Mosesa Mwanamulume Wajinga Na Lwitabilo

LWITABILO LO LUKA? Kwesakana na byo belwambapo mu Baibolo, “lwitabilo” lwavwangamo kwikala na luketekelo lwakosa lwaimena pa bintu bimweka. Muntu uji na lwitabilo mwi Lesa wikala na luketekelo lwakosa lwa kuba’mba Lesa ukafikizha milaye yanji yonse.

MOSESA WAMWESHESHE BYEPI LWITABILO? Mosesa wateletu muchima pa milaye ya Lesa. (Ntendekelo 22:15-18) Wajinga na jishuko ja kwikala bwikalo bwa ntentente mu Ijipita, bino wibukaine, “wasajilepo kumanamina pamo na bantu ba Lesa kukila kusekela mu bundengamambo bwa pa kakimye kacheche.” (Bahebelu 11:25) Nanchi kuno kufuukula kwajinga kwa kubazhimukila, kya kuba pa kupitapo kimye ke elangulushe nyi? Ine, Baibolo waamba kuba’mba “watwajijile kuchinchika saka atekanya nobe ubena kumona awa ubula kumweka.” (Bahebelu 11:27) Mosesa kechi wilangulwishepo pa mambo a lwitabilo lwanji ne.

Mosesa wakebeshanga kukwasha bakwabo kwikala na lwitabilo lwakosa. Akilangulukai kyamwekele kimye bena Isalela kyo bajinga pakachi, akwe nzhita ya kwa Felo ibapupijilenga, akwe Kalunga Kachila. Bena Isalela baubile moyo ne kumujijila Yehoba ne Mosesa. Mosesa waubilepo byepi?

Mosesa kechi wayukile kuba’mba katatakatu Lesa abanye Kalunga Kachila pakachi kuba’mba bena Isalela bapite pa mushiji wauma ne. Pano bino wajinga na luketekelo lwa kuba’mba Lesa usakubapo kimo pa kuba’mba azhikijile bantu banji. Kabiji Mosesa wakebelenga bakwabo bena Isalela nabo kwikala na luketekelo. Tutanga’mba: “Mosesa wibambijile bantu amba: ‘Kuchina ne; imanaitu nzo! mumone lupulukilo lwa Yehoba lo asakwimumwena ja lelo.’” (Kulupuka 14:13) Nanchi Mosesa wakwashishe bakwabo bena Isalela kwikala na lwitabilo lwakosa nyi? Wibakwashishe, mambo Baibolo kechi waambatu pe Mosesa ne, waamba ne pa bena Isalela bonse amba: “Lwitabilo lwibalengejile kwabuka Kalunga Kachila pa mushiji wauma.” (Bahebelu 11:29) Lwitabilo lwa kwa Mosesa lwakwashishe yense waketekejile mwi Yehoba.

TWAKONSHA KUFUNJILAKO KA? Twakonsha kulondela byajinga Mosesa kupichila mu kuzanza meso etu pa milaye ya Lesa. Kyakumwenako, Lesa walaya kwitupa byonse byo tukeba umvwe twatangizhako mpopwelo yanji mu bwikalo bwetu. (Mateo 6:33) Kya kine kuba’mba kyakonsha kwitukatazha bingi kubula kutangizhako bya mu bwikalo, mambo bantu bavula lelo jino byobyo batangizhako. Pano bino, twakonsha kuketekela kuba’mba inge twapezhako bwikalo bwetu ne kuta muchima ku mpopwelo yetu, Yehoba uketupa byonse byo tukeba. Aye walaya’mba: “Kechi nkakusha nangwa kukulekelela ne.”—Bahebelu 13:5.

Kabiji twibikako ne kukwasha bantu kwikala na lwitabilo lwakosa. Kyakumwenako, bansemi bayuka kuba’mba baji na mwingilo wakosa wakukwasha baana babo kwikala na lwitabilo mwi Lesa. Bansemi bafwainwa kufunjisha baana babo saka bakiji banyike kuba’mba Lesa koaji kabiji witupa bipimo bya kuyukilako kyawama ne kyatama. Kabiji bafwainwa kushiinwa’mba kulondela bipimo byanji mufuma byawama. (Isaya 48:17, 18) Bansemi bapa baana babo kya bupe kyakilamo kunema umvwe bebakwasha kuyuka kuba’mba Lesa “ko aji kabiji ye ufweta aba bamukebesha.”—Bahebelu 11:6.