Mosesa byo Bamupulwishe Saka Akiji Mwana

MONA mwana mucheche ubena kujila, kabiji wakwata ku munwe wa mwanamukazhi. Uno ke Mosesa. Wamuyuka uno mwanamukazhi walamba nyi? Ke mwana mfumu wa Ijipita, mwana wa kwisemena wa kwa Felo.

Inanji Mosesa wamufile posotu ne byo afikizhizhe bañondo basatu, mambo kechi wakebelenga’mba bamwipaye ku bena Ijipita ne. Bino wayukile’mba Mosesa ukatulukwa, ne kino kyo kyo baubile pa kuba’mba bamupulushe.

Watolele ka kilukwa ne kwikawamisha bulongo kuchina’mba mwakatwela mema. Kepo amubikilemo Mosesa, kabiji wakatujile kano ka kilukwa mu malele alepa mu Mukola wa Nile. Nyenga ya kwa Mosesa, aye Milyama bamubujile kwimana kwipi kuba’mba ayuke kyakonsheshe kumumwekela.

Kechi pabanjile ne kubandatu ne, mwana Felo wa mukazhi waishile na kowa mu Mukola wa Nile. Ponkapotu wamwene kano ka kilukwa mu malele alepa. Kepo aambijile muzha wanji umo amba: ‘Yanga ukandetele koka ka kilukwa.’ Uno mwana mfumu byo azhikwilemo, wamwene mwana walamba bingi! Uno lukeke Mosesa wajijilenga, kabiji uno mwana mfumu wamubijile lusa. Kechi wakebelenga’mba bamwipaye ne.

Kepo Milyama asolokele. Ye iwe ye ubena kumona pa kipikichala. Milyama wamushikishe mwana Felo amba: ‘Ngyenga nkemwichile mwanamukazhi mwina Isalela wa kwimwamushishako mwana nyi?’

Mwana mfumu waambile’mba: ‘Yanga.’

Ponkapo Milyama wayile lubilo, wakechile bainanji. Bainanji Mosesa byo baishile ku mwana mfumu, wibambijile’mba: ‘Mushikule uno mwana ne kuñamwishishangaye, kabiji amiwa nkemupanga mfweto yenu.’

Onkao mambo bainanji Mosesa balamine bingi bulongo mwanabo. Pa kupitapo kimye Mosesa wakomene, ne bainanji bamutwajile kwi mwana Felo, waikajile ke mwananji wa kushinda. Mosesa byo byo akomejile mu nzubo ya kwa Felo.