Yesu Wabukile Mwanamulume Wasemekelwetu Mpofu

Yesu wakijinga mu Yelusalema pa juba ja Sabado. Aye ne baana banji ba bwanga byo bapitañenenga mu muzhi, bamwene muntu walombalombanga bintu wasemekelwe saka aji mpofu. Baana ba bwanga bashikishe Yesu amba: “Labi, ñanyi walengele mambo, uno muntu nyi, inyi bansemi banji pa kuba’mba asemwetu mpofu?”—Yoano 9:2.

Baana ba bwanga bayukile kuba’mba uno muntu kechi wajingako saka akyangye kusemwa ne, onkao mambo, beipwizhenga bene kumona inge muntu wakonsha kulenga mambo saka akiji munda mwainanji. Bino Yesu wibakumbwile’mba: “Uno muntu nangwa bansemi banji kechi bo balengele mambo ne, bino kino kyamwekele pa kuba’mba mingilo ya Lesa imwekele mwi aye.” (Yoano 9:3) Uno muntu kechi wasemekelwe saka aji mpofu na mambo a kilubo nangwa mambo o alengele aye mwine nangwa bansemi banji ne. Bundengamambo bwa muntu mutanshi Adama bwalengela bantu bonse kwikala bambulwa kulumbuluka, kabiji mwafuma ne kwikala na bulema nabiji bumpofu. Bulema bwa yewa muntu bwalengejile Yesu kusolola mingilo ya Lesa, byonka byo aubanga pa kubuka bantu bikola byabo.

Yesu waambile pa buneme bwa kwingila uno mwingilo bukiji bukiji. Waambile’mba: “Twafwainwa kwingila mingilo ya yewa wantumine juba byo jijiko; bufuku bubena kwiya kimye muntu nangwa umo kyo akabula kwingila. Byo nkiji pano pa ntanda, amiwa nekyeya kya pano pa ntanda.” (Yoano 9:4, 5) Yesu byo afwile wayile mu kilende mu mfishi mo akonsheshe kubula kuba kintu nangwa kimo ne. Bino saka akyangye kufwa, ye wajinga nsulo ya kyeya kya pano pa ntanda.

Nanchi Yesu wabukile uno muntu nyi? Kabiji wamubukile byepi? Yesu washipijile mate panshi ne kukanda mateshi. Ano mateshi wiashingile mu meso a yewa muntu ne kumwambila’mba: “Yanga ukowe mu kizhiba kya Shiloma.” (Yoano 9:7) Ne uno muntu waubile monka mo amubuujile. Kabiji byo aowele, watatwile kumona. Kine uno muntu wasekejile bingi byo abwelele saka amona kimye kitanshi mu bwikalo bwanji.

Bantu bo aikalanga nabo kipikipi ne bantutu bamuyukile’mba mpofu bakuminye bingi. Baipwizhe’mba: “Nanchi uno muntu kechi ye yewa waikalanga na kulombalomba bintu nenyi?” Bamo bakumbwile’mba: “Ye iye.” Bakwabo nabo amba: “Ine, wamupashatu.” Bino uno mwanamulume waambile’mba: “Yami iye.”—Yoano 9:8, 9.

Ponkapo bamwipuzhe’mba: “Nanchi meso obe bealabisha byepi?” Aye wibakumbwile’mba: “Muntu ye batela’mba Yesu waji kukanda mateshi ne kunshingao mu meso ne kuñambila’mba, ‘Yanga ku Shiloma ukowe.’ Byonkabyo, naji kuya na kowa, natendeka ne kumona.” Ponkapo bamwipwizhe’mba: “Nanchi uno muntu uji kwepi?” Aye waambile’mba: “Kechi nayuka ne.”—Yoano 9:10-12.

Bantu batwajile uno mwanamulume wajinga mpofu ku Bafaliseo bakebelenga kuyuka byo atendekele kumona. Uno muntu wibabuujile’mba: “Waji kunshinga mateshi mu meso, ne amiwa naji kuya na kowa, kabiji mbena kumona.” Bafaliseo bafwainwe kusekela pamo na yewa muntu wabukilwe walombalombanga. Bino abo balengulwile Yesu ne kwamba’mba: “Uno muntu kechi wafuma kwi Lesa ne, mambo kechi ulama juba ja Sabado ne.” Pano bino, bakwabo bazhinaukilenga’mba: “Nanchi ndengamambo wakonsha kuba biyukilo bya uno mutundu nyi?” (Yoano 9:15, 16) Onkao mambo, baabenejilemo bene na bene.

Byo baabenejilemo, bamwipwizhe jibiji uno mwanamulume watendekele kumona amba: “Nanchi usakwambapo amba ka pa uno muntu wakulabisha meso?” Aye wibakumbwile’mba: “Aye ye ngauzhi.”—Yoano 9:17.

Bayudea bakaine kuswa kino. Kyamweka balangulukilenga’mba paji kintu kimo Yesu ne uno muntu kyo baumvwañana kuba’mba batwale bantu mungi. Onkao mambo, pa kuba’mba bapwishe ano mambo, baichile bansemi banji amba bebepuzhe inge kya kine uno mwanamulume wajinga mpofu.