Bitufunjisha Yehoba Bitukwasha Kwikala Bulongo

Lesa Ukafumyapo Bantu Batama

“Babi byo bamena nobe nseku ne bonse boba byatama byo bavula, kikala bino kuba’mba bakonaike myaka ne myaka.”—SALAMO 92:7.

Byonkatu byo twafunjile mu mutwe wafumako, tubena kwimwena bintu byo byatwajijilatu na kutaminako. Kechi twafwainwa kwakamwa pa kumona bino bintu ne. Atweba kechi twakamwa ne, mambo Baibolo waambijile jimo pa 2 Timoti 3:1-5 kuba’mba mu “moba a kupelako” bantu bakakilamo kuba bintu byatama bingi. Nanchi tulumbulula ka byo twamba’mba “moba a kupelako”? Tulumbulula moba a kupelako a bantu babula kukookela Lesa. Katatakatu Lesa akonaune bantu bonse bakana kupimpula byubilo byabo byatama. Pakuba pano pa ntanda pakashalatu bantu bonka bakookela Lesa kwapwa. Baibolo waamba’mba: “Baoloka bakaswana ntanda, kabiji bakekalangamo myaka ne myaka.”—Salamo 37:29.

Lesa Ukonauna Satana

“Katatakatu, Lesa upana mutende akachakakanye Satana.”—LOMA 16:20.

Inge Satana, bandemona ne bantu bonse boba byatama bebafumyapo, pano pa ntanda ponse pakekala mutende. Mulenga wetu witulaya’mba: “Kafwako nangwa umo [ukemulengeshanga] moyo ne.”—Mika 4:4.

Lesa Ukafumyapo Bikola ne Lufu

“Tente wa Lesa uji na bantu . . . Kabiji ukashimuna mipolo yonse ku meso abo, ne lufu, mabingo, kujila ne misongo kechi bikekalako jibiji ne.”—LUMWEKESHO 21:3, 4.

Buyanji ne bikola byonse bikapwa, mambo Lesa ukafumyapo bintu byonse bituletela Satana, Adama, Evwa ne bundengamambo bwetu. Kikapelako ‘lufu kechi lukekalako jibiji ne.’ Bantu batemwa Mulenga wetu ne kumukookela bakekala na bumi bwa myaka ne myaka. Pano kwepi ko bakekalanga?

Mulenga Wetu Ukalula ino Ntanda Kwikala Paladisa

“Bisanzangala ne ntanda yauma bikasangalala, ne kiselebwa kikasekela ne kwikala na maluba avula.”—ISAYA 35:1.

Lesa byo akafumyapo bubi bonse pano pa ntanda, ino ntanda yonse ikekala ke paladisa. Mukekala bichi ne nsono yawama ne mashamba awama bingi. Kabiji pano pa ntanda pakekala kajo kavula bingi. (Salamo 72:16) Mema a mu tulunga, pa bizhiba ne mu mikola akawama bingi kabiji mukavula bintu bipeema. Kabiji bantu kechi bakavulukapo’mba ino ntanda yatamine ne! Bantu bakeshimikila mazubo abo ne kwikalamo abo bene. Bantu bonse bakekala mu ntanda ipya bakekala na mazubo abo, bakekala na kajo kabiji kechi mukekalapo jibiji muyanji ne.—Isaya 65:21, 22.

Lesa Ukasangula Bantu Bafwa

“Kukekala lusanguko.”—BYUBILO 24:15.

Nanchi mubena kukebesha kumona balongo benu ne balunda nenu bafwa nyi? Lesa wa Bulume Bonse ukebasangula kabiji bakekalanga ponka pano pa ntanda mu paladisa. Inge basanguka mukebayuka kabiji nabo bakemuyuka. Fwanyikizhai anweba ne abo byo mukekala na lusekelo kumonañana jibiji! Mambo ka o twaswila’mba kino kikobiwa? Mambo Baibolo waambapo pa bakulumpe ne banyike bo basangwile ne kukwatankana jibiji na bisemi byabo. Kabiji Yesu naye wasangwile bafwa ne bantu bavula saka batalako.—Luka 8:49-56; Yoano 11:11-14, 38-44.