Kitango 71

Bafaliseo Bakaine Kwitabila

BANSEMI ba yewa muntu wajinga kala mpofu walombalombanga baakaminwe bingi byo bebechile ku Bafaliseo. Bayukile’mba muntu yense wamba’mba waitabila mwi Yesu bakamupanga mu nshinagoga. Kubula kupwanañana na bantu kwaletanga makatazho akatampe kikatakata umvwe kisemi kiyanji. Onkao mambo, bansemi ba yewa muntu bayukile mwakukumbwila.

Bafaliseo baipwizhe’mba: “Nanchi uno ye mwanenu ye mwamba amba wasemekelwe saka aji mpofu nyi? Pano watatula kumona byepi?”

Bansemi banji bakumbwile amba: “Twayuka amba, uno mwanetu kabiji wasemekelwe saka aji mpofu. Bino kechi twayuka byo atatula kumona ne, nangwa wamulabisha meso kechi twamuyuka ne.” Kyamweka mwanabo wibabujile bintu byonse byamwekele, bino bansemi banji na maana baambile’mba: “Mushikishai anwe bene. Wakoma. Wafwainwa kwiambila mwine.”

Onkao mambo, Bafaliseo bamwichile jibiji awa muntu. Pa kikye kimye, baesekele kumuchinya kupichila mukumwesha’mba baji na bishinka bya kupelapo mambo Yesu. Bamukambizhe’mba: “Pana lukumo kwi Lesa; twayuka namba uno muntu ndengamambo.”

Awa muntu wajinga kala mpofu kechi wakaine byo bamwambijile ne. Waambile’mba: “Inge aye ndengamambo amiwa kechi nayuka ne.” Wanungilepo amba: “Kyo nayukakotu ke kya kuba amba, najinga mpofu pano luno mbena kumona.”

Byo bakebelenga mwakumutaina na mambo, Bafaliseo bamwipwizhe jibiji amba: “Ñanyi kintu kyo aji kukuba? Waji kukulabisha byepi meso?”

Uno muntu wijizhañenye amba: “Naji kwimubula kala, bino kechi mwajikumvwa ne. Mambo ka o mubena kukebela kumvwa jibiji?” Wibepwizhe na mukeyu amba: “Nanchi ne anweba mubena kukeba kwikala baana banji ba bwanga nyi?”

Wazhingijishe bingi Bafaliseo pa kwibakumbula bino. Bamwambijile’mba: “Obewa wi mwana wa bwanga wa yewa muntu, pakuba atweba twi baana ba bwanga ba kwa Mosesa. Twayuka namba Lesa waambanga ne Mosesa; pakuba uno muntu kechi twayuka ko afuma ne.”

Uno muntu walombalombanga wipelwile wakuminye bingi ne kwamba’mba: “Kine kino ke kya kukumya bingi kuba amba anweba kechi mwayuka kwafuma uno muntu ne, bino aye saka andabisha ne meso.” Uno muntu watazhizhe mu ka pa kwamba bino? Awa muntu walombalombanga waambilenga pa kintu kyafwainwe kuba muntu amba: “Twayuka amba Lesa kechi umvwa milombelo ya bandengamambo ne, bino umvwe muntu wakamwa Lesa ne kuba kyaswa muchima wanji, aye ye ye omvwa. Kufumatu kala kechi kyaumvwanyikapo amba muntu walabishapo meso a muntu wasemekelwe saka aji mpofu ne.” Onkao mambo, kishinka ke kya kuba’mba: “Umvwe uno muntu kechi wafumine kwi Lesa ne, kafwako kyo afwainwa kuba ne.”

Jishinda jakumbwijilemo uno muntu jalengejile Bafaliseo kukankalwa ne kya kwamba. Bakaine kuswa bino bishinka, onkao mambo bamutukile amba: “Obewa wasemekelwe mu bundengamambo, witufunjishenga?” Ponkapo uno muntu bamulupwilemo kampe kumupanga mu nshinagoga.

Yesu byo ayukile kyo baubile, wataine awa muntu ne kumushikisha’mba: “Nanchi obewa waitabila mu Mwana muntu nyi?”

Awa muntu walombalombanga wajinga kala mpofu pa kukumbula, wamushikishe’mba: “Nkambo, nanchi ye ñanyi? Mbulai, kuba amba namwitabile.”

Yesu wamukumbwile amba: “Yenka ye ubena kwisamba nanji.”

Ponkapo awa muntu wafukamine kwi Yesu ne kumwambila’mba: “Nkambo, amiwa namwitabila.”

Kepo Yesu alumbulwile’mba: “Na mambo a kuno kuchiba mambo, o naishijile pano pa ntanda kuba amba: aba babula kumona bamone kabiji aba bamona baluke ke bampofu.”

Bafaliseo bamutelekelenga bamushikishe’mba: “Nanchi ne atweba twi bampofu nyi?” Umvwe bayukile’mba bajinga bampofu, inge kechi bashikilwe Yesu ne, byonka Yesu byo ebabujile’mba: “Umvwe mwajinga bampofu, inge bundengamambo mufwabo.” Pano bino, bakosele michima ne kwamba’mba kechi bajinga bampofu ne, kabiji kechi bakebewenga kyeya kya ku mupashi ne. Onkao mambo, Yesu wibambijile’mba: “Pano mwaamba amba, ‘Tumona.’ Bundengamambo bwenu kechi bukalekelwa ne.” Yoano 9:19-41.

▪ Mambo ka bansemi ba yewa walombalombanga wajinga kala mpofu o baakamijilwe kimye kyo bebechile ku Bafaliseo, kabiji bakumbwile byepi?

▪ Bafaliseo baesekele kuchinya byepi awa muntu wajinga kala mpofu?

▪ Ñanyi jishinda jawama jakumbwijilemo awa muntu jalengejile Bafaliseo kuzhingila?

▪ Mambo ka Bafaliseo o baikejile na mambo pa kushikwa Yesu?