Fwenyai Kwipi ne Lesa
Yehoba Wanemeka Bingi Bukimote
BWITOTE, kichima ne kwitumbijika. Bino byubilo byo biji na bantu bavula batumbalala mwaya ntanda. Nanchi bino byubilo bitufwenyesha kwipi ne Yehoba Lesa nyi? Ine, Yehoba wanemeka bingi bukimote bwa bapopweshi banji. Kino kishinka kitanwa mu jishimikila jiji mu buku wa Kubala kitango 12. Bino byamwekejile mu kiselebwa kya Sinai, panyuma ya kupokololwa kwa bena Isalela mu Ijipita.
Ba Milyama ne Alona “bamunenenenga” nkasabo Mosesa.(kyepelo 1) Mu kifulo kya kumwambilamo Mosesa, abo bamunenenenga, kampe kwijizhanya ku bakwabo mwaya kampu. Milyama ye batongola patanshi wafwainwa ye waletele kisonso. Banyinyichilenga mambo Mosesa wasongwele mwanamukazhi mwina Kushi. Nanchi Milyama wajinga na kichima, kuchina’mba kampe uno mwanamukazhi wabula mwina Isalela ukamulengela kubula kutumbalala mu mukoka wa bena Isalela nyi?
Kwijizhañanya kwaubile ne woo. Ba Milyama ne Alona baambilenga ne kuba’mba: “Nanchi aye Yehoba waamba mwi Mosesa bunke bwanji nyi? Kechi waamba ne mwi atweba nenyi?”(kyepelo 2) Nanchi kyalengejilenga kunyinyita kukeba kutumbalala ne kwikala na bulume nyi?
Mu jino jishimikila, Mosesa kechi wibakumbwile aye mwine pa byo bejizhañenyenga ne. Mosesa kechi wijizhañenyenga ne, wachinchikile myendeleko mu butekanye. Kutekanya kwanji kwamulengejile kumutela mu Baibolo amba “kimote kukila bantu bonse” panopantanda.a (kyepelo 3) Mosesa kechi wafwainwe kwambila bantu ene mambo Yehoba kyo amwingijishishenga ne. Yehoba waumvwinenga kabiji wamutabulwijilepo nsambu Mosesa.
Yehoba waumvwine’mba ye babena kunyinyita. Mambo ye wamusajile Mosesa. Pa kwibalekesha kunyinyita, Lesa wibalengejile kuyuka kuba’mba Mosesa wajinga na bulunda bwakosa ne aye byo ebambijile’mba: “Aye, ñamba nanji kanwa na kanwa.” Kabiji Yehoba waipwizhe ba Milyama ne Alona amba: “Nanchi mambo ka kyo mwabujila kuba moyo pa kumunena ... Mosesa?” (kyepelo 8) Kunyinyita Mosesa kwibalengejile kuzhatwa na mambo a kunyinyita Lesa. Kuno kubula mushingi kwalengejile Lesa kwibakambula.
Milyama mwine waletele kisonso bamukambwile na mbumba. Alona wamusanshijile Mosesa kuba’mba amukwashe Milyama. Akifwanyikizhai, pa kino kimye Milyama wakebelenga bukwasho kwi Mosesa yenka ye banyinyichilenga. Mosesa wikepeshe ne kuba byonka byo bamwambijile. Byambo bitanshi byaambile Mosesa mu jije jishimikila byajinga bya kulomba kwi Yehoba kuba’mba amukwashe nyenga yanji. Milyama bamubukile, nangwa byonkabyo bamushinkijile pangye ya kampu moba atanu.
Jino jishimikila jitulengela kuyuka byubilo byanemeka Yehoba ne byo ashikwa. Umvwe tukeba kufwenya kwipi ne Lesa twafwainwa kuleka tumiteeto to tuji nato tumwesha kwitota, kichima ne milanguluko ya kukeba kwitumbijika. Yehoba watemwa bakimote. Walaya’mba: “Pakuba bakimote bakaswana ntanda. Kabiji bakasangalela mu kuvula kwa mutende.”—Salamo 37:11; Yakoba 4:6.
[Tubyambo twa mushi]
a Bukimote ke kyubilo kikwasha muntu kuchinchika mu butenkanye kwakubula kushinkanya.