Nanchi Mubena Kutengela “Muzhi uji na Bitendekesho bya Kine” Nyi?

1. Bavula bafuukulapo kuba ka, kabiji mambo ka?

BAKALUME ba Yehoba bavula bingi lelo jino bekanya kuba bintu bimo. Balongo ne banyenga bavula bafuukulapo kubula kutwela mu masongola. Baji mu masongola nabo bafuukulapo kubula kusema baana bukiji. Kabiji bisemi byapeezhako bwikalo bwabo. Abano bonse bafuukulapo kuba bino bintu na mambo a kintu kyanema bingi, ko kuba’mba kwingijila Yehoba pakatampe. Basekela mu bintu byonka byo baji nabyo kabiji baketekela kuba’mba Yehoba ukebapa byonse byo bakajilwa mu bwikalo bwabo. Nanchi mu kuba bino mufuma byawama nyi? Ee. Mambo ka o twaambila bino? Kishinka kimo ke kya kuba’mba Yehoba wapesheshe Abalahama, “shabo bonse baji na lwitabilo.”—Loma 4:11.

2. (a) Kwesakana na byaamba Bahebelu 11:8-10, 16, mambo ka Abalahama o aswijile kusha muzhi wa Ula? (b) Tusakwisamba pa ka mu uno mutwe?

² Abalahama waswile kusha bwikalo bwawama mu muzhi wa Ula. Mambo ka? Mambo watengejilenga “muzhi uji na bitendekesho bya kine.” (Tangai Bahebelu 11:8-10, 16.) Mu uno mutwe, tusakukumbula ano mepuzho: Ñanyi “muzhi” Abalahama ye atengejilenga? Ñanyi makatazho o apichilemo kimye kyo apembejilenga kuba’mba bashimike uno muzhi? Kabiji twafwainwa kuba byepi pa kuba’mba twikale byajinga Abalahama ne bakalume ba Lesa ba mu ano moba balondela lwitabilo lwanji?

“MUZHI UJI NA BITENDEKESHO BYA KINE” YE ÑANYI MUZHI?

3. Ñanyi muzhi watengejilenga Abalahama?

³ Muzhi watengejilenga Abalahama ke Bufumu bwa Lesa. Buno Bufumu buji mu maboko a kwa Yesu Kilishitu ne bena Kilishitu bashingwa baji 144,000. Paulo watelele buno Bufumu amba “muzhi wa Lesa mumi, Yelusalema wa mwiulu.” (Hebe. 12:22; Lum. 5:8-10; 14:1) Yesu wafunjishe baana banji ba bwanga kulombelanga buno Bufumu, kuba’mba bwiye pa kuba’mba kyaswa muchima wa Lesa kyubiwenga pano pa ntanda byonka byo kibena kubiwa mwiulu.—Mat. 6:10.

4. Kwesakana na byaamba Ntendekelo 17:1, 2, 6, ñanyi bishinka byayukile Abalahama pa muzhi nangwa’mba Bufumu bwalayile Lesa?

⁴ Nanchi Abalahama wayukile bishinka byonse pa bikekala Bufumu bwa Lesa nyi? Ine. Abino bishinka byajinga “kyafyamika kyazhila” pa myaka yavula bingi. (Efi. 1:8-10; Kolo. 1:26, 27) Bino Abalahama wayukile’mba baana banji bamo bakekala bamfumu. Kino kyo kyamulayile Yehoba. (Tangai Ntendekelo 17:1, 2, 6.) Abalahama wajinga na lwitabilo lwakosa bingi mu milaye ya Lesa kya kuba kyajingatu nobe wamwene Mushingwa, nangwa’mba Mesiasa, Mfumu wa Bufumu bwa Lesa. O ene mambo Yesu o abuujile Bayudea kimye kyo ajinga pano pa ntanda amba: “Abalahama shenu wasekejile bingi pa kuketekela kumona juba jami, kabiji wijimwene ne kusekela.” (Yoa. 8:56) Abalahama wayukile’mba baana banji bakalenga Bufumu na bukwasho bwa Yehoba. Kabiji wapembejilenga Yehoba kufikizha uno mulaye.

5. Twayuka byepi kuba’mba Abalahama watengejilenga muzhi wanengezhezhe Lesa?

⁵ Abalahama wamwesheshe byepi kuba’mba watengejilenga muzhi, nangwa’mba Bufumu bo banengezhezhe kwi Lesa? Kitanshi, Abalahama kechi waikelepo ngikazhi mu bufumu bwa pano pa ntanda ne. Kechi waikalanga pa mpunzha imo ne, wavilaukangatu, kabiji kechi watundaikanga bamfumu ba bantu ne. Kikwabo, Abalahama kechi wakebelenga kwilengela bufumu aye mwine ne. Pakuba watwajijile kukookela Yehoba ne kupembelela kuba’mba akafikizhe milaye yanji. Kino kyamwesha’mba Abalahama wajinga na lwitabilo lwakosa mwi Yehoba. Pano twayai twisambeko pa makatazho amo o apichilemo ne kumona byo twakonsha kufunjilako kwi aye.

ÑANYI MAKATAZHO APICHILEMO ABALAHAMA?

6. Muzhi wa Ula wajinga byepi?

⁶ Muzhi wafuminemo Abalahama wajinga muzhi wawama bingi kabiji wazhikijilwe. Uno muzhi wajinga na masakwa akosa bingi kabiji kwapichile mukola mukatampe wazhika. Bantu mu uno muzhi wa Ula bafunjile bingi. Kabiji kyamweka bantu bavula baubilanga busulu mu uno muzhi, mambo bashayuka bataana bintu byavula bingi byo baingijishanga mu busulu. Mazubo a bantu beashimikile na matafwali, ku bibumbulu babikileko pulasita ne kwiapenta musombelo utoka. Mazubo amo ajinga na bibamba 13 nangwa 14 kabiji pa mabanza babikilepo mabwe.

7. Ki ka kyalengejile Abalahama kuketekela mwi Yehoba kumuzhikijila pamo ne kisemi kyanji?

⁷ Abalahama waketekejile kuba’mba Yehoba ukamuzhikijilanga pamo na kisemi kyanji. Mambo ka? Vulukai kuba’mba Abalahama ne Sala bashile nzubo yawama yazhikijilwe na masakwa akosa mu muzhi wa Ula ne kuya na kwikala mu matente mungyetu mu ntanda ya Kenana. Kuno ko avilukijile kechi kwajingapo masakwa ne mikola ya kwibazhikijila ku balwanyi ne.

8. Ñanyi lukatazho lwapichilemo Abalahama pa kimye kimo?

⁸ Abalahama waubilenga kyaswa muchima wa Lesa, bino pa kimye kimo kechi wajinga na kajo ka kujiisha kisemi kyanji ne. Mu kyalo Yehoba kyo amutuminemo kuya na kwikala, mwaponene kipowe kya nzala. Kino kipowe kyabayile bingi kya kuba Abalahama wafuukwilepo kutwala kisemi kyanji ku Ijipita pa kimye kicheche. Bino byo ajinga mu Ijipita, mfumu wa kino kyalo aye Felo wamwangachile mukazhi. Abalahama wafwainwa waikele bingi na binyenge kufikatu ne kimye Yehoba kyo aambijile Felo kubwezha Sala kwi aye.—Nte. 12:10-19.

9. Ñanyi makatazho apichilemo kisemi kya kwa Abalahama?

⁹ Kisemi kya kwa Abalahama kyapichilenga mu makatazho. Mukazhanji ye atemenwe bingi aye Sala kechi wasemenepo mwana ne. Bajinga bingi na bijikila pa luno lukatazho pa myaka yavula. Mu kuya kwa kimye, Sala wapaine wa mwingilo wanji aye Hegala kwi Abalahama kuba’mba alaale nanji pa kuba’mba asemenemo baana. Bino Hegala byo aimichile jimi ja kwa Ishimela, watendekele kulengulula Sala. Luno lukatazho lwabayile bingi kya kuba Sala wapangile Hegala.—Nte. 16:1-6.

10. Ñanyi bintu Ishimela byo aubile Izaka byakonsheshe kulengela Abalahama kukatazha kuketekela Yehoba?

¹⁰ Kepo Sala aimichile kabiji wasemene mwana wamulume ye batumbile jizhina ja Izaka. Abalahama watemenwe baana banji babalume bonse babiji, Ishimela ne Izaka. Bino na mambo a bintu byatama Ishimela byo aubilenga Izaka, Yehoba waambijile Abalahama kupanga Ishimela ne Hegala. (Nte. 21:9-14) Byo papichile myaka, Yehoba wabuujile Abalahama kulambula mwananji aye Izaka kwikala mulambo wa kusoka. (Nte. 22:1, 2; Hebe. 11:17-19) Abalahama waketekejile’mba Yehoba ukapesha bano baana banji babalume.

11. Mambo ka Abalahama o apembelejilenga Yehoba kufikizha milaye yanji?

¹¹ Abalahama wafunjile kutekanya ne kupembelela Yehoba kufikizha milaye yanji. Kyamweka wajinga na myaka kukila pa 70 kimye aye ne kisemi kyanji kyo bafumine mu muzhi wa Ula. (Nte. 11:31–12:4) Kabiji pa myaka 100, waikelenga mu matente byo avilukilenga mu ntanda ya Kenana. Abalahama wafwile saka aji na myaka 175. (Nte. 25:7) Pano bino, kechi wamwene kufika kwa mulaye wa Yehoba wa kupana ntanda mo apitañenenga ku baana banji ne. Kabiji kechi wafikileko kimye kyaikajikilwe muzhi nangwa’mba Bufumu bwa Lesa ne. Nangwa byonkabyo, Abalahama bamulumbulula’mba wafwile “saka aikala myaka yavula ne kutondwa na bumi.” (Nte. 25:8) Abalahama wapichile mu makatazho avula, bino watwajijile kwikala na lwitabilo lwakosa ne kupembela Yehoba kufikizha milaye yanji. Ñanyi kintu kyamukwashishe kuchinchika? Yehoba wamuzhikijilanga kabiji wajinga mulunda nanji.—Nte. 15:1; Isa. 41:8; Yako. 2:22, 23.

12. Tubena kutengela ka, kabiji ñanyi bintu byo tusakwisambapo?

¹² Byonka byajinga Abalahama, ne atweba tubena kutengela muzhi uji na bitendekesho bya kine. Pano bino, kechi tubena kupembelela’mba bakashimike uno muzhi ne. Bufumu bwa Lesa bwaikajikilwe mu 1914 kabiji bubena kulama mwiulu. (Lum. 12:7-10) Atweba tubena kupembela kuba’mba Bufumu bukatendeke kulama ino ntanda. Byo tubena kupembelela kino kubiwa, kuji makatazho o twakonsha kupitamo epasha na apichilemo Abalahama ne Sala. Nanchi bakalume ba Yehoba balondela lwitabilo lwajinga ne Abalahama nyi? Ee. Mashimikila a bwikalo anembwa mu Kyamba kya Usopa amwesha’mba, bavula lelo jino baji na lwitabilo ne butekanye byonka byajinga Abalahama ne Sala. Pano twayai twisambeko pa mashimikila amo ne byo twakonsha kufunjilako.

BAMO BALONDEJILE LWITABILO LWA KWA ABALAHAMA

13. Mwafunjilako ka ku jishimikila ja bwikalo bwa Mulongo Walden?

¹³ Sankilaipo bintu bimo. Inge twatangizhako muzhi wa Lesa, ko kuba’mba Bufumu, tukekala byonka byajinga Abalahama wipaine kusankilapo bintu bimo pa kuba’mba asangajike muchima wa Lesa. (Mat. 6:33; Mako 10:28-30) Langulukai pa byaubile mulongo wa jizhina ja Bill Walden.b Mu 1942, ba Bill bajingatu pepi kupwisha kufunda bya buntungi pa univesiti mu United States. Pa kyonka kye kimye, po po batendekele kufunda Baibolo na Bakamonyi ba kwa Yehoba. Mufunjishi umo wibabuujile’mba ukebatwezha nkito inge bapwishatu sukulu. Pano bino, ba Bill bakaine. Bamulumbulwijile’mba bafuukulapo kubula kutwela nkito pa kuba’mba bengijilenga Lesa pakatampe. Byo papichiletu kimye kicheche, kafulumende wakambizhe ba Bill kutwela bushilikale. Bino abo bakaine na mushingi kabiji bebambijile kupana mali 10,000 madola a kina America ne kwibakasa myaka itanu. Bebakasulwile byo papichile myaka isatu. Mu kuya kwa kimye, bebechile kuya na kutanwa ku Sukulu wa Gileada. Kabiji byo bapwishishe bebatumine kuya na kwingila bumishonale mu Africa. Ba Bill basongwele ba Eva, kabiji baingijilenga bonse mu Africa. Bepaine kusankilapo bintu bimo. Byo baingijile myaka yavula bumishonale, babwelele ku United States na kulama bainabo ba Bill. Ba Bill baambile’mba: “Ñumvwa bingi bulongo inge nalanguluka pe Yehoba byo añingijishe mu mwingilo wanji pa myaka kukila pa 70. Kimye kyonse, namusanchila pa kunkwasha kumwingijila mu bwikalo bwami bonse.” Nanchi ne anweba mwakonsha kwingila mwingilo wa kimye kyonse mu bwikalo bwenu bonse nyi?

14-15. Mubena kufunjilako ka ku byapichilemo Mulongo ne Nyenga Apostolidis?

¹⁴ Mukapitanga mu makatazho mu bwikalo bwenu. Kwi Abalahama tufunjilako kuba’mba nangwatu boba bengijila Yehoba mu bwikalo bwabo bonse bapita mu makatazho. (Yako. 1:2; 1 Pe. 5:9) Byo byo kyajinga ne kwi ba Aristotelis Apostolidis.c Babatizhiwe mu 1946 mu Gilisi kabiji mu 1952 baipangwizhe nyenga wa jizhina ja Eleni. Uno nyenga wibikijile bikonkwanyi bipashishe na byabo. Nangwa byonkabyo, ba Eleni bakolelwe kansa wa ku bongo. Bebabukile uno kansa, bino byo papichile myaka icheche kufuma po batwelejile mu masongola, kansa wabwelele. Dokotala wibabukile jikwabo, pano bino, ba Eleni balekele kwenda, balaalangatu kabiji kwamba kwakatezhe. Ba Eleni batwajijile kusapwila na mukoyo nangwa kya kuba bakolelwenga kabiji kafulumende wibamanyikilenga.

¹⁵ Ba Aristotelis babezhezhe benakwabo pa myaka 30. Bajinga bakulumpe mu kipwilo, bajinga mu kavoto ka kubuñana, kabiji baingijileko mwingilo wa kushimika Nzubo ya Kubuñenamo pa kyonka kimye kyo babezhezhenga benakwabo. Kepo mu 1987, ba Eleni batainwe mu mapuso kimye kyo basapwijilenga. Balaajiletu sulubya pa myaka isatu, kabiji mu kuya kwa kimye bafwile. Ba Aristotelis balumbulwile bintu byo bapichilemo’mba: “Pa myaka yavula, napichile mu makatazho avula, kabiji amo ajinga a kubazhimukilatu. Onkao mambo, natwajijile kuchinchika kabiji kechi nabwelele panyuma ne. Yehoba watwajijile kumpa bulume bwa kuchinchika ano makatazho o napichilengamo.” (Sala. 94:18, 19) Yehoba watemwa bingi bakalume banji batwajijila kumwingijila nangwa kya kuba bapita mu meseko.

16. Ñanyi byambo byawama Mulongo Knorr byo aambijile mwinakwanji?

¹⁶ Tai muchima pa mfweto. Abalahama watele muchima pa mfweto ikamupa Yehoba kulutwe. Kino kyo kyamukwashishe kushinda makatazho o apichilengamo. Nyenga Audrey Hyde watwajijile kulanguluka pa mfweto ya kulutwe nangwa kya kuba mwinakwanji mutanshi aye Nathan H. Knorr wafwile na kikola kya kansa. Kabiji mwatawanji wa bubiji aye Glenn Hyde naye wakolelwe kikola kya kavulamya kiya na mambo a bukote.d Waambile’mba byambo byaambile Mulongo Knorr byo kwashajiletu pacheche kufwa byamukwashishe bingi. Uno nyenga waambile’mba: “Ba Nathan bamvulwilemo kuba’mba: ‘Luketekelo lwetu lukatwajijila nangwa twafwa, kabiji kechi tukekalapo na misongo jibiji ne.’ . . . Banungilepo’mba: ‘Wafwainwa kutwajijila kupayankana mu mingilo ya kukwasha bantu. Kino kikakukwasha kwikala na lusekelo.’” Bino byambo byawama bingi, mambo bitutundaika kutwajijila kupayankana mu mingilo ya kukwasha bantu ne ‘kusekela mu luketekelo.’—Loma 12:12.

17. (a) Mambo ka o twafwainwa kutela muchima pa mfweto iji kulutwe? (b) Kulondela byambo biji pa Mika 7:7 kuketukwasha byepi kwiyowa mapesho aji kulutwe?

¹⁷ Lelo jino, tuji na bishinka byavula byafwainwa kwitukwasha kuta muchima pa mfweto iji kulutwe. Bintu bibena kumweka mu ntanda, bibena kumwesha kuba’mba tubena kwikala ku mpelo ya moba a kupelako. Katatakatu kutengela muzhi uji na bitendekesho bya kine kukapwe. Kintu kimo pa bintu byavula biketuletela lusekelo ke kumona batemwe betu bo bakasangula. Pa kyo kya kimye, Yehoba ukafweta Abalahama na mambo a lwitabilo ne butekanye bwanji kupichila mu kumusangula aye ne kisemi kyanji pano pa ntanda. Nanchi mukekalako ne kwibatambwila nyi? Mukakonsha kwikalako inge mwasankilapo bintu bimo ne kutangizhako Bufumu bwa Lesa byonka byaubile Abalahama. Mwakonsha kuba bino kupichila mu kutwajijla kwikala na lwitabilo nangwa kya kuba mupita mu makatazho ne kupembelela Yehoba saka mwatekanya.—Tangai Mika 7:7.