Kitango 21

Nanchi Twafwainwa Kwitota Pa Byo Tuba Nyi?

KWITOTA ko ku ka?— Twambe kya kumwenako. Nanchi wakyesekapo kala kuba kintu kyo ukyangye kubapo nyi? Kampepo waesekele kupama mpila, nangwa kukyofwa nkinga. Nanchi bakusekelenga’mba waluba, kana abo bo bayuka nyi?— Uno muntu witotelenga.

Umvwa byepi inge bakwenu ke bambe bino? Abya umvwa bulongo nyi?— Pano nga bakwenu bakonsha kumvwa byepi umvwe ke witote?— Nanchi kyawama kwambila mukwenu amba, “Amiwa nayuka kukila obewa” nyi?— Abya Yehoba ukeba bantu ba uno mutundu nyi?—

Mufunjishi Wayukisha wayukilepo bantu bamo betotanga’mba bayuka kukila bakwabo. Betotanga kabiji balengululanga bakwabo bonse. Juba jimo, Yesu wibashimikizhepo jishimikila jimo ja kwibamwesha’mba kechi bafwainwa kwitotanga ne. Akitwaya tumvwe byo kyajinga.

Jino jishimikila jaamba pa Mufaliseo ne musonkeshi. Bafaliseo bajinga bafunjishi ba bupopweshi bamwekanyikangatu uba nobe baoloka kukila bakwabo. Mufaliseo mu jino jishimikila ja kwa Yesu waile ku nzubo ya Lesa mu Yelusalema na kulomba.

Yesu waambile’mba ne musonkeshi naye waile konka na kulomba. Bantu bavula kechi bakebanga basonkeshi ne. Balangulukanga’mba basonkeshi baji bingi na bubela. Ee, basonkeshi bavula kechi bajinga bakishinka ne.

Mufaliseo byo ajinga pa nzubo ya Lesa watendekele kulomba kwi Lesa amba: ‘Lesa, nemusanchila, mambo amiwa kechi ne ndengamambo byonka biji bakwabo bantu ne. Amiwa kechi mbepa nangwa kuba bintu byatama ne. Kechi nji nobe uno musonkeshi ne. Amiwa ne muntu waoloka. Nzhikilwa na nzala jibiji mu mulungu umo kuba’mba ndangulukenga pe anweba. Kabiji mpana ku nzubo ya Lesa bya bujikumi mu byonse byo mmona.’ Uno Mufaliseo walangulukilenga’mba wawama kukila bakwabo, ke ibyo nenyi?— Byo byo aambile kwi Lesa.

Bino musonkeshi kechi byo byo ajinga ne. Kechi wainwine nangwatu meso anji kwiulu kimye kyo alombelenga ne. Waimenetu kwalepa saka akunyika kilungi kyanji panshi. Musonkeshi waubile bingi bulanda mambo a bundengamambo bwanji, kabiji wipuminenga pa kyaji na bulanda. Kechi waambile nangwa pacheche kwi Lesa amba wawama ne. Walombele’mba: “Lesa, mungubile lusa, ne ndengamambo.”

Ñanyi pa bano banabalume babiji watokeshe Lesa pa muchima? Nanchi Mufaliseo, wilangulukilenga’mba wawama nyi? Inyi musonkeshi, waubile bulanda na mambo a bundengamambo bwanji?—

Yesu waambile’mba, musonkeshi ye watokesheshe Lesa pa muchima. Mambo ka? Yesu walondolwele’mba: ‘Mambo awa witota amba wawama kukila bantu bakwabo ukapelulwa. Bino awa wipelula aye mwine ukatumbijikwa.’—Luka 18:9-14.

Yesu wafunjishenga ñanyi lufunjisho mu jino jishimikila?— Wafunjishenga’mba kyatama kwilanguluka’mba twawama kukila bakwetu. Twakonsha kwamba’mba kechi byo byo tulanguluka ne. Pano bino byubilo byetu byakonsha kumwesha’mba byo byo tulanguluka. Nanchi wakyubapo kala bino nyi?— Akimona byaubile mutumwa Petelo.

Yesu byo aambijile batumwa banji amba bonse bakamusha umvwe bamukwata, Petelo witotele’mba: ‘Bonse nangwa kya kuba bakemusha, amiwa kechi nkemushe ne!’ Petelo wayile mungi. Wiketekejile aye mwine. Waishile kumusha Yesu. Bino nangwa byonkabyo, wabwelele, byonka byo tukafunda mu Kitango 30 kya uno buku.—Mateo 26:31-33.

Kya kumwenako. Twambe kuba’mba obewa ne mukwenu mo mufunjila babena kwimwipuzha mepuzho mu sukulu. Wakonsha kuba byepi umvwe kya kuba wakumbula mepuzho bukiji kukila mukwenu? Wakonsha kumvwa bulongo inge wayuka mikumbu. Pano nanchi kyawama kwiesakanya na mukwenu ubanda kukumbula nyi?— Nanchi kyawama kwitumbijika obe mwine amba wayuka bintu kukila mukwenu nyi?—

Byo byaubile ne Mufaliseo. Witotele’mba wawama kukila musonkeshi. Bino Mufunjishi Wayukisha waambile’mba Mufaliseo wayile mungi. Ee, muntu umo wakonsha kuba bingi bulongo kukila bakwabo. Bino kino kechi kilumbulula’mba, wawama kukila bakwabo ne.

Nanchi twafwainwa kwitota umvwe twayuka bintu byavula kukila bakwetu nyi?— Akilangulukapo pa kino. Nanchi yetu twalengele bongo bwetu nyi?— Ine, Lesa ye witupele bongo atweba bonse. Kabiji bintu byo twayuka, twibifunjile ku bakwetu. Kimye kimo kampe twibitanga mu buku. Nangwa kampepo muntu umo ye witubujile. Nangwatu umvwe twayuka mwakubila kintu, twingijisha ka?— Ee, twingijisha bongo bwitupele Lesa.

Umvwe muntu waingila na ngovu, kyawama bingi kumusanchila. Mwambile’mba kintu kyo wauba kyawama bingi. Kampepo wakonsha ne kumukwasha mwakwikyubila bulongo. Ne obewa byo byo ukeba bantu ku kubila, ke ibyo nenyi?—

Bantu bamo baji bingi na ngovu kukila bakwabo. Ibyepi umvwe uji na ngovu kukila kolojobe nangwa nkasobe? Nanchi wafwainwa kwitota na mambo a kino nyi?— Ine. Kajo ko tuja ko ketulengela kwikala na ngovu. Kabiji Lesa ye usamisha kyeya ne kunokesha mvula ne bintutu bikwabo bilengela kajo kukoma, ke ibyo nenyi?— Onkao mambo, twafwainwa kusanchila Lesa umvwe twaikala na ngovu.—Byubilo 14:16, 17.

Umvwe muntu ke etote kechi tumvwa bulongo ne, ke ibyo nenyi?— Akivuluka byambo bya kwa Yesu bya kuba’mba: ‘Byonka byo usaka’mba bantu bakubile, ne obewa bobile byonkabyo.’ Umvwe twauba bino, kechi tukekala nobe Mufaliseo wa bwitote waambiwapo mu jishimikila jashimikizhe Mufunjishi Wayukisha ne.—Luka 6:31.

Kimye kimo Yesu bamwichile amba wawama. Nanchi Mufunjishi Wayukisha waambile’mba, ‘Ee, nawama nyi’?— Ine, kechi byo aambile ne. Waambile’mba: “Kafwako wawama ne, poso yenka Lesa.” (Mako 10:18) Nangwa kya kuba Mufunjishi Wayukisha wajinga waoloka, kechi witotelenga ne. Aye watotanga Shanji, Yehoba.

Nanchi kujipo ye twafwainwa kutotanga nyi?— Ee, ko aji. Twafwainwa kutotanga Mulenga wetu, Yehoba Lesa. Umvwe twamona juba byo jimwekanyika kitambo pa kuzhika nangwa bilengwa bikwabo byawama, twafwainwa kubulako mukwetu amba, ‘Yehoba Lesa wetu wawama, ye walengele byonse bye!’ Twayai twambenga pa bintu byawama byauba Yehoba ne pa byo akoba kulutwe na lwendo.

Tanga byaamba Binembelo pa mambo a kwitota, uyuke byo twakonsha kubula kwitota: Byambo bya Mana 16:5, 18; Yelemiya 9:23, 24; 1 Kolinda 4:7; ne 13:4.

[Kipikichala pa jipa 113]

Mambo ka musonkeshi o atokeshe Lesa pa muchima kukila Mufaliseo?

[Kipikichala pa jipa 115]

Umvwe wayuka bintu byavula kukila mukwenu, nanchi po po wikala muntu wawama nyi?

[Kipikichala pa jipa 115]

Mambo ka o kyatamina kwitota umvwe tuji na ngovu kukila mukwetu?

[Kipikichala pa jipa 116]

Awe mwanyike ubena kutota ñanyi?