Kitango 70

Wabukile Muntu Wasemekelwe Saka aji Mpofu

BAYUDEA byo bakebele kumwasa mabwe, Yesu kechi wafuminemo mu Yelusalema ne. Palutwe kacheche, pa juba ja Sabado aye ne baana banji ba bwanga bapitañenenga mu muzhi mo bamwene muntu wasemekelwe saka aji mpofu. Baana ba bwanga bashikishe Yesu amba: “Mufunjishi, ñanyi walengele mambo, uno muntu nyi, inyi bansemi banji kya kuba amba wasemwa saka aji mpofu?”

Kampe baana ba bwanga baitabijile byonka byaitabijile bafunjishi bamo amba muntu wakonsha kulenga mambo saka akiji munda mwainanji. Bino Yesu wibakumbwile amba: “Uno muntu nangwa bansemi banji kechi bo balengele mambo ne, bino kino kyamwekele kuba amba bantu bamone mwingilo wa Lesa.” Uno muntu kechi wasemekelwe saka aji mpofu na mambo a kilubo nangwa mambo o alengele aye mwine nangwa bansemi banji ne. Bundengamambo bwa muntu mutanshi Adama bwalengela bantu bonse kwikala bambulwakulumbuluka. Onkao mambo, kino kyo kilengela bantu kulemana nabiji kusemwa saka aji mpofu. Bulema bwa yewa muntu bwalengejile Yesu kusolola mingilo ya Lesa.

Yesu waambishepo bingi pa buneme bwa kwingila ino mingilo amba: “Twafwainwa kwingila mingilo ya yewa wantumine juba byo jikijiko; bufuku bubena kwiya kimye muntu nangwa umo kyo akabula kwingila ne. Byo nkiji pano pa ntanda, amiwa ne kyeya kya pano pa ntanda.” Yesu byo afwile wayile mu kilende mu mfishi mo akonsheshe kubula kuba kintu nangwa kimo ne. Bino saka akyangye kufwa, ye wajinga nsulo ya kyeya kya pano pa ntanda.

Yesu byo apwishishe kwamba bino, washipijile mate panshi ne kukanda mateshi. Ano mateshi wiashingile mu meso a yewa muntu ne kumwambila’mba: “Yanga ukowe mu kizhiba kya Shiloma.” Ne uno muntu waubile monka mo amubujile. Kabiji byo aowele, watatwile kumona! Kine uno muntu wasekejile bingi byo abwelele saka amona kimye kitanshi mu bwikalo bwanji!

Bo aikalanga nabo kipikipi ne bantutu bamuyukile bakuminye bingi. Bashikishe’mba: “Nanchi uno muntu kechi ye yewa waikalanga na kulombalomba nenyi?” Bamo bakumbwile’mba: “Ye iye.” Bakwabo nabo amba: “Ine, wamupashatu.” Bino uno muntu waambile’mba: “Yami iye.”

Bantu bamushikishe’mba: “Nanchi meso obe bealabisha byepi?”

“Muntu ye batela amba Yesu waji kukanda mateshi ne kunshingao mu meso ne kuñambila amba, ‘Yanga ku Shiloma ukowe.’ Byonkabyo, naji kuya na kowa, kammone ne kumona.”

Bamushikishe’mba: “Nanchi uno muntu uji kwepi?”

Aye wibakumbwile’mba: “Kechi nayuka ne.”

Bantu batwajile uno muntu wajinga mpofu ku Bafaliseo bantangi babo ba bupopweshi. Bano nabo bamushikishe byo atendekele kumona. Uno muntu wibabujile amba: “Waji kunshinga mateshi mu meso, ne amiwa naji kuya na kowa ne kutatula kumona.”

Bafaliseo bafwainwe kusekela pamo na yewa muntu wabukilwe walombalombanga! Bino abo balengulwile Yesu ne kwamba’mba: “Uno muntu kechi wafuma kwi Lesa ne.” Mambo ka o baambijile bino? “Mambo kechi ulama juba ja Sabado ne.” Pano bino, Bafaliseo bakwabo bazhinaukilenga amba: “Nanchi ndengamambo wakonsha kuba biyukilo bya uno mutundu nyi?” Onkao mambo, bapusenejilemo bene na bene.

Ponkapo bamushikishe awa muntu amba: “Nanchi usakwambapo amba ka pa uno muntu byo akulabisha meso?”

Wibakumbwile’mba: “Aye ye ngauzhi.”

Bafaliseo bakaine kuswa kino. Baambilenga’mba paji kintu kimo Yesu ne uno muntu kyo baumvwañana kuba’mba batwale bantu mungi. Onkao mambo, pa kuba’mba bapwishe ano mambo, baichile bansemi banji amba bebepuzhe. Yoano 8:59; 9:1-18.

▪ Ñanyi kintu kyalengejile awa muntu kusemwa saka aji mpofu, bino ñanyi kintu kyo abujile kuba?

▪ Ñanyi bufuku muntu bo akonsha kubula kwingijilamo mingilo?

▪ Awa muntu byo abukilwe, bantu bamuyukile baubilepo ka?

▪ Bafaliseo bapusenejilemo byepi pa byabukilwe yewa muntu?