Ikalai Na Balunda Bapusana Pusana

Kilengela Kubula Kwikala na Balunda Bapusana Pusana

Inge ke tubule kupwanañana na bantu ba mu bisho bikwabo, ko kuba’mba misalululo kechi ikapwa ne. Kabiji inge ke tukebetu bantu baji byonka byo tuji kwikala balunda netu, tukamonanga nobe milanguluko yetu ne byubilo byetu byanema kukila bya bakwetu.

Mafunde a mu Baibolo Akonsha Kwitukwasha

“Shinkwishai michima yenu.”—2 KOLINDA 6:13.

Kino kinembelo kibena kulumbulula ka? “Muchima” ulumbulula bintu byo tulangulukapo ne byo twatemwa. Inge twatemwatu bantu baji byonka byo tuji, muchima wetu ukashinka. Pa kuba’mba tushinkwishe michima yetu twafwainwa kwikala na balunda bapusana pusana.

Kwikala na Balunda Bapusana Pusana Kukwasha

Inge twayuka bulongo bantu bapusana pusana, tukayuka ene mambo o bobila bintu bimo. Inge baikala balunda netu, kechi tukamonanga’mba twapusana nabo ne. Kabiji tukebanemeka bingi, tukasekelanga pamo nabo ne kumanamina pamo nabo.

Akimonai byaubile ba Nazare. Kechi bakebanga bantu bafuma ku byalo bikwabo ne. Balumbulwile kibakwashishe. Baambile’mba: “Napwanañananga nabo ne kwingijila pamo nabo. Bano bantu bawamine bingi muchima, byapusene bingi na byaambanga bantu pe abo. Inge mwaikala balunda na bantu ba mu bisho byapusana pusana, kechi mukatangako muchima ku byubilo byabo nangwa byaamba bantu pe abo ne, kabiji mukebatemwa ne kwibanemeka bingi.”

Byo Mwafwainwa Kuba

Ikalaingapo na kimye kya kwisamba na bantu bafuma ku byalo bikwabo, ba mu bisho byapusana pusana nangwa bamba mulaka wapusana na wenu. Mwafwainwa

Kwibambila kwimubuulapo bimo pe abo.
Kwibetako ku nzubo kwenu na kujila pamo kajo.
Kutako muchima inge babena kwimushimikizhapo bintu bimo pa kuba’mba muyuke bintu byo banemeka.

Inge mwayuka mwapita bwikalo bwabo, mukayuka kisho kyabo byo kiji. Kabiji kino kikemulengela kutemwa bano bantu.

Kyamwekele: Ba Kandasamy ne Ba Sookammah (Ba ku Kyalo kya Canada)

“Twakomejile mu kyalo kya South Africa kimye kyo kwajinga misalululo. Kechi baswishishe bazungu ne bantu bafika kwikala mu mpunzha imo ne, kino kyalengejile bantu kwikala bingi na misalululo. Twibafita, onkao mambo, twashikilwe bingi bazungu mambo bamo betumonanga nobe kechi twanema ne. Pa kyo kya kimye kechi twayukile’mba ne atweba twaubilenga misalululo ne. Bino twalangulukanga’mba abo bo baji na misalululo kechi atweba ne.

“Pa kuba’mba tufumyemo misalululo mu michima yetu, twatatwile kupwanañana na bantu bapusana pusana. Byo twatatwile kupwanañana na bazungu, twataine kuba’mba twapusanatu nabo mu bintu bicheche. Bonse tuba bintu bimo ne kupita mu makatazho o bapitamo.

“Twatambwijile bamulume ne mukazhi bazungu ku nzubo yetu kabiji baikeleko moba avula. Popo twibayukile bulongo byo baji. Kechi pabanjile ne, baikele balunda netu kabiji twatendekele kumona’mba kechi twapusana nabo ne. Kyafumamo, tumona bazungu bonse amba baji na byubilo byawama.”