Petelo Wapempwile Koneleusa

AWE ye wamona waimana pa kikye kipikichala ye mutumwa Petelo, kabiji aba baimana kunyuma yanji ke balunda nanji. Pano mambo ka awe muntu kyo afukamijile panshi kwi Petelo? Nanchi wafwainwe kuba bibye nyi? Abya uno muntu wafukama wamuyuka nyi?

Uno muntu jizhina janji Koneleusa. Wajinga mukulumpe wa bashilikale ba bena Loma. Koneleusa kechi wamuyukile Petelo ne, bino bamubujile’mba amutambwile ku nzubo yanji. Twaya tumone kino byo kyajinga.

Baana ba bwanga batanshi ba kwa Yesu bajinga Bayudea, bino Koneleusa kechi wajinga Muyudea ne. Pano bino wamutemenwe bingi Lesa, walombele kwi aye, ne kubila bantu bintu byavula bingi byawama. Juba jimo pa kulemba kwa juba, malaika wamwekele kwi Koneleusa ne kumwambila’mba: ‘Lesa wakwitaba, kabiji usakukumbula milombelo yobe. Pano tuma bantu bakalete muntu wa jizhina ja Petelo. Wafikila mu Yopa ku nzubo ya kwa Shimona, wikala ku mukulo wa kalunga ka mema.’

Ponkapo Koneleusa watumine bantu na kumuleta Petelo. Juba jalondejilepo, aba bantu byo bakijinga mu jishinda, kasa bafika kwipi na ku muzhi wa Yopa, Petelo wakanjijile peulu ya nzubo ya kwa Shimona. Lesa wamulengejile Petelo kuba nobe wamona kisapi kikatampe saka kikila panshi kufuma mwiulu. Mu kyokya kisapi mwajinga misango yonse ya banyama. Kwesakana na mizhilo ya Lesa, bano banyama bajinga bazhila kechi bafwainwe kujiwa ne, bino jiwi jamwambijile’mba: ‘Petelo imana, wipaye, uje.’

Petelo wakumbwile’mba: ‘Akyo ne, mambo kechi najilepo kala kyazhila kuja ine.’ Bino jiwi jamubujile Petelo amba: ‘Kyazhilulula Lesa obewa kechi wikitela’mba, kya kijejejetu ne.’ Kino kyaubiwe jisatu. Petelo byo akizhinaukilenga mu muchima na kyokya kimwesho kyo amwene, aba bantu bo batumine kwi Koneleusa bafikile pa nzubo ne kwipuzha kwajinga Petelo.

Petelo waikijile kufuma pa mutenge ne kwamba’mba: ‘Amiwa uno ye musaka. Ñanyi mambo o mwaendela?’ Aba bantu byo balumbulwile amba malaika wabujile Koneleusa kumwita Petelo amba aye ku nzubo yanji, Petelo waswile kuya nabo. Juba jalondejilepo, Petelo ne balunda nanji bayile kwi Koneleusa ku Kesalea.

Koneleusa wapwizhizhe jimo balongo banji ne balunda nanji. Petelo byo afikile, Koneleusa wamutundaijile. Walambijile panshi ku maulu a kwa Petelo byonka byo ubena kumona pa kikye kipikichala. Bino Petelo wamwambijile’mba: ‘Imanai; ne amiwa ne muntutu.’ Ee, Baibolo waamba’mba kechi kyawama kulambila muntu ne kumupopwela ne. Twafwainwatu kupopwela Yehoba kwapwa.

Kepo Petelo asapwijile ku bonse bakonkenejile pamo. Waambile’mba: ‘Lesa witaba bantu bonse bakeba kumwingijila.’ Kabiji byo akyambilenga bino byambo, Lesa watumine mupashi wanji wazhila, ne boba bantu batendekele kwambila mu njimi ingi. Kino kyakumishe bingi baana ba bwanga Bayudea bajinga ne Petelo, mambo balangulukile’mba Lesa watemwatu Bayudea bonka. Onkao mambo, kino kibafunjishe kuba’mba Lesa kechi utumbijikapo mushobo umo nangwa kumunemeka ne kulengulula mishobo ikwabo ne. Nanchi kino kechi kintu kyawama kyo twafwainwa kuvulukanga atweba bonse nenyi?