Bufumu Bwa Lesa Bukeya Kimye Ka?
“NKAMBO, musakubwezha bufumu ku bena Isalela mu kyonka kino kimyenyi?” (Byubilo 1:6) Batumwa bakebeshe bingi kuyuka kimye Yesu kyo akekajikilamo Bufumu bwanji. Lelo jino byo pabapite ne myaka 2,000, bantu michima ibena kujojotatu kukeba kuyuka kimye kikeshilamo buno Bufumu: Nanchi Bufumu bwa Lesa bukeya kimye ka?
Byo kiji kuba’mba buno Bufumu bo bwajinga mutwe mukatampe wa busapwishi bwa kwa Yesu, mwakonsha kulanguluka’mba waambilepo ne pa buno bwipuzho. Ee wibwambilepo! Waambilengapo javula bingi pa mambo a kimye kyo atelele’mba “kwikalapo kwanji.” (Mateo 24:37, NW) Kuno kwikalapo kwanji kwalamata bingi ku kwikajikwa kwa Bufumu bwa Bumesiasa. Nanchi kuno kwikalapo ko ku ka? Twayai twisambe pa bishinka bina byaamba Baibolo pa mambo a kwikalapo kwa Kilishitu.
1. Kwikalapo kwa Kilishitu kwatendekele pa kupitapo moba avula panyumatu ya lufu lwanji. Yesu wapaine kishimpi mo efwanyikizhe aye mwine ku muntu “wayile ku kyalo kwalepa, mu kutambula bufumu aye mwine.” (Luka 19:12) Nga kino kishimpi kya bungauzhi kyafikizhiwe byepi? Yesu wafwile kabiji ne kusangulwa wasangwilwe; kepo ayile “ku kyalo kwalepa,” ko kuba’mba mwiulu. Byonka Yesu byo aawile mu kino kishimpi, kubwela kwanji saaji mfumu kwaubiwe “pa kupitapo moba avula.”—Mateo 25:19.
Byo papichile myaka panyuma ya kuya Yesu mwiulu, mutumwa Paulo wanembele’mba: “Aye [Yesu], byo alambwile kitapisho kya mambo kimo kyonka kya myaka, wakekajile konka ku kilujo kya Lesa; kabiji kufuma ku akya kimye kasa atengela, poso balwanyi banji bebalula ke kya kutulapo maulu anji.” (Bahebelu 10:12, 13) Onkao mambo, Yesu byo ayile mwiulu, wakatengejile kimye kyabaya bingi. Kuno kutengela kwapwile kimye Yehoba Lesa kyo abikile Mwananji kwikala Mfumu wa Bufumu bwa Bumesiasa bwalayiwe kala kene. Pa kyokya kimye, po patendekele kwikalapo kwa Kilishitu pa Bufumu. Nanchi bantu panopantanda bamwene Yesu byo aikajikilwe pa Bufumu nyi?
2. Bantu kechi bakonsha kumona kwikalapo kwanji ne. Vulukai kuba’mba Yesu waambilepo pa kiyukilo kya kwikalapo kwanji. (Mateo 24:3) Umvwe kwikalapo kwanji kwaji kwamwekelenga ku bantu, nanchi kwakebewenga kiyukilo kya kuyukilako’mba po aji nyi? Kya kumwenako: Fwanyikizhai kuba’mba mubena kuya na kumona musanza mukatampe bingi. Mwakonsha kumona biyukilo mu mukwakwa bibena kwimutangijila ko mubena kuya, bino byo mwafika kwatendekela uno musanza, ke mumone ne byo aya lela, abya mukapembelelanga kumona kiyukilo paji muketo mukatampe ubena kutongola kulutwe yenu panembwa’mba “Musanza” nyi? Ine! Kuba kyaikala byobyo ne, mambo mwafika ko mubayenga, onkao mambo kiyukilo kechi kikiji pano na nkito ne.
Yesu walumbululwile kiyukilo kya kwikalapo kwanji, kechi kya kumwesha bantu kintu kyo bakonsheshe kwimwena bene na meso abo ne, bino kya kwibakwasha kuyukilako kintu kyaubiwe mwiulu. Mu jino jishinda, Yesu waambile’mba: “Bufumu bwa Lesa kechi bwiya sa bumweka ku meso ne.” (Luka 17:20) Pano kiyukilo kyamwesheshe byepi bantu panopantanda amba kwikalapo kwa Kilishitu pa Bufumu kwatendeka?
3. Kwikalapo kwa Yesu pa Bufumu kukayukanyikilwa ku makatazho akatampe panopantanda. Yesu waambile’mba kwikalapo kwanji pa Bufumu mwiulu kukayukanyikilwa ku makondo, bipowe bya nzala, bitentanshi, myalo ne bubi. (Mateo 24:7-12; Luka 21:10, 11) Ki ka kyalengejile ano onse malwa? Baibolo walondolola’mba Satana, “mfumu wa panopantanda,” uji na bukaji bukatampe mambo wayuka’mba kimye kyanji ke kicheche byo kiji kuba’mba kwikalapo kwa Kilishitu pa Bufumu kwatendeka. (Yoano 12:31; Lumwekesho 12:9, 12) Kino kiyukilo kya bukaji bwa kwa Satana ne kya kwikalapo kwa Kilishitu pa Bufumu kibena kumweka mu ano moba etu. Kikatakata kutendekatu mu 1914, mwaka wayukanyikwa ku banembeshi ba mpito amba mo mwaalulukijile bwikalo bwa panopantanda, kino kiyukilo kyamweka patokatu to mwaya ntanda yonse.
Abye byonse byakonsha kumvwanyika nobe mbila yatama, pano bino kechi mbila yatama ne. Bibena kulumbulula’mba Bufumu bwa Bumesiasa bubena kulama mwiulu. Bukumotu, buno Bufumu bukalamenga panopantanda ponse. Pano, bantu bakonsha kwibuyuka byepi buno Bufumu pa kuba’mba baswe bukalama bwabo ne kwikala bangikazhi babo?
4. Kwikalapo kwa Yesu pa Bufumu kwayukanyikilwa ku mwingilo wa kusapwila ubena kubiwa panopantanda ponse. Yesu waambile’mba kwikalapo kwanji pa Bufumu kukekala “byonka byo kyajinga mu moba a Nowa.”a (Mateo 24:37-39) Nowa kechi wafiikilengatu bwato bonka ne; wajinga ne “musapwishi wasapwijilenga bololoke.” (2 Petelo 2:5) Nowa wajimwinenga bantu kuba’mba bukaji bwa Lesa bwajingatu pepi. Yesu waambile’mba baana banji ba bwanga nabo bakajimunanga bantu mu kimye kya kwikalapo kwanji pa Bufumu. Waawile’mba: “Ano mambo awama a bufumu akasapwilwa panopantanda ponse mwa kwibashimwina ba mu mikoka yonse ya bantu; bino ke ku mpelo.”—Mateo 24:14.
Byonka byo twaji kumona mu kibaba kyafumako, Bufumu bwa Lesa bukonauna makafulumende onse a panopantanda. Mwingilo wa kusapwila ubena kukwasha bantu kuyuka’mba uno kafulumende wa mwiulu bukumotu akafumyepo makatazho onse, kabiji ubena kupana jishuko ku bonse ja kupuluka lonaiko lubena kwiya ne kwikala bangikazhi ba buno Bufumu. Bwipuzho bwanema ke bwa kuba’mba, Musakubapo ka pa kino?
Nanchi Bufumu bwa Lesa Bukekala Mambo Awama ko Muji Nyi?
Byambo byo asapwijilenga Yesu byajinga byambo bipana luketekelo lukatampe bingi. Panyuma ya bunsatuki mu Edena myaka nobe kajo yapitapo, Yehoba Lesa wafuukwile kwikajika kafulumende ukawamisha bintu, kubwezha bantu bakishinka ku bwikalo boakebelenga mwine Lesa mu ntendekelo—bumi bwa myaka ne myaka mu paladisa panopantanda. Kisangajika bingi pa kuyuka kuba’mba uno kafulumende walayiwe kala kene, ubena kulama mwiulu. Uno kafulumende kechi mankupwilatu ne, ke kafulumende wa kine!
Pa kino kimye, uno Mfumu ye basala kwi Lesa ubena kulama mukachi ka balwanyi banji. (Salamo 110:2) Mu ino ntanda ipatula kwi Lesa, Mesiasa ubena kufikizha kyaswa muchima wa Shanji kya kukebamo bantu bonse bakeba kuyuka Lesa byo aji ne “kumupopwela na mupashi ne na bukine.” (Yoano 4:24) Luketekelo lwa kwikala myaka ne myaka mu bukalama bwa Bufumu bwa Lesa lwapanwa ku bantu bonsetu. (Byubilo 10:34, 35) Twimutundaika namba mutambwile jino jishuko japewa kwi anweba. Fundai pa mambo a Bufumu bwa Lesa lonka luno, kuba’mba mukekale myaka ne myaka mu bukalama bwabo bwaoloka!—1 Yoano 2:17.
[Tubyambo twa mushi]
a Byambo bya kwa Yesu bitukwasha kumvwisha kyambo kya “kwikalapo” kyo babula kutuntulula bulongo mu ma Baibolo amo. Mu ma Baibolo amo kyatuntululwa’mba “kwiya” nangwa’mba “kubwela,” “kutendeka kwiya.” Abino byambo byonse bilumbulula kakimyetu kacheche. Monai kino kuba’mba, Yesu kechi waesakenye kwikalapo kwanji pa Bufumu ku Muyulo wajingako mu kimye kya Nowa waubiwe pa kakimye kacheche ne, wiesakenye ku “moba a Nowa” mwaubiwe bintu byonse. Byonka byajinga kyokya kimye, kwikalapo kwa Kilishitu pa Bufumu ke kimye bantu mo bakatabankana na mingilo ya bwikalo bwa moba onse kwa kubula kutako muchima ku lujimuno lubena kupanwa.
[Bipikichala pa peja 8]
Mbila yatama yo tumvwa pa juba pa juba imwesha kuba’mba bintu byawama bijitu pepi kufika
[Byambo bya Muntu Ungi]
Buta bwa kulozako madeke a nkondo: kipikichala kya bashilikale ba mu U.S.