Lesa Wakwashishe Mfumu Hezekiya

NANCHI wayuka ene mambo uno muntu o abena kulombela kwi Yehoba nyi? Mambo ka o abikila ano makalata kulutwe ya kyakusokelapo bitapisho kya Yehoba? Uno muntu wajinga Hezekiya. Wajinga mfumu wa bisaka bibiji bya bena Isalela bya ku kabeta ka ku bulenge. Kabiji wajinga mu lukatazho lukatampe. Mambo ka?

Ke na mambo a kuba’mba mazhita a bena Asilya aonawine bisaka jikumi bya ku kabeta ka ku buyeke. Yehoba waswishishe kino kubiwa mambo bantu ba mu bino bisaka batamine bingi. Mazhita a bena Asilya pano aishile kuba’mba alwe na bufumu bwa bisaka bibiji.

Mfumu wa bena Asilya watumine makalata kwi Mfumu Hezekiya. Ano o makalata Hezekiya o aletele kwi Lesa. Mu ano makalata mwajinga byambo bya kumwendeleka Yehoba kabiji ne kumuchinya Hezekiya. Kino kyo kyalengejile Hezekiya kulomba’mba: ‘Anweba Yehoba, tupokololai mu kuboko kwa mfumu wa bena Asilya. Mikoka yonse ya panopantanda iyuke’mba anweba yenu Lesa bunke bwenu.’ Nanchi Yehoba wamumvwine Hezekiya nyi?

Hezekiya wajinga mfumu wawama. Aye kechi wajinga nobe bamfumu batamine ba bufumu bwa bisaka jikumi bwa bena Isalela, nangwa nobe shanji, aye Ahaza wajinga mfumu watama ne. Hezekiya wateleko bingi muchima kulondela mizhilo ya Yehoba yonse. Onkao mambo, Hezekiya byo apwishishe kulomba, ngauzhi Isaya wamutumijile bino byambo kufuma kwi Yehoba amba: ‘Mfumu wa bena Asilya kechi ukanyantamo mu Yelusalema ne. Nangwatu bashilikale banji kechi bakesulwa kufwenya kwipi na uno muzhi ne. Kabiji kechi bakatayamo muketo nangwa umo ne.’

Akitala pa kikye kipikichala kiji papo. Nanchi bano bonse bashilikale bafwa, wibayuka nyi? Bajinga bena Asilya. Yehoba watumine malaika, kabiji mu bufukutu bumo, malaika waipayile bashilikale 185,000 ba bena Asilya. Onkao mambo, mfumu wa bena Asilya wachiine ne kubwelamo kwabo.

Bufumu bwa bisaka bibiji bwapulukile, kabiji pa kino kimye bantu baikele ku matwi nzoo. Bino panyuma ya lufu lwa kwa Hezekiya, mwananji Manase waikele ke mfumu. Manase ne mwananji wamuswaine, aye Amonyi, bonse bajinga bamfumu batama. Ne jikwabo ntanda yabo yayujile na bumbanzhi ne malwañano. Mfumu Amonyi byo bamwipayile ku bakalume banji, mwananji, aye Yosiya bamutongwele kwikala mfumu wa bisaka bibiji.