Kakongolo Katanshi

NANCHI wayuka kintu kitanshi kyaubile Nowa byo alupukile pamo na kisemi kyanji mu bwato nyi? Walambwile mulambo nangwa’mba bupe kwi Lesa. Mona byo abena kuba pa kikye kipikichala. Nowa wapaine uno mulambo wa banyama amba asanchile Lesa pa byo apulushishe kisemi kyanji ku muyulo mukatampe.

Abya walanguluka’mba Yehoba watokeshiwe ku muchima na yewa mulambo nyi? Ee. Onkao mambo, walayañene na Nowa amba kechi ukonauna ntanda na muyulo jibiji ne.

Palutwe kacheche pa mushiji ponse paumine, kabiji Nowa ne kisemi kyanji byo balupukile mu bwato batatwile bwikalo bungi. Lesa wibapesheshe ne kwibambila’mba: ‘Semainga ne kusemununa, muvule, mukumbane panopantanda.’

Bino palutwe kacheche, Lesa waubilepo kimo kuchina’mba bantu bakoba moyo amba kwendapo muyulo waubiwa jibiji byo bakomvwa mambo a muyulo mukatampe. Wapaine kayukilo ka kuvululako bantu mulaye wanji wa kuba’mba kechi ukonauna jibiji ntanda na muyulo ne. Nanchi wikayuka kayukilo ko apaine nyi? Kajinga kakongolo.

Kakongolo javula kamwekana mwiulu umvwe juba jasama panyuma ya kuba mvula wachibika. Tukongolo twakonsha kwikala na misombelo yavula yawama bingi. Nanchi wamonapo kala kakongolo nyi? Wikamona ake kaji pa kipikichala nyi?

Bino byo byaambile Lesa amba: ‘Naikajika lulayañano namba bantu bonse ne banyama kechi bakonaunwa jibiji na muyulo ne. Nabika kakongolo kami mu makumbi. Kabiji kakongolo byo kakekala mu makumbi amiwa nkekatala ne kuvuluka luno lulayañano lwami.’

Onkao mambo umvwe wamona kakongolo, kafwainwa kukuvululamo ka? Ee, kafwainwa kukuvululamo mulaye wa Lesa kuba’mba kechi ukonauna jibiji ntanda na muyulo mukatampe ne.