Lehaba Wafile Bamwendela Ntanda

ABE banabalume baji pa kino kipikichala bajinga mu lukatazho. Bafwainwe kunyema kuchina kwibepaya. Bajinga bena Isalela baishile na kwendela ntanda, kabiji uno mwanamukazhi ubena kwibakwasha wajinga Lehaba. Lehaba waikalanga mu nzubo yajinga mu muzhi wa Yeliko. Twaya tumone ene mambo bano banabalume kyo baikejile mu lukatazho.

Bena Isalela benengezhezhe kwabuka Mukola wa Yodano kuya mu ntanda ya Kenana. Bino saka bakyangye kwabuka, Yoshua watumine bamwendela ntanda babiji. Wibambijile’mba: “Yainga, mukakinkizhe ntanda, pakuba ku Yeliko ko kwine kwine.”

Bamwendela ntanda byo bafikile ku Yeliko, bayile ku nzubo ya kwa Lehaba. Bino muntu umo wabujile mfumu wa ku Yeliko amba: ‘Banabalume babiji bena Isalela baiya bufuku buno mu kukinkizha ntanda.’ Mfumu byo aumvwine kino, watumine bantu kwi Lehaba ne kumukambizha’mba: ‘Solola aba banabalume baji kwiya ko uji.’ Pakuba Lehaba wibafile pa mutenge wa nzubo yanji. Kepo ebambijile bano bantu amba: ‘Ee, banabalume baji kwiya ku nzubo yami, bino kechi naji kuyuka ko baji kufuma ne. Kabiji byo kyaji pepi na kimye kya kushinka kibelo kya muzhi, ne kufita pafita ne kala, aba banabalume baji kulupuka. Inge mwibapupile bukiji musa kwibatana.’ Kepo aba bantu bayile na kwibapupila.

Byo bayile, Lehaba wapelawizhizhe kuya pa mutenge wa nzubo ne kwambila bano bamwendela ntanda amba: “Nayuka namba Yehoba wimupa kala ino ntanda.” ‘Twaumvwine mambo a Yehoba byo aumishe mema a Kalunga Kachila palutwe yenu, byo mwafumine mu Ijipita; ne byo mwibepayile aba bamfumu ba Sihona ne Oga. Amiwa nemubila lusa, byonkabyo pano nemusashijila namba ne anweba mukangubile lusa. Mukapulushe batata ne bamama ne bakolojami ne bankasami ba balume ne ba bakazhi.’

Aba bamwendela ntanda bamulayile’mba basakukoba byonkabyo, bino Lehaba wafwainwe kwingilapo mwingilo umo. Aba bamwendela ntanda bamwambijile’mba: ‘Ukakase uno lutambo uchila mu kipenze kya nzubo yobe, ne kukonkanya balongo bobe bonse mu nzubo yobe. Kabiji byo tukabwela na konauna Yeliko, tukamona uno lutambo pa kipenze kya nzubo yobe, kabiji kechi tukepayapo nangwa umo wa mu nzubo yobe ne.’ Bano bamwendela ntanda byo babwelele kwi Yoshua, bamubujile bintu byonse bibamwekejile.