Kitango 93

Kimye Mwana Muntu kyo Akachibila Bantu Mambo

YESU byo akijinga ku kabeta ka buyeke (mu Samaliya nangwa mu Ngalilea), Bafaliseo bamushikishe pa mambo a kimye kikeya Bufumu. Baitabijile amba bukeya na kusekelela kukatampe, bino Yesu wibambijile’mba: “Bufumu bwa Lesa kechi bukeya kya kuba ne bonse saka bebumona ne; kabiji bantu kechi bakamba amba, ‘Abuno kuno!’ nangwa amba, ‘Abwa kokwa!’ ine. Mambo Bufumu bwa Lesa buji pakachi kenu.”

Byambo byaambile Yesu amba “pakachi kenu” bimye bimo bituntululwa’mba “mukachi kenu.” Onkao mambo, bamo balanguluka’mba Yesu walumbulwilenga amba Bufumu bwa Lesa bulama mu michima ya bakalume ba Lesa. Bino kwambatu kine Bufumu bwa Lesa kechi bwajinga mu michima ya Bafaliseo babujile kwitabila Yesu bo aambilengako ne. Pano bino, bwajinga pakachi kabo, mambo Mfumu watongolwa wa mu Bufumu bwa Lesa aye Yesu Kilishitu wajinga pakachi kabo.

Kyamweka Bafaliseo byo bafuminepo, Yesu watwajijile kwamba ku baana banji ba bwanga pa mambo a kwiya kwa Bufumu. Kikatakata walangulukilenga pa kwikalapo kwanji pa Bufumu kulutwe byo ebajimwine amba: “Moba abena kwiya po mukakebesha kumona juba jimo ja oa moba a Mwana muntu, bino kechi mukejimona ne. Kabiji bantu bakemwambila amba, ‘Talai awa uji kokwa!’ nangwa amba, ‘Talai uno uji kuno!’ Kange mukayeko nangwa kwibalondela [Bamesiasa babubela] ne. Byonkatu bibesha mvula mwiulu kuku ne kuku, byo byo kikekala ne pa kwiya kwa Mwana muntu.” Onkao mambo, Yesu walumbulwilenga amba byonkatu kubesha kwa mvula byo kumwekela ku mpunzha yonse, ne kiyukilo kya kwikalapo kwanji pa Bufumu kikamweka ku bonse bakakeba kwikimona.

Yesu waambile pa bintu byamwekele kala kumwesheshamo byubilo bya bantu byo bikekala mu kimye kya kwikalapo kwanji. Waambile’mba: “Byonkatu byo kyajinga mu moba a Nowa, byo byo kikekala ne pa kwiya kwa Mwana muntu . . . Kabiji bino byo byo kyajinga ne mu moba a Lota. Bantu bajiilenga, batomenenga, bapotelenga ne kupotolwesha, bajiminenga kabiji bashimikilenga. Bino pa joja juba Lota jo afumine mu Sodoma, mwiulu mwafumine mujilo ne mabwe atema ne kwibonaunatu bonse. Byo byo kikekala ne juba Mwana muntu jo akachibila bantu mambo.”

Yesu kechi waambilenga’mba bantu ba mu moba a kwa Nowa ne Lota bebonawine na mambo a kuba bino bintu bijitu bulongo nabiji kuja, kutoma, kupota, kupotolwesha, kujima ne kushimika ne. Mambo nangwatu Nowa, Lota ne bisemi byabo baubilenga bino bintu. Pakuba bakwabo baubilenga bino bintu kwa kubula kutesha muchima kuba kyaswa muchima wa Lesa. Kino kyo kyalengejile kwibonauna. Na mambo a kino, bantu bakebonauna kimye Kilishitu kyo akachibila bantu mambo mu kimye kya malwa akatampe a buno bwikalo.

Yesu byo aambilenga pa buneme bwa kuyuka kiyukilo kya kwikalapo kwanji pa Bufumu kulutwe, wanungilepo amba: “Pa joja juba, muntu uji pa musemi uji na bipe byanji mu nzubo kechi akekile na kwibisenda ne, kabiji muntu uji mu bujimi kechi akabwelele bintu byo asha kunyuma ne. Vulukai muka Lota.”

Kiyukilo kya kwikalapo kwa Kilishitu byo kikamweka, bantu kechi bafwainwa kuleka bintu byabo bya ku mubiji kwibalabika kubula kuyuka kiyukilo kyanji ne. Muka Lota byo afuminenga mu Sodoma, kyamweka watajile kunyuma na mambo a kuvuluka bintu byo ashile kabiji waalukile ke jibwe ja mukele.

Yesu byo atwajijile kulumbulula byo kikekala pa kwikalapo kwanji kulutwe, wabujile baana banji ba bwanga amba: “Mu bobwa bufuku bantu babiji bakalaala mwanya umo; umo bakamusenda, bino mukwabo bakamusha. Kukekala banabakazhi babiji bakapelelanga pamo, umo bakamusenda, pakuba mukwabo bakamusha.”

Awa umo ye bakasenda kijitu nobe byonka Nowa ne kisemi kyanji byo batwelele mu bwato ne Lota ne kisemi kyanji byo bebafumishemo mu Sodoma kwi malaika. Kino kilumbulula lupulukilo. Pakuba awa ye bakasha kibena kulumbulula lonaiko.

Baana banji ba bwanga bamushikishe amba: “Nkambo, nanchi kwepi kukamwekela kino?”

Yesu wibakumbwile’mba: “Konka kuji mubiji ne [bampungu] ko ko bakapwila.” Aba bo ‘bakasenda’ ko kuba’mba bakapuluka baji nobe bampungu bamwena palepa bakonkana “kuji mubiji.” Mubiji ubena kwimenako Kilishitu wakine mu kwikalapo kwanji pa Bufumu kubula kumweka ne kijiilo kya ku mupashi Yehoba kyo anengezha. Luka 17:20-37; Ntendekelo 19:26.

▪ Bufumu bwajinga byepi pakachi ka Bafaliseo?

▪ Mu ñanyi jishinda kwikalapo kwa Kilishitu kyo kwaikela nobe kubesha kwa mvula?

▪ Mambo ka bantu o bakebepayila pa mambo a byubilo byabo mu kimye kya kwikalapo kwa Kilishitu?

▪ Ñambilo ya kuba’mba umo bakamusenda, kabiji amba mukwabo bakamusha, yatala mu ka?