Lehaba Waitabijile mwi Yehoba

Twaya tufwanyikizhe amba tuji mu muzhi wa Yeliko. Uno muzhi wajinga mu kyalo kya Kenana mwajinga bantu babujile kwitabila mwi Yehoba. Mu uno muzhi mo mwaikalanga ne mwanamukazhi wa jizhina ja Lehaba.

Kimye Lehaba kyo ajinga mwanyike, waumvwine mashimikila aambilenga pe Mosesa byo aabenye mema a mu Kalunga Kachila, ne byo atangijile bena Isalela kufuma mu Ijipita. Kabiji waumvwine ne Yehoba byo ebakwashishe kulwa na balwanyi babo ne kwibashinda. Pano Lehaba waumvwa amba bena Isalela bajitu kwipi na Yeliko.

Juba jimo bufuku, ba mwendela ntanda babiji, bena Isalela, bayile na kumona biji muzhi wa Yeliko. Kabiji bafikile ku nzubo ya kwa Lehaba. Byo bafikile, wibatwezhezhe mu nzubo yanji ne kwibambila amba bekale monka. Bufuku, mfumu wa Yeliko waumvwine’mba bena Isalela babiji baji mu muzhi, kabiji ne kuba’mba baya ku nzubo ya kwa Lehaba. Onkao mambo, mfumu watumine banabalume kuya na kwibakwata. Lehaba wafiile ba mwendela ntanda pa musemi ne kwambila banabalume bafumine ku mfumu amba: ‘Ba mwendela ntanda baji kwiya konji, bino balupuka kala mu muzhi; inge mwibapupile musa kwibakwata.’ Nanchi wayuka kyalengejile Lehaba kufya bano bena Isalela babiji nyi?— Mambo waitabijile mwi Yehoba, kabiji wayukile ne kuba’mba Yehoba ukapana ntanda ya Kenana ku bena Isalela.

Bamwendela ntanda saka bakyangye kufuma mu nzubo ya kwa Lehaba, bamulayile kuba’mba aye ne kisemi kyanji bakapuluka kimye Yeliko kyo akonaunwa. Wayuka bano bena Isalela byo babuujile Lehaba kuba nyi?— Baambile’mba: ‘Ukakase lutambo uchila mu kipenze, inge ukobe bino, bonse baji mu nzubo yobe bakapuluka.’ Lehaba waubile byonka bya mubijile bano bamwendela ntanda. Wayuka kyaishile kumweka nyi?—

Byo papichiletu moba acheche, bena Isalela bazhokolokele muzhi kishinshi. Uno muzhi bamuzhokolokelengatu jimo pa juba, kabiji baubile bino pa moba 6. Bino pa juba ja bu 7, uno muzhi bamuzhokolokele bimye 7. Kepo bonse babijikile na jiwi jikatampe. Yehoba wakundwile bibumbulu byazhokolokele muzhi. Pakuba nzubo yajinga na lutambo uchila wazenzumukile pa kipenze kechi yakundukile ne. Ubena kwiimona ino nzubo pa kipikichala nyi?— Lehaba ne balongo banji bapulukile!

Wakonsha kufunjilako ka kwi Lehaba?— Lehaba waitabijile mwi Yehoba mambo a bintu byawama byo afunjile pe aye. Ne obewa wakonsha kufunda bintu byavula byawama pe Yehoba. Nanchi waketekela mwi Yehoba byonka byaubile Lehaba nyi?— Twayuka kuba’mba ne obewa waketekela mwi Yehoba.