Baibolo Waambapo’mba ka pa Kupopwela Mipashi?

BANTU bavula kechi bayuka kana kijitu bulongo kuba bingelekezha ne kwibitamba mu mafilimu ne. Bino Baibolo waambapo byapusanako. Wajimunako bantu pa mipashi. Pa Mpitulukilo ya mu Mizhilo 18:10-13, paamba’mba: “Mwi anweba kechi mukatanwe muntu . . . uponga, nangwa ñanga wa bisoko nangwa muntu yense uba bya lubuko nangwa mulozhi ne. Kabiji kechi mukatanwe muntu uta bakwabo bwanga nangwa wipuzha muntu wisamba na mipashi nangwa wamba bikamweka kulutwe nangwa wisamba na bafu ne.” Mambo ka o kyatamina kuba bino? Kinembelo kyatwajijila kwamba’mba: “Mambo muntu yense uba bino bintu ye wa bunya kwi Yehoba . . . Anweba mwafwainwa kwikala babula mambo kwi Yehoba Lesa wenu.”

Mambo ka Baibolo o yakainya bantu kupopwela mipashi?

BANTU BYO BATENDEKELE KUPOPWELA MIPASHI

Baibolo waamba’mba, Lesa saka akyangye kulenga ntanda, walengele bamalaika bavula bingi. (Yoba 38:4, 7; Lumwekesho 5:11) Bano bamalaika bonse wibapele luusa lwa kwifuukwila kuba bintu byawama nangwa byatama. Bamalaika bamo bafuukwilepo kusatukila Lesa, kabiji bashile bifulo byabo mwiulu ne kwiya pano pa ntanda na kuba bintu byatama. Kino kyalengejile ‘bukapondo kuyula’ pano pa ntanda ponse.—Ntendekelo 6:2-5, 11; Yuda 6.

Baibolo waamba’mba, bano bamalaika batama baubilenga bintu byatama bingi, kabiji balengejile bantu bavula nabo kutendeka kuba byatama. (Lumwekesho 12:9) Balengejile ne bantu kubuula kuketekela bintu bya kulutwe.—1 Samwela 28:5, 7; 1 Timoti 4:1.

Ibyo kuba’mba bimye bimo bandemona bamweka nobe bakwasha bantu. (2 Kolinda 11:14) Pano bino, bamalaika batama babena kupofula michima ya bantu pa kuba’mba babule kwitabila mambo a Lesa.—2 Kolinda 4:4.

Kwesakana na byaamba Baibolo, kupopwela mipashi kwatama bingi. O ene mambo baana ba bwanga ba kwa Yesu byo bafunjile bukine, bonse “baubanga bya buñanga bakonkenye pamo mabuku abo ne kwiasoka” nangwa kya kuba ano mabuku beapotele na mali avula.—Byubilo 19:19.

Byonkatu byaubile bano baana ba bwanga, ne bavula mu ano moba bafuukulapo kubuula kuba bintu nangwa kukaya makayo atundaika kupopwela mipashi. Ba Mariaa byo bajinga na myaka 12, baambanga bintu byamwekanga kulutwe. Baingijishanga bikachi kubuula baana ba sukulu bakwabo bikamweka. Na mambo a kuba’mba byo baambanga byamwekanga, kibalengejile kutemwa bingi bya mipashi.

Ba Maria bamonanga nobe Lesa ye wibakwashanga kwamba pa bikamwekela bantu. Kabiji baambile ne kuba’mba: “Nalangulukangapo bingi. Naingijishanga bino bikachi kubuula bantu bikebamwekela. Pano bino nakankalwanga kwingijisha bino bikachi kuyuka bikammwekela kulutwe.”

Ba Maria baambile’mba, bajinga na mepuzho avula o babuujile kutaana mikumbu, pano bino balombele kwi Lesa. Mukuya kwa kimye, Bakamonyi ba kwa Yehoba bebafwakashijile kabiji batendekele kufunda Baibolo. Ba Maria bafunjile mu Baibolo kuba’mba bulume bo baingijishanga kwamba bintu bikamweka kulutwe kechi bwafumanga kwi Lesa ne. Kabiji bafunjile ne kuba’mba, bonse bakeba Lesa kwikala mulunda nabo, bafwainwa kuleka kupopwela mipashi. (1 Kolinda 10:21) Ñanyi bintu byafuminemo? Ba Maria batayile bikachi ne mabuku o baingijishanga kubuula bantu bikebamwekela kulutwe. Pano luno, babulako bantu bukine bwa mu Baibolo bo bafunda.

Ba Michael byo bakijinga banyike, batemenwe bingi kutanga mabuku aamba pa mipashi. Baambile’mba: “Naumvwanga bingi bulongo kutanga pa bantu bayile bingi nkuwa saka bakijitu banyike bafwanyikizha bintu mu ntanda.” Natendekele kutemwa pachepache kutanga ano mabuku aamba pa bya mipashi ne bandemona. Kabiji baambile ne kuba’mba, “Na mambo a kukebesha kuyuka bino bintu, kyandengejile kutendeka kutanga ano mabuku ne kutamba mafilimu muji bya mipashi.”

Nangwa byonkabyo, byo bafunjilenga mu Baibolo, byalengejile ba Michael kulangulukapo bingi pa byo batanganga. Baambile’mba: “Nanembele bintu byonse byakwatankana na kupopwela mipashi kabiji nalekele kwibingijisha. Nafunjile bintu byanema bingi. Pa 1 Kolinda 10:31, paamba’mba: ‘Bintu byonse saka mwibyubila lukumo lwa Lesa.’ Pano luno bwipuzho bo neipuzha umvwe mbena kutangapo bintu bimo ke bwa kuba’mba, ‘Nanchi byo mbena kutanga bibena kuletela Lesa lukumo nyi?’ Inge kechi bibena kumuletela lukumo ne, ndeka kwibitanga.”

Baibolo beifwanyikizha ku lampi. Mu Baibolo mo monkatu mo baambapo pa mipashi ne byo iji. (Salamo 119:105) Kabiji waambapo ne pa bintu byavula bingi. Waamba ne pa mulaye wa ntanda mukabula mipashi yatama, bantu mo bakekala bingi bulongo. Pa Salamo 37:10, 11 paamba’mba: “Kwashalatu pacheche, babi kechi bakekalako ne; Ukatajisha po baikalanga, Kabiji kechi bakekalapo ne. Pakuba bakimote bakaswana ntanda, Kabiji bakasangalelanga mu kuvula kwa mutende.”