BYO MWAFWAINWA KUBA NA BIJIKILA

Bijikila Biya Byepi?

Bijikila biya inge kwamweka bintu bimo byakatazha. Bongo bulengela muntu kutendeka kupemashika, BP kukanjila, mapwapwa kubaya nangwa kukepa ne misunyi ku mubiji kukosakana. Kwa kubula nangwa kuyukatu ne, mubiji wenu winengezha pa kuba’mba emuzhikijile. Inge bintu bimulengela kwikala na bijikila byapwa, mubiji wenu ubwela byonka byo ajinga.

BIJIKILA BYAWAMA NE BYATAMA

Bijikila bitulengela kuyuka bya kuba na makatazho ne kwizhikijila ku bizumba. Kino kitendekela mu bongo. Bijikila byawama bitukwasha kubapo kimo bukiji inge kwamweka kintu pa kuba’mba twizhikijile. Kabiji bijikila bimo byakonsha kwimukwasha kufikizha bikonkwanyi byenu nangwa kuba bulongo nabiji pa kunemba mpeso, kwinengezha kukumbula mepuzho pa kutwela nkito nangwa kuya na kukaya.

Nangwa byonkabyo, kutwajijila kwikala na bijikila mwakonsha kufuma bintu byatama bingi. Mwakonsha kutendeka kumvwa kukooka, kuzhingilazhingila, kwikala na bulanda, kavulamya, kubula kulanguluka bulongo nangwa kwipanyika pa kuba bintu. Byubilo byenu nabyo byakonsha kupimpulwa ne byo muba na balunda nenu. Kutwajijila kwikala na bijikila kulengela bantu bamo kutomanga maalwa, kwingijisha michi ipendañana, kupepa fwanka ne mashindatu akwabo atama pa kuba’mba bapwishe bijikila. Ne kyakonsha kufumamo ke kupopomenwa ne kukeba kwiipaya.

Bijikila byetu byakonsha kupusana na bya bakwetu. Pano bino, kukizhamo kwikala na bijikila mufuma bikola byavula bingi. Kabiji mubiji yense wakonsha kwikala mu lukatazho.

ENE MAMBO O KYATAMINA KWIKALA NA BIJIKILA

Mishipeshipe ya mashi.

Mishipeshipe ya mashi ifumya maselo apusana pusana etukwasha mu mubiji. Ano maselo alengela muchima kudukauka lubilo, kwikala na BP, ne shuka wafwainwa mu mubiji. Abino byonse bitukwasha kwizhikijila bukiji ku bizumba. Pano bino kukizhamo kwikala na bijikila kulengela

kuzhingila bukiji, kwakamwa, kupopomenwa, mutwe kukola ne kwikala na kilabila

Mubiji wa muntu.

Misunyi ikosakana pa kuba’mba izhikijile mubiji wetu. Bino kukizhamo kwikala na bijikila kulengela

mubiji kukola, mutwe kukola ne mabinjila

Kupema.

Tupema pa kuba’mba tutwezhe mwela. Bino kukizhamo kwikala na bijikila kulengela

kupemashika nangwa kukankalwa kupema bulongo, ne kubambisha muchima

Bingila muchima.

Muchima udukauka lubilo ne kwingila bingi na ngovu pa kuba’mba mashi aye mu mubiji yense. Mikotakota ya mashi isaakuka nangwa kufinankana pa kuba’mba itwale kubena kukebewa mashi mu mubiji nabiji mu misunyi. Kukizhamo kwikala na bijikila kulengela

BP kukanjila, kikola kya muchima ne kalepu

Bibese bikwabo bya mu mubiji

Kuji bibese bikwabo bya mu mubiji bilenga maselo avula bingi etukwasha kuyuka bya kuba na bijikila. Machima etukwasha kwikala na shuka mu mubiji witupa bulume. Kukizhamo kwikala na bijikila kulengela

mubiji kubaya, maselo etuzhikijila ku bikola kukooka, kukolwakolwa, kuzhingilazhingila ne kukizhamo kwikala na kinemenezhi

Kukaaya kajo mu mubiji.

Kajo kaleka kwingila bulongo mu mubiji wenu. Kukizhamo kwikala na bijikila kulengela

kulevuma ku muchima, kulasa, kupolomya ne kukatazha kupambuka

Bibese bya lusemo.

Bijikila bilengela kwikala na kilaka kya kwilaala ne bibese bya lusemo kwingila bulongo. Kukizhamo kwikala na bijikila kulengela

bibese bya lusemo kufwa ne kubula kuya ku mwenzhi