Yukai Bishinka

Kilengela Misalululo

Kilengela misalululo ke kubula kuyuka bishinka. Akimonai bishinka byalondelapo:

Bakulumpe ba nkito bamo balanguluka’mba, banabakazhi kechi bakonsha kwingila mingilo ingilapo banabalume ne.
Mu Europe, Bayudea bebalangulukilanga’mba babika bulembe mu mishima ne kulengela bantu bakwabo kukolwa. Ne mu kimye kya bukalama bwa Nazi, bebabepejile kuba’mba baletele buyanji mu Germany. Bino byonse byalengejile bantu kushikwa Bayudea kufika ne lelo jino.
Bantu bavula balanguluka’mba, bantu balemana baji bingi na bulanda kabiji bazhingila bukiji.

Ino ndangulukilo ilengela bano bantu kulangulukila bakwabo byatama. Kabiji balanguluka’mba aba bonse babula kuswisha ino milanguluko kafwako kyo bayuka ne.

Mafunde a mu Baibolo Akonsha Kwimukwasha

“Muntu wabula maana a kuyuka bintu kechi wawama ne.”—BYAMBO BYA MAANA 19:2.

Kino kinembelo kibena kulumbulula ka? Inge twabula kuyuka bishinka twakonsha kukankalwa kufuukulapo bulongo. Inge twalondela byaamba bantu, tukekala na misalululo.

Yukai Bishinka

Inge twayuka bishinka, kiketukwasha kubula kulondela byatama byamba bantu pa bantu bamo. Inge twayuka’mba bintu byo betubuula pa bantu bamo bya bubela, kechi tukafikenatu kuswa ne.

Kyamwekele: Ba Jovica (Ba ku Kyalo kya Balkans)

Ba Jovica bo twaji kwambapo kutendekelo, byo bakomenenga, baumvwanga bantu bekala mu kyalo kyabo saka baamba byatama pa bantu bamo. Kabiji baumvwanga bino pa masawakya ne pa TV. Baambile’mba “Kino kyandengejile kwikala bingi na misalululo ne kushikwa bano bantu, namonanga nobe kijitu bulongo kulanguluka bino.

“Nangwa byonkabyo, byo natwelele bushilikale natendekele kwingila na bonka bano bantu. Pa kupitapo kimye ne bayukile bulongo kabiji natendekele ne kufunda mulaka wabo ne nyimbo yabo. Natendekele kumvwa bulongo kwikala pamo nabo kabiji ne batemenwe bingi. Byo nayukile’mba kyubilo kya misalululo kyakonsha kubwelamo jikwabo, nalekele kuteleka ku masawakya amba byatama pa bano bantu. Kabiji nalekele ne kutamba mafilimu mo bamwesha bantu bendeleka uno mulaka ne kwamba byatama pa bano bantu. Nayukile’mba misalululo ilengela kushikwa bantu.”

Byo Mwafwainwa Kuba

Bantu bamo bakonsha kwimubuula’mba bantu bamba mulaka umo kechi bawama ne. Bino mwafwainwa kuvuluka’mba kechi bantu bonse baamba yewo mulaka batama ne.
Yukai’mba kechi mwakonsha kuyuka bishinka byonse pa bantu ne.
Yukai bishinka.