Abalahama Mulunda na Lesa

MPUNZHA imo kwayile na kwikala bantu panyuma ya Muyulo ke muzhi wa Ula. Uno waikele muzhi mukatampe wajinga na mazubo amo awamine bingi. Bino bantu mu yoya mpunzha bapopwelanga balesa ba bubela. Aba bajinga mu Babela nabo byo byo baubilenga. Bantu ba mu Ula ne mu Babela kechi baingijilanga Yehoba byonka byajinga Nowa ne mwananji Shema ne.

Byo papichile myaka 350 kufuma paubiwe muyulo, Nowa muntu wa kishinka wafwile. Papichiletu myaka ibiji awe muntu ye ubena kumona pa kipikichala naye wasemenwe. Uno muntu wanemene bingi kwi Lesa. Jizhina janji wajinga Abalahama. Waikalanga na kisemi kyanji mu muzhi wa Ula.

Juba jimo Yehoba wabujile Abalahama amba: ‘Fuma mu Ula, ne ku balongo bobe, ne kuya ku kyalo kyo nkakubula.’ Nanchi Abalahama wakokejile Lesa ne kusha bintu byonse byawama bya mu Ula nyi? Ee, byo byo aubile. Na mambo a kuba’mba Abalahama wakokelanga Lesa kyo kyalengejile kuba’mba ayukanyikwe’mba mulunda na Lesa.

Balongo banji bamo bayile ne Abalahama kimye kyo afumine mu Ula. Shanji Tela wayile nanji. Lota mwana wa kwa kolojanji naye wayile. Kabiji mukazhanji Abalahama aye Sala naye wayile. Bonse bakafikile mu mpunzha yatelwanga’mba Halana, konka kwakafwijile Tela. Bajinga kwalepa bingi na muzhi wa Ula.

Palutwe kacheche Abalahama ne kisemi kyanji bafumineko ku Halana ne kuya ku kyalo kya Kenana. Akwa Yehoba waambile’mba: ‘Ku ba mu kisemi kyobe ba kulutwe ko ko nkapana kino kyalo.’ Abalahama waikajilenga mu matente mu kyalo kya Kenana.

Lesa watatwile kukwasha Abalahama kya kuba waishile kwikala na matanga avula bingi a mikooko ne banyamatu bakwabo kabiji wajinga na bamingilo bavula bingi. Bino aye ne Sala kechi bajingapo na baana ba kwisemena ne.

Abalahama byo afikizhe myaka ya kusemwa 99, Yehoba wamwambijile’mba: ‘Nalayañana namba ukekala shanja mikoka yavula.’ Pano bino kino kyakonsheshe kubiwa byepi, mambo Abalahama ne Sala bakomene kukilayila kimino kya kwikelamo na baana?