Kitango 101

Wajinga mu Betani mu Nzubo ya kwa Shimona

YESU byo afumine ku Yeliko wayile ku Betani. Luno lwendo baendangapo juba jimo, mambo palepele makilomita 19 kabiji aya mpunzha yavujile tutumbatumba. Yeliko waikejile patuntama mamita 250 kabiji Betani waikejile patuntama mamita 760. Musakuvuluka amba mu Betani mo mwaikalanga Lazalasa ne banyenga yanji. Uno muzhi mucheche palepele pepi makilomita asatu kufuma ku Yelusalema kabiji waikejile ku musela wa Mutumba wa Olebeta.

Bavula bafikile bukiji ku Yelusalema ku Kijiilo kya Lupitailo. Bayile bukiji kuba’mba baketokeshe abo bene. Kampe bakwachile mibiji ya bafu nangwa baubile kintu kibalengejile kwikala ba muzhilo. Onkao mambo, balondejile mikambizho ya kwitokesha abo bene pa kuba’mba bakasekelele bulongo Kijiilo kya Lupitailo. Aba bafikile bukiji byo batatwile kukonkana ku nzubo ya Lesa, bavula baambilenga amba kana Yesu usakwiya ku Kijiilo kya Lupitailo nangwa ne.

Mu Yelusalema bantu mo mo bepachikilanga bingi pe Yesu. Kabiji bayukile amba bantangi ba bupopweshi bakebelenga kukwata Yesu kuba’mba bamwipaye. Bakambizhe ne kuba’mba yense usakuyuka ko aji wafwainwa kwibabula. Pa bimye bisatu, ko kuba’mba pa Kijiilo kya Tente wa Lusambakeno, Kijiilo kya Kuzhijika Nzubo ya Lesa ne panyuma ya kusangula Lazalasa, bano bantangi bakebele kumwipaya. Onkao mambo, bantu balangulukilenga amba nanchi Yesu usakumweka ku bantu pa kimye kikwabo nyi? Beshikishenga mulwabo amba: “Mwalangulukapo amba ka?”

Pa kikye kimye, Yesu wafikile mu Betani saka kwakishala moba atanu na jimo kuba’mba Kijiilo kya Lupitailo kifike kyaikalangako pa Nisanyi 14 kwesakana na kalenda wa Bayudea. Yesu wafikile mu Betani pa Kitanu mabanga, ku ntatwilo ya Nisanyi 8. Kechi wafwainwe kuya ku Betani pa Kibelushi ne, mambo muzhilo wa Bayudea wakainye kwenda pa juba ja Sabado, ko kuba’mba pa Kitanu pa kuzhika juba kufika pa Kibelushi pa kuzhika juba. Kyamweka Yesu wayile ku nzubo ya kwa Lazalasa byonka byo aubile patanshi kabiji waikeleko bufuku bonse bwa pa Kitanu.

Nangwa byonkabyo, ngikazhi mukwabo wa mu Betani waichile Yesu ne balunda nanji kuba’mba aje nabo kajo pa Kibelushi mabanga. Uno ngikazhi wajinga Shimona wajinga kala na mbumba ye babukile kwi Yesu. Monka mwayijile muteeto wanji wa kwingila na ngovu, Mata wanengezhejilenga benyi kajo. Pakuba Maliya watelekelenga kwi Yesu, bino pa kikye kimye pabukile mapata.

Maliya washinkwile musashi nangwa amba kamutumwa kakacheche mwajinga manyi anunka bulongo afikile ku kipimo kya makilogalamu 0.5 a “nada wakine.” Ano manyi anemene bingi. Mutengo wao waesakene na mali pepi na o bafwetanga muntu pa mwaka umo. Maliya byo aitulwijile ano manyi ku mutwe wa kwa Yesu ne ku maulu anji ne kwiashimuna na nsuki yanji, mu nzubo mwakutankene bwema bwa ano manyi anunka bulongo.

Baana ba bwanga bazhingijile ne kushikisha’mba: “Mambo ka akonawina bibye?” Kepo Yudasa ashikishe’mba: “Mambo ka ano manyi anunka bulongo o baji kubujila kwiapotesha mandenali 300 ne kupana ano mali ku balanda?” Bino Yudasa kechi watele muchima balanda ne, mambo aye waibanga mali mu fukuta baana ba bwanga o balamanga.

Yesu wapokolweleko Maliya. Wibambijile’mba: “Mulekai. Mambo ka o mubena kumukatezha? Aye wangubila kintu kyawama. Mambo balanda mukelwa kwikala nabo kabiji ponse po mukebela kwibobila kyawama mwibobila, pakuba amiwa kechi nkekalanga nenu moba onse ne. Waingila papelela bulume bwanji; uno mwanamukazhi waitulwila jimo pa mubiji wami manyi anunka bulongo, mu kunengezha mubiji wami umvwe nafwa. Kine nemwambila namba: Konse ko bakasapwila ano mambo awama pano pa ntanda ponse, ne kino kyauba uno mwanamukazhi bakekyamba mu kumuvuluka.”

Yesu waikele mu Betani kukila pa maola 24 kabiji bantu baumvwine amba uji mu Betani. Onkao mambo, bavula baishile na kumona Yesu ku nzubo ya kwa Shimona, kabiji baishile ne na kumona Lazalasa wajinga ponka. Onkao mambo, bañanga bakatampe baumvwañene kwipaya Yesu ne Lazalasa. Mambo bantu bavula bamwitabijile Yesu pa mambo a kumona yewa muntu ye asangwile ku bafu. Kine bano bantangi ba bupopweshi batamine bingi! Yoano 11:55–12:11; Mateo 26:6-13; Mako 14:3-9; Byubilo 1:12.

▪ Ñanyi mwisambo ye besambilengapo mu nzubo ya Lesa mu Yelusalema, kabiji mambo ka?

▪ Mambo ka Yesu o ayijile mu Betani pa Kitanu mu kifulo kya kuya pa Kibelushi?

▪ Yesu byo afikile mu Betani, kwepi ko aikele pa juba ja Sabado?

▪ Ñanyi kintu kyaubile Maliya kyaletele mapata, kabiji Yesu wamupokolweleko byepi?

▪ Ñanyi kintu kyasolwele bubi bukatampe bwa bañanga bakatampe?