FWENYAI KWIPI NE LESA
Yehoba “Kechi uji na Misalululo Ne”
Nanchi bakimushikwapo na mambo a misalululo nyi? Nanchi bakimukainapo kwimupa kintu kyo mubena kukeba nabiji nkito nangwa kwimushikwa na mambo a kupusana kwa kikoba, bisho, nangwa na mambo a kifulo kiji na muntu mu bwikalo nyi? Umvwe byobyo kiji, kechi yenu bonka ne. Umvwai bino byambo byawama: Bino byubilo byatama byasampukila ne pa katele mu ino ntanda, bino mwiulu bifwamo. Mutumwa wa bwina Kilishitu aye Petelo waambile bino byambo na kusumininwa kuba’mba “Lesa kechi uji na misalululo ne.”—Tangai Byubilo 10:34, 35.
Petelo waambile bino byambo kimye kyo ajinga mu nzubo ya Mungetila aye Koneleusa. Petelo wajinga mu Yudea kabiji wajingako kimye Bayudea kyo bamonanga Bangetila amba bantu babula kuzhila. Bano bantu bebamonanga kuba’mba kechi bafwainwa kupopwela Lesa ne. Pano mambo ka Petelo kyo aishijile ku nzubo ya kwa Koneleusa? Mambo Yehoba Lesa ye wanengezhezhe kuba’mba basambakene ku nzubo yanji. Petelo wamwene kimwesho amo mo bamwambijile kuba’mba: “Kechi utele bintu byazhilulula Lesa amba byabipa ne.” Petelo kechi wayukile kuba’mba juba jafumineko Koneleusa naye wamwene kimwesho ne, amo malaika mo amubuujile kuya na kwita Petelo. (Byubilo 10:1-15) Petelo byo ayukile kuba’mba Yehoba ye waubile bino, wambile byonse.
Petelo waambile’mba, “Pano nayuka namba, Lesa kechi uji na misalululo ne.” (Byubilo 10:34) Kyambo kya Kingiliki kyatuntululwa amba “misalululo” kilumbulula amba “utala ku kilungi”. (The Kingdom Interlinear Translation of the Greek Scriptures) Shayuka umo waambile pa kino kyambo kuba’mba: “Kyatala ku mutonyi ubena kuchiba mambo na kutala ku bilungi bya bantu, kechi kwesakana na mwayila mambo ne, bino kwesakanatu na byo ashikwa muntu nangwa byo amutemwa.” Lesa kechi utala ku bilungi na mambo a mushobo, kyalo nangwa bintu bikwabo ne.
Bino aye Yehoba umona biji mu muchima wa muntu. (1 Samwela 16:7; Byambo bya Mana 21:2) Kyalondejilepo, Petelo waambile kuba’mba: “Bino mu bisaka byonse muntu wakamwa Lesa ne kuba byaoloka ye witabilwa kwi aye.” (Byubilo 10:35) Moyo wa kwakamwa Lesa ko kuba’mba kumunemeka, ne kumuketekela, kubula kuba byonse byakonsha ku mufichisha ku muchima. Kuba byaoloka mwavwangwa kuba bimutokesha kumuchima na muchima yense. Yehoba watemwa muntu uji na muchima wa ku mwakamwa kabiji uba bintu bimutokesha ku muchima.—Mpitulukilo ya mu mizhilo 10:12, 13.
Umvwe mwakimanamapo nangwa ba kimulengululapo kala, byambo bya Lesa byaambile Petelo byakonsha kwimutundaika. Yehoba ubena kukooka bantu ba mikoka yonse kwiya ku bupopweshi bwa kine. (Yoano 6:44; Byubilo 17:26, 27) Aye uteleka milombelo ya bamupopwela kechi na mambo a mushobo, kyalo, nangwa kifulo kyo aji nakyo ne. (1 Bamfumu 8:41-43) Twaketekela kuba’mba Yehoba inge watala pano pa ntanda umonapotu mutundu umo, ko kuba’mba mutundu wa bantu. Nanchi mukeba kuyuka byavula pe Lesa wabula misalululo nyi?
Kutanga Baibolo mu june
[Mabulañano pa peja 8]
Yehoba inge watala pano pa ntanda umonapotu mutundu umo, ko kuba’mba mutundu wa bantu