Umvwinainga Bantu Lusa

Kilengela Kubula Kumvwina Bantu Lusa

Inge twatatu muchima pa kulengulula bakwetu, tukamonangamotu byatama mwi abo. Kuba bino kuketulengela kwikala na misalululo. Kabiji inge twaikala na misalululo, kiketukazha kwibomvwina lusa.

Mafunde a mu Baibolo Akonsha Kwitukwasha

“Sekelainga pamo na boba basekela; jijilainga pamo na boba bajila.”—LOMA 12:15.

Kino kinembelo kibena kulumbulula ka? Kino kinembelo kibena kulumbulula’mba twafwainwa kumvwinanga bakwetu lusa. Lusa lulengela muntu kufwanyikizha nobe naye ubena kupita mu bintu byamwekela mukwabo.

Lusa Lwitukwasha Kushinda Misalululo

Inge twaubila muntu lusa kiketukwasha kuyuka’mba tujitu pamo nanji. Tuyuka’mba byonkatu byo tumvwa inge betwambila bintu byatama ne aye byo byo akonsha kumvwa. Lusa lwitulengela kumona bantu bonse amba bajitu pamo nangwa kya kuba bamba milaka yapusana pusana kabiji bafuma mu byalo byapusana pusana. Inge ke tulanguluke’mba tujitu pamo na bakwetu, kechi tukebalangulukilanga byatama ne.

Lusa luketulengela kunemeka bakwetu. Ba Anne-Marie bekala ku kyalo kya Senegal balengululanga bingi bantu bo bamonanga mu kino kyalo amba ba panshi. Balumbulwile lusa byo lwibakwashishe. Baambile’mba: “Byo namonanga bano bantu na kuyanda, nalangulukile byo nakonsheshe kumvwa inge yami napichilenga mu ano makatazho. Kino kyamvulwilemo kuba’mba kechi nanema kukila bano bantu ne. Kabiji kechi nanema kwibakila pa kuba’mba nebalengulula ne.” Kwambatu kine, inge twayuka bintu bibena kupitamo bakwetu kechi tukebalengululanga ne, bino tukebobilanga lusa.

Byo Mwafwainwa Kuba

Inge kemumone bakwenu amba bapanshi, esekai kumonapo mashinda mo mwaesakena nabo. Nabiji kufwanyakizha byo bomvwa

Lusa lwitulengela kumona bantu bonse amba ba mu kisemi kimo

inge babena kujiila pamo na bisemi byabo
inge bapwisha kwingila mingilo yakosa
inge babena kupwanañana pamo na balunda nabo
inge babena kuteleka ku nyimbo yo batemwa

Kikwabo kyo mwafwainwa kuba ke kufwanyikizha’mba yenu balengulula. Iipuzhai amba:

‘Nakonsha kumvwa byepi inge bakwetu bandengulula?’
‘Nakonsha kumvwa byepi inge bantu ke bambe byatama pe amiwa saka babula ne kungyuka bulongo?’
‘Inge najinga pa bantu bo bamona’mba bapanshi, nanchi nakonsha kumvwa bulongo bakwetu kundengulula nyi?’

Banabalume babiji bafuma ku byalo byapusana baikala pamo babena kwisamba pa bintu bimo mo bepashisha nabiji bisemi, makayo o batemwa, ne mingilo yo bengila.

Kyamwekele: Ba Robert (Ba ku Kyalo kya Singapore)

“Kala nalangulukanga’mba bantu bashinka matwi ke bantu babula kufunda, bazhingila bingi bukiji kabiji kechi bangikazhi ba mu kino kyalo ne. Kino kyandengelanga kubula kupwanañana nabo. Bino kechi nayukile’mba ino yajinga misalululo nangwa kya kuba kechi kyakozhangapo muntu uji yense ku muchima ne.

“Kumvwina lusa bantu bashinka matwi kwankwashishe kushinda misalululo. Nalangulukanga’mba bano bantu kafwako kyo bayuka ne, mambo inge nauba’mba nesambe nabo bantalangatu. Onkao mambo, natendekele kufwanyikizha muntu ubena kuñambila, bino kechi mbena kumvwa byo abena kwamba ne. Kishinka ke kya kuba’mba nakonsha kumutalangatu! Nangwa kya kuba ñumvwa pa meso pakonsha kumwesha’mba, nakankalwa kumvwa byo abena kwamba, ko kuba’mba mbena kukabakanatu kumvwa.

“Byo nafwanyikizhenga kwikala muntu washinka matwi, misalululo yo najinga nayo yapwile.”