Mosesa Mwanamulume Wajinga Na Butemwe

BUTEMWE BO BU KA? Butemwe bwavwangamo kutemwa bakwetu kya kine. Muntu uji na butemwe wibumwesha ku boatemwa mu ñambilo ne mu byubilo byanji, nangwa kya kuba, kuba bino kwavwangamo kwipana aye mwine.

MOSESA WAMWESHESHE BYEPI BUTEMWE? Mosesa watemenwe Lesa. Mu ñanyi jishinda? Akivulukai byambo biji pa 1 Yoano 5:3 byaamba’mba: “Kutemwa Lesa kulumbulula amba tulondelenga mikambizho yanji.” Mosesa walondelanga uno muzhilo. Mu bintu byonse Lesa byo amwambijile’mba obe, Mosesa wakokejile, waswile kwingila mwingilo ulenga moyo wa kuya na kusolomoka kiyangala aye Felo ne mwingilo wamwekelenga kupela wakutanyikila nkonto pa Kalunga Kachila. Mosesa wakokelanga nangwa mwingilo wapela nangwa wakatazha. “I mo mo aubijile.”—Kulupuka 40:16.

Mosesa watemenwe bakwabo bena Isalela. Bayukile kuba’mba Yehoba waingijishenga Mosesa kutangijila bantu banji, onkao mambo baletanga makatazho abo kwi Mosesa. Tutanga’mba: “Bantu baimene kuji Mosesa kufuma ku lukelo kufika ne ku mabanga.” (Kulupuka 18:13-16) Akifwanyikizhai Mosesa byo akokanga na kuteleka ku makatazho a bena Isalela juba jonse. Nangwa byonkabyo, Mosesa waumvwanga bingi bulongo kukwasha bantu mambo wibatemenwe.

Mosesa kechi watelekangatu ne, wibalombelangako ne kwibalombelako mambo wibatemenwe. Walombelangako ne boba bamumanyikanga. Nabiji kimye Milyama nyenga yanji kyo anyinyichilenga pe Mosesa, Yehoba wamukambwile na mbumba. Mu kifulo kya kutemwa pa byo bamukambwile, Mosesa ponkapotu wamusashijileko’mba: “Nemusashilapo anweba Lesa, namba: Mubukai.” (Kubala 12:13) Butemwe bo bwalengejile Mosesa kulomba luno lulombelo lwa kufuma panshi ya muchima.

TWAFUNJILAKO KA? Twakonsha kulondela Mosesa inge twatemwa Lesa kya kine. Butemwe buketulengela kukokela mikambizho yanji “na muchima yense.” (Loma 6:17) Inge twakokela Yehoba na muchima wetu yense, tusangajika muchima wanji. (Byambo bya Mana 27:11) Kabiji ne atweba bene tumwenamo bingi. Inge ke twingijile Lesa na mambo a kumutemwa, kechi tukobangatu byawama ne, tukamwingijilanga ne na lusekelo.—Salamo 100:2.

Kabiji twakonsha kulondela Mosesa kupichila mu kwikala na butemwe bwa kwipana kwingijila bakwetu. Umvwe balunda netu nangwa balongo betu baiya ko tuji pa makatazho o baji nao, butemwe buketulengela (1) kuteleka na muchima wetu yense; (2) kwiumvwa byonka byo babena kumvwa; ne (3) kwibalengela kuyuka’mba twibata muchima.

Byonkatu byajinga Mosesa, twafwainwa kulombelangako bantu bo twatemwa. Kimo kimye inge betubula makatazho abo twakonsha kumvwa bibi ku muchima na mambo a kubula mashinda mwakwibakwashisha. Kampe twakonsha ne kwamba’mba, “Kyatama bingi nakankalwa kya kuba nsakwimulombelangakotu.” Vulukai kuba’mba: “Lulombelo lwa misashijilo lwa muntu waoloka luji na bulume kabiji lukwasha bingi.” (Yakoba 5:16, The Kingdom New Testament) Milombelo yetu yakonsha kulengela Yehoba kuba kintu kyo akubula kukeba kuba. Kafwako kintu kyo twakonsha kubila bakwetu kyakila pa kwibalombelako ne.a

Nanchi kechi mwaswa kuba’mba twakonsha kufunjilako byavula bingi kwi Mosesa nenyi? Nangwa kya kuba wajinga muntu byonka byo tuji, twakonsha kufunjilako ku lwitabilo, kwipelula ne butemwe bo ajinga nabo. Inge twalondela kya kumwenako kyanji, tukamwenamo atweba bene ne bakwetu pamo.—Loma 15:4.

[Tubyambo twa mushi]