangai binembelo byo bamwesha ne kulangulukapo pa mikumbu. Ishikishai amba, ‘Nanchi mafunjisho a mu chechi yami akwatankana na byamba Baibolo nyi?’

Ano mepuzho akonsha kwimukwasha kumona inge chechi wenu wakwatankana na byaamba Baibolo. Nanchi mwakonsha kwesakanya mafunjisho akwabo a chechi wenu na byaamba Baibolo nyi? Bakamonyi ba kwa Yehoba bakatemwa kwimukwasha kumvwisha bukine bwa mu Baibolo. Inge mukeba kufunda Baibolo kyatutu, mwakonsha kubuula Kamonyi wa kwa Yehoba. Nangwa mwakonsha kuya pa keyala wetu wa jw.org/kqn

1 BWIPUZHO: Lesa ye ñanyi?

MUKUMBU: Yehoba Shanji Yesu, ye Lesa wa myaka ne myaka kabiji ye Mulenga wa bilengwa byonse.

BYAMBA BAIBOLO:

“Kimye kyonse tumusanchila Lesa, Shanji Nkambo yetu Yesu Kilishitu, pa kwimulombelako.”—Kolose 1:3.

“Anweba Yehoba Lesa wetu, mwafwainwa kutambula lukumo ne buneme ne bulume, mambo yenu mwalengele bintu byonse.”—Lumwekesho 4:11.

Monai ne Loma 10:13; 1 Timoti 1:17.

2 BWIPUZHO: Yesu Kilishitu ye ñanyi?

MUKUMBU: Yesu ye Mwana Lesa mubeji. Yesu walengelwe, onkao mambo, uji na ntendekelo. Yesu ukookela Lesa ne kuba kyaswa muchima wanji.

BYAMBA BAIBOLO:

“Batata bankila.”—Yoano 14:28.

“[Yesu] ye kipasha kya Lesa ubula kumweka, mubeji wa bilengwa byonse.”—Kolose 1:15.

Monai ne Mateo 26:39; 1 Kolinda 15:28.

3 BWIPUZHO: Mupashi wazhila ye muka?

MUKUMBU: Mupashi wazhila ke bulume Lesa bo engijisha pa kuba kyaswa muchima wanji. Kechi muntu ne. Bantu bakonsha kuyula na mupashi wazhila ne kwikala na bulume.

BYAMBA BAIBOLO:

“Elisabeta byo bamwimwine kwi Maliya, mwana wafunkile munda, kabiji Elisabeta wayujile na mupashi wazhila.”—Luka 1:41.

“Mukatambula bulume kimye mupashi wazhila kyo akemwikijila.”—Byubilo 1:8.

Monai ne Ntendekelo 1:2; Byubilo 2:1-4; 10:38.

4 BWIPUZHO: Bufumu bwa Lesa bo buka?

MUKUMBU: Bufumu bwa Lesa ke kafulumende wa mwiulu. Yesu ye Mfumu wa Bufumu bwa Lesa. Katatakatu buno Bufumu bukalengele kyaswa muchima wa Lesa kubiwa pano pa ntanda.

BYAMBA BAIBOLO:

“Malaika wa butanu na bubiji wavuminye ntolompita yanji. Kabiji kwaumvwanyikile mawi mwiulu saka amba’mba: ‘Bufumu bwa pa ntanda bwaaluka ke Bufumu bwa Nkambo yetu ne bwa Kilishitu wanji, kabiji aye ukekala mfumu myaka ne myaka.’”—Lumwekesho 11:15.

Monai ne Danyela 2:44; Mateo 6:9, 10.

5 BWIPUZHO: Nanchi bantu bonse bawama baya mwiulu nyi?

MUKUMBU: Ine. Kajibumba kachechetu ka bantu ba kishinka katelwa’mba “kajitanga kacheche,” Lesa bo bo asala kuya mwiulu. Bakekala bamfumu bakalamanga bantu pamo ne Yesu.

BYAMBA BAIBOLO:

“Kwakamwa ne, anweba kajitanga kacheche, mambo Shenu wimutongwela kwimupa Bufumu.”—Luka 12:32.

“Bakekala bañanga ba Lesa ne ba kwa Kilishitu kabiji bakekala bamfumu ne kulama pamo ne aye.”—Lumwekesho 20:6.

Monai ne Lumwekesho 14:1, 3.

6 BWIPUZHO: Kyaswa muchima wa Lesa pa ntanda ne ku bantu kyo ki ka?

MUKUMBU: Mu bukalama bwa Bufumu bwa Lesa, ntanda ikekala paladisa kabiji bantu ba kishinka bakeyowa butuntulu bwa mubiji bwawama, mutende ne bumi bwa myaka ne myaka.

BYAMBA BAIBOLO:

“Bakimote bakaswana ntanda, kabiji bakasangalelanga mu kuvula kwa mutende.”—Salamo 37:10, 11.

“Ukashimuna mipolo yonse ku meso abo, ne lufu, mabingo, kujila ne misongo kechi bikekalako jibiji ne. Bintu bya kala byapichijila.”—Lumwekesho 21:3, 4.

Monai ne Salamo 37:29; 2 Petelo 3:13.