Kitango 94

Buneme bwa Kulomba ne Kwipelula

YESU byo akijinga ku Yudea wibelele kishimpi kyamwesheshe buneme bwa kutoñamina mu lulombelo. Pa lwendo lwanji lwapeleleko kuya ku Yelusalema, wabwezhezhepo kwamba pa buneme bwa kubula kuleka kulomba. Kampe Yesu wakijinga mu Samaliya nangwa mu Ngalilea kimye kyo aelele baana banji ba bwanga kishimpi kikwabo amba:

“Mu muzhi umo mwajinga mutonyi wabulanga kwakamwa Lesa ne kubula kunemeka bantu. Mu yenka uno muzhi mwajinga mwanamukazhi wafwilwa wayanga kwi aye kimye kyonse na kumwambila amba, ‘Mwane banchibile mambo na ye nji nanji na mambo ku kije.’ Aye wakainenga pa kimye kyabaya, bino pa kupitapo moba waambile mu muchima amba, ‘Nangwa kya kuba kechi ngakamwa Lesa nangwa kunemeka bantu ne, na mambo a kuba uno mwanamukazhi ubena kunkatazha, nafwainwa kumuchibila mambo anji kuba amba ekileke kwiyanga na kunkatazha.’”

Kepo Yesu alumbulwile mwatala jino jishimikila amba: “Umvwai akya kyaambile mutonyi nangwa kya kuba wajinga wabula koloka! Nanchi kine Lesa kechi ukebachibila mambo bantu banji basalululwa bamujijila mute ne bufuku, nangwa kya kuba wibatekenya nenyi?”

Yesu kechi walumbulwilenga amba Yehoba Lesa uji nobe yewa mutonyi wabujile koloka ne. Walumbulwilenga amba umvwe mutonyi wabujile koloka waumvwine byo bamusashijilenga, ko kuba’mba Lesa aye waoloka ne kuwama ukakumbula umvwe bantu banji babula kuleka kulomba. Onkao mambo, Yesu wanungilepo amba: “Nemwambila namba: Kine [Lesa] ukapelawizha kwibachibila mambo.”

Javula bantu bepelula ne bayanji kechi bebachibila bulongo mambo ne, bino ba lūsa ne banonshi bo bo bata muchima. Nangwa byonkabyo, Lesa kechi ukamonatu amba babi bebamanyika ne, bino ukamone ne kuba’mba bakalume banji bachibilwa mambo mo aolokela kupichila mu kwibapa bumi bwa myaka ne myaka. Bantu banga bayuka’mba Lesa ukapelawizha kuchiba mambo?

Yesu byo aambilenga pa lwitabilo lwaesakana na bulume buji na lulombelo, waambile’mba: “Mwana muntu byo akafika, nanchi kine ukatana lwitabilo lwa uno mutundu pano pa ntanda nyi?” Nangwa kya kuba buno bwipuzho kechi bwakumbwilwe ne, bino bwalumbulwilenga amba lwitabilo lwa uno mutundu kechi lukekala na bantu bavula kimye Kilishitu kyo akeya mu Bufumu ne.

Pa boba batelekelenga ku byaambilenga Yesu pajinga ne bamo balangulukilenga amba bajinga na lwitabilo. Beketekejile abo bene amba baoloka kabiji balengululanga bakwabo. Baana ba bwanga bamo ba kwa Yesu kyamweka nabo bajingapo pa jino jibumba. Onkao mambo, waelele kino kishimpi ku bantu ba uno mutundu amba:

“Banabalume babiji bayile mu nzubo ya Lesa na kulomba, umo wajinga Mufaliseo, mukwabo wajinga musonkeshi. Mufaliseo waimene ne kutatula kulomba bino bintu bya kyanji kyanji amba, ‘Anweba Lesa, nemusanchila bingi mambo amiwa kechi nji nobe bantu bakwabo, bantu baja bya lunkanankana, babula koloka, bankende nangwa nobe uno musonkeshi ne. Kabiji nzhikilwa na nzala jibiji pa mulungu pa mulungu; mpana ne bya bujikumi bya bintu byonse byo mmona.’”

Bafaliseo bebayukile na mambo a kumwesha bololoke bwabo patoka kuba’mba bantu bebatote. Moba o bebikijile kuzhikilwa na nzala ajinga pa Kimo ne pa Kina kabiji bapananga ne bya bujikumi bya tubintu twakepesha twa mu bujimi. Kulengulula ko balengululanga bantutu kwasolokele pa Kijiilo kya Tente wa Lusambakeno, byo ambile’mba: “Jino jibumba jabula kuyuka Mizhilo [ko kuba’mba Bafaliseo mo balumbulwilanga mizhilo] ke ja bantu bafingwa.”

Yesu byo atwajijile kwela kishimpi waambile pa bantu ba uno mutundu “bafingwa” amba: “Bino aye musonkeshi byo aimene palepa byobya, kechi wakebelenga ne kwinuna meso kutala mwiulu ne, bino wipuminenga mu kyaji ne kwamba amba, ‘Anweba Lesa, ngubilai lusa amiwa ndengamambo.’” Na mambo a kuba awa musonkeshi wipelwile ne kuswa bilubo byanji, Yesu waambile’mba: “Uno musonkeshi wayile ku nzubo yanji, waolokele kukila yewa Mufaliseo, mambo yense witumbijika aye mwine bakamupelula, pakuba awa wipelula mwine bakamutumbijika.”

Onkao mambo, Yesu waambilepo jibiji pa buneme bwa kwipelula. Baana ba bwanga ba kwa Yesu byo bakomejile mu mapunzha mwaikalanga Bafaliseo batemenwe kwamba pa bifulo ne munema, kyamweka kyo kyalengejile nabo kwikala na ino ndangulukilo ya kubula kwipelula. Kine, luno lwajinga lufunjisho lwawama Yesu lo afunjishe pa mambo a kwipelula! Luka 18:1-14; Yoano 7:49.

▪ Mambo ka awa mutonyi wabula koloka o achibijile mambo awa mwanamukazhi wafwijilwe, kabiji ñanyi lufunjisho Yesu lo afunjishe mu kishimpi kyanji?

▪ Lwitabilo lwa mutundu ka Yesu lo akatana umvwe wafika?

▪ Bañanyi Yesu bo aelele kishimpi pa mambo a Mufaliseo ne musonkeshi?

▪ Ñanyi byubilo bya Bafaliseo byo twafwainwa kuchinuzhuka?