Kitango 115

Pabukile Mapata

MABANGA, Yesu wafunjishe lufunjisho lwawama bingi pa mambo a kwingila mwingilo wa kwipelula kupichila mu kovwa batumwa banji ku maulu. Panyuma ya kino watatwile Kivuluko kya lufu lwanji lwajinga pepi. Pa mambo a bintu byaubiwetu, pamwekele kintu kyakumishe bingi. Batumwa banji batatwile kwipachika pa mambo a wajinga mukulumpe pe abo! Kyamweka batatwile kala kwipachikapo pa kino kintu.

Vulukai kuba’mba Yesu byo aalukile ku mutumba, batumwa banji bepachikilenga pa wajinga mukulumpe pe abo. Kabiji ba Yakoba ne Yoano bakebele bifulo bikatampe mu Bufumu. Kino kyalengejile batumwa kuzhingila. Pa buno bufuku bwapeleleko kwikala nabo, Yesu wafwainwa waubile bingi bulanda pa byo bepachikilenga jikwabo! Yesu waubilepo byepi?

Mu kifulo kya kukajipila batumwa banji na mambo a byubilo byabo, Yesu wibatekenyejile ne kwibambila amba: “Bamfumu ba bisaka bikwabo bobila bunkambo bantu babo kabiji bantu batela boba baji na lūsa pe abo na mazhina a munema. Pakuba anweba kange mwikale nobe abo ne. . . . Nanchi mukulumpe wepi, awa wikala ku tebulu na kuja nyi, inyi awa umwingijila? Nanchi kechi yewa wikala ku tebulu na kuja nenyi?” Kepo ebavulwilemo byo ebobijile amba: “Bino amiwa nji mukachi kenu nobe wamwingilo.”

Nangwa kya kuba bajinga bambulwakulumbuluka, batumwa batwajijile kwikala pamo ne Yesu mu makatazho anji. Onkao mambo, wibambijile amba: “Mbena kulayañana nenu lulayañano lwa Bufumu, byonka Batata byo balayañana ne amiwa lulayañano lwa Bufumu.” Luno lo lulayañano Yesu lo alayile batumwa banji bakishinka bakekala pamo nanji mu bufumu bwanji. Kibelengelotu kicheche kya bantu 144,000 bo baji mu luno lulayañano lwa Bufumu.

Nangwa kya kuba bano batumwa wibalayile uno mulaye wawama bingi wa kulamina pamo ne Kilishitu mu Bufumu, pa kikye kimye bakokele ku mupashi. Yesu waambile amba: “Anweba bonse musakwituntula na mambo a kisakummwekela bufuku buno.” Panyuma ya kubula Petelo amba wamulombelako, Yesu wamukambizhe amba: “Inge wabwela ukakoseshe lwitabilo lwa balongo bobe.”

Yesu walumbulwile amba: “Anweba baana, nji nenu pa kakimye kacheche. Mukankeba; kabiji byonka byo naambijile Bayudea namba, ‘Akwa ko ngya kechi mwakonsha kwiyako ne,’ ne anweba byo byo nemwambila. Mbena kwimupa mukambizho mupya, namba mwitemwe anwe bene na bene; byonka byo nemutemwa amiwa, ne anweba mwitemwe anwe bene na bene. Pa kyo kino po po bakayukila bonse amba mwi baana bami ba bwanga umvwe mwitemwa anwe bene na bene.”

Petelo wamushikishe amba: “Nkambo, kwepi ko mubena kuya?”

Yesu wamukumbwile amba: “Akwa ko mbena kuya obewa kechi wakonsha kundondela luno ne, bino ukalondela kimye kikwabo.”

Petelo wamushikishe amba: “Nkambo, mambo ka o nakonsha kubujila kwimulondela lonka luno? Amiwa nkemwelela mweo wami.”

Yesu wamushikishe amba: “Nanchi wakonsha kungelela mweo wobe nyi? Kine nakwambila namba, Shikombwe saka akyangye kukokola, usakunkana jisatu.”

Petelo wakaine amba: “Inge kufwa tusakufwila pamo, kabiji kechi nsakwimukana nangwa pachechetu ne.” Batumwa bakwabo nabo byo baambilenga kintutu kimo, Petelo witotele amba: “Nangwa kya kuba bano bonse basakwimusha na mambo akisakwimumwekela, amiwa kechi nsakwimusha ne!”

Byo aambile pa kimye kyo atumine batumwa banji kuya na kusapwila mu Ngalilea kwa kubula kusenda fukuta wa mali ne mukoolo wa kajo, Yesu wibashikishe amba: ‘Nanchi mwakajilwepo kintu nyi?’

Abo bakumbwile amba: “Ine!”

Wibambijile amba: “Pano luno yense uji na kikwama kya mali asende, ne mukoolo wa kajo, ne wabula mpoko apoteshe kivwalo kyanji kya peulu ne kupotamo imo. Mambo nemwambila namba kino kinembelo kyafwainwa kufika pe amiwa kya kuba amba, ‘Bamubajile pamo na bangubabibi.’ Mambo akya kyaamba pe amiwa kibena kufika.”

Yesu waambilenga pa kimye kyo bakamupopa pa kichi na bangubabibi nangwa amba bantu batama. Kabiji wamwesheshenga amba baana banji ba bwanga bakamanyikwa bingi. Baambile’mba: “Nkambo, Talai! mapoko abiji ano.”

Aye wibambijile amba: “Ano onka awaina.” Byonka byo tusakumona, kwikala na mapoko kwalengejile Yesu kwibafunjishapo lufunjisho lukwabo lwanema. Mateo 26:31-35; Mako 14:27-31; Luka 22:24-38; Yoano 13:31-38; Lumwekesho 14:1-3.

▪ Mambo ka o kyajinga kintu kya kukumya batumwa byo bepachikilenga?

▪ Yesu waubilepo byepi pa byo bepachikilenga?

▪ Lulayañano Yesu lo alayañene na baana banji ba bwanga lwafikizhe ñanyi kintu?

▪ Ñanyi mukambizho mupya Yesu ye apaine, kabiji wanema byepi?

▪ Ñanyi kwiketekela Petelo ko amwesheshe kabiji Yesu waambilepo amba ka?

▪ Mambo ka mikambizho yaambile Yesu pa mambo a kusenda fukuta wa mali ne mukoolo wa kajo o yapusenejile na yo ebapele patanshi?