Kipuupu Kyatemenenga

MOSESA wayile ku mutumba wa Holeba na kukeba kuji munyemvu wa kuja mikooko yanji. Ko ko amwene kipuupu saka kibena kutema mujilo, pano akyo kine kupya ne!

Mosesa waambile’mba: ‘Kino kintu kya kukumya. Wasendukile amba: Mmone.’ Byo aubile bino, monka mu kipuupu mwafumine jiwi ne kumwambila’mba: ‘Kufwenya kuno ne. Vula makwabilo obe ku maulu obe, mambo pantu po waimana po pa mushiji wazhila.’ Lesa ye waambilenga kupichila mwi malaika, onkao mambo Mosesa wazhikile pa meso.

Kepo Lesa aambile’mba: ‘Namona buyanji bwa bantu bami baji mu Ijipita. Kabiji naikila mu kwibapokolola mu kuboko kwa bena Ijipita. Pano twaya nkutume ukafumye bantu bami mu Ijipita.’ Yehoba wakonsheshe kwibatwala bantu banji mu kyalo kyawama kya Kenana.

Bino Mosesa waambile’mba: ‘Yami ñanyi kya kuba’mba ngye na kuba kya uno mutundu? Pano bino inge naya, bena Isalela bakañambila’mba: Ñanyi wakutuma? Nkebabula’mba ka?’

Lesa wakumbwile’mba: ‘Ukebabule bino amba: YEHOBA, Lesa wa Abalahama, ne Lesa wa Izaka, ne Lesa wa Yakoba, ye wantuma komuji.’ Kabiji Yehoba wanungilepo amba: ‘Jino jo jizhina jami pee.’

Mosesa wakumbwile’mba: ‘Kechi bakangitabile ne, byo nkebabula kuba’mba yenu mwantuma.’

Lesa wamushikishe’mba: ‘I ki ka kyo kiji mu kuboko kobe?’

Mosesa wakumbwile’mba: ‘Kamama.’

Lesa waambile’mba: ‘Kataye panshi.’ Mosesa byo ekataile panshi, kaalukile ke muloolo. Kabiji Yehoba wamumwesheshe Mosesa ne kyakukumya kikwabo. Wamwambijile’mba: ‘Twezha kuboko kobe mukachi pa kyaji kyobe.’ Mosesa watwetwezhe kuboko kwanji ne pa kwikulupulamo ke too pamo nobe mabebe. Kuboko kwamwekele nobe muntu wakolwa mbumba. Kepo Yehoba amupele Mosesa bulume bwa kuba kya kukumya kya busatu. Kabiji wamwambijile’mba: ‘Inge wauba bino bya kukumya, bena Isalela bakakwitabila’mba amiwa yami na kutuma.’

Panyuma ya bino Mosesa wabwelele ku nzubo ne kumwambila Yefelo amba: ‘Mwane, mbwele ku balongo bami baji mu Ijipita, nkamone kana bakiji bomi.’ Kabiji Yefelo wamwambijile Mosesa amba ayenga mu mutende, ne aye waimene ke lwendo kubwelamo ku Ijipita.