Mafunde A Myaka Ne Myaka Akwasha Bantu Bonse​—Butemwe

JIFUNDE JA MU BAIBOLO: “Vwalai butemwe, mambo butemwe bukwatankanya bantu bulongo.”—Kolose 3:14.

BYAWAMA BIFUMAMO: Butemwe bwatongolwa bimye byavula mu Baibolo kechi bwa kwifwalama ne. Buno butemwe ke bobwa bwaimena pa mafunde kabiji bumwekela mu byubilo nabiji lusa, kulekela bantu mambo, kwipelula, bukishinka, kifyele, kukooka muchima, ne butekanye. (Mika 6:8; Kolose 3:12, 13) Kupusanako na butemwe bwa kwifwalama bubula kutwajijila javula, butemwe bwaimena pa mafunde kechi bupwa ne.

Brenda, waikala mu masongola myaka 30 waambile’mba: “Butemwe bwikala na bantu umvwe babanda mu masongola bwabaya bingi kukila bo betemwa inge popo batwelatu mu masongola.”

Sam, mwanamulume waikala mu masongola kukila pa myaka 12 waambile’mba: “Amiwa ne mwinakwami twikala bingi na lusekelo, kimo kimye ne kukumya pa kumona mafunde a mu Baibolo byo etukwasha, kabiji kechi akatazha kulondela ne. Umvwe twiengijisha, bintu byenda bingi bulongo. Pano bino, nangwa kya kuba nebikako kukeba kulondela ano mafunde, bimye bimo nkankalwa. Kino kimweka inge nazhingila, nangwa nataatu muchima pa byo natemwa, nangwa inge nakooka. Mu bimye bya uno mutundu, ndomba Yehoba kunkwasha kufumyamo milanguluko yabula kufwainwa. Apa bino napakachilamo mwinakwami, kabiji mu kimyetu kicheche, kimwekatu nobe kafwako ne kyatama kyaji kumweka ne.”

Yesu Kilishitu waambile’mba maana amwekela mu “bintu bifumamo.” (Mateo 11:19; byambo bya munshi) Kya kine, mu Baibolo muji maana alumbuluka. Mafunjisho ajimo anema bingi kabiji engila. Ano mafunde a myaka ne myaka. Baibolo ukwashatu bantu bonse. Kabiji maana ajimo alengela bantu kuyuka kuba’mba uno buku wafumine ku uji na maana a kila a bantu, aye Mulenga wetu, Yehoba Lesa. Pano bino, kishiino kine kimwesha bukine bwa bino byambo ke byo twiengijisha. Onkao mambo, Baibolo witutundaika ‘kutompa Yehoba ne kumona byo awama.’ (Salamo 34:8) Nanchi musakumutompa nyi?