MUTWE WA PA NKUPIKO: BYO TUFUNJILAKO KWI MOSESA

Mosesa Wajinga Ñanyi?

Mulanguluka’mba ka inge mwaumvwa jizhina ja Mosesa? Nanchi mulanguluka’mba . . .

◼ mwana wa lukeke bainanji ye bafile mu ntumbe mu Mukola wa Nile nyi?

◼ kalombwana ye bakomeshe mu bwikalo bwawama bwa mu Ijipita ku mwana wamukazhi wa kwa Felo—pano bino kechi walubileko amba wajinga mwina Isalela ne.

◼ mwanamulume wajinga kafunga mu Mijanyi pa myaka 40 nyi?

◼ mwanamulume wisambile ne Yehobaa ku kipupu kyatemenenga mujilo nyi?

◼ mwanamulume waimene ku meso a mfumu wa Ijipita, wachinchikile ne kwambila mfumu wa bena Ijipita kuba’mba akasulule bena Isalela mu buzha nyi?

◼ mwanamulume ye bakambizhe kwi Lesa kwaamba pa kwiya kwa Myalo Jikumi pa bena Ijipita kimye mfumu wabo kyo afichishe Lesa wa kine ku muchima nyi?

◼ mwanamulume watangijile munongo wa bena Isalela kwibafumya mu buzha mu Ijipita nyi?

◼ mwanamulume ye baingijishe kwabanya mema pa Kalunga Kachila nyi?

◼ mwanamulume wapele bena Isalela Mizhilo Jikumi yafumine kwi Lesa nyi?

BINO byonse byo bintu byaubile Mosesa ne bikwabotu. O ene mambo uno mwanamulume wakishinka kyo bamunemekela bingi ku bena Kilishitu, Bayudea ne ba Mozilemu

Kwa kubula nangwa kuzhinaukatu ne, Mosesa wajinga ngauzhi waubile bintu “bikatampe bilengesha moyo.” (Mpitulukilo ya mu mizhilo 34:10-12) Waswile kumwingijisha kwi Lesa mu jishinda jakukumya. Mosesa wajinga muntu byonka byo tuji. Byonkatu byajinga ngauzhi Elaija wamwekele mu kimwesho kimye Yesu kyo ajinga pano pa ntanda saka aimana ne Mosesa, Mosesa wajinga “muntu byonka byo tuji.” (Yakoba 5:17; Mateo 7:1-9) Mosesa wapichile mu makatazho onka otupitamo ne atweba bonse, bino wiashinjile.

Nanchi mwakonsha kutemwa kuyuka byo ashinjile ano makatazho nyi? Twayai tumone byubilo byawama bisatu byajinga ne Mosesa kabiji ne byo twakonsha kufunjilako.

[Tubyambo twa mushi]

[Kipikichala pa peja 3]