Koneleusa Watambula Mupashi Wazhila

Mu Kesalea mwaikalanga mukulumpe wa bashilikale ba bena Loma wa jizhina ja Koneleusa. Bayudea bamunemekele bingi nangwa kya kuba kechi wajinga Muyudea ne. Mambo wakwashanga balanda ne bantu bakajilwa. Koneleusa waketekejile mwi Yehoba kabiji walombanga kimye kyonse. Juba jimo, malaika wa Lesa wamwekele kwi Koneleusa ne kumwambila’mba: ‘Lesa waumvwa milombelo yobe. ‘Tuma banabalume baye ku Yopa kwafikila Petelo bamubule eye ku nzubo yobe.’ Ponkapo Koneleusa watumine banabalume basatu kuya ku Yopa, palepele makilomita 48 kuya ja buyeke.

Petelo byo ajinga mu Yopa wamwene kimwesho mwajinga banyama, Bayudea bobebakainye kuja. Bino waumvwine jiwi jamubujile’mba epaye aje. Petelo wakaine’mba: ‘Kechi nja bintu bya muzhilo ne biji na biko ne.’ Kepo aumvwine jiwi amba: ‘Kileke kutela bino bintu amba bya biko, mambo Lesa wibitokesha.’ Kabiji Petelo bamubuujile’mba: ‘Banabalume basatu babena kukukeba baji ku kibelo. Uye nabo. Petelo washinkwileko ne kwibepuzha kyo baendejile. Bamukumbwile’mba: ‘Koneleusa, mukulumpe wa bashilikale ba bena Loma ye witutuma na kwimwita anweba kuba’mba muye ku nzubo yanji ku Kesalea.’ Petelo wibambijile’mba balaale. Juba jalondejilepo, waimene ne kuya nabo pamo na balongo bamo bajinga mu Yopa.

Koneleusa byo amwene Petelo, wafukamine panshi. Bino Petelo wamwambijile’mba: ‘Imana; amiwa ne muntutu, Lesa ye wañambijile amba ngiye ku nzubo yobe, nangwa kya kuba Bayudea kechi batwela mu mazubo a bantu babula Bayudea ne. Pano mbuulai kyo mwangichila.’

Koneleusa wabuujile Petelo amba: ‘Papita moba ana, byo nalombelenga kwi Lesa, malaika waishile ne kuñambila’mba nemwite anweba. Mwane tufunjishai pe Yehoba.’ Petelo waambile’mba: ‘Pano po nayuka namba, Lesa kechi uji na misalululo ne, bino uswa muntu yense ukeba kumupopwela.’ Petelo wibafunjishe bintu byavula pe Yesu. Kepo mupashi wazhila aishile pe Koneleusa ne bonse bo ajinga nabo, kabiji babatizhiwe.