Kitango 120

Wamukanyijile mu Kipango

BATUMWA byo bamushile Yesu mu bujimi bwa Ngesemani ne kunyema na mambo a moyo, ba Petelo ne Yoano baimene. Kampe bamwene Yesu byo bamutwajilenga ku nzubo ya kwa Anasa. Anasa byo atumine Yesu kwi Ñanga Mwine Mukatampe aye Kaifasa, ba Petelo ne Yoano bamulondejilenga katwezhimina kampe saka baakamwa na mambo a bumi bwabo ne kisakumwekela Nkambo yabo.

Byo bamufikizhe mu kipango kya kwa Kaifasa, Yoano watwelele mukachi mambo wayukanyikilwe kwi ñanga mwine mukatampe. Nangwa byonkabyo, Petelo waikele pangye ya kipango. Palutwe kacheche, Yoano walupukile ne kwisamba na nsongwakazhi wamwingilo wajinga pa kibelo, kabiji Petelo bamuswishishe kutwela mukachi.

Pa kikye kimye kwaubile bingi mashika, kabiji bakalama ba nzubo ne bakapaso bañanga mwine mukatampe babanzhile mujilo wa mashanga. Petelo naye waishile nakota mujilo saka abena kupembelela kumona kisakumwekela Yesu. Na mambo a kyeya kya mujilo, awa wamwingilo watwezhezhe Petelo po po amuyukile ne kumwambila’mba: “Ne anweba mwajinga pamo ne Yesu mwina Nazala.”

Byo azhingijile na mambo a kumuyuka, Petelo wakaine ku bonse amba kechi wamuyuka Yesu ne. Waambile’mba: “Amiwa kechi namuyuka uno muntu ne, ne byo ubena kwamba kechi nebiyuka ne.”

Ponkapo Petelo walupukilemo ne kuya kwipi na kibelo. Kamwale mukwabo wamwingilo byo amumwene, waambijile aba bo aimene nabo amba: “Ne anweba mwajinga pamo ne Yesu mwina Nazala.” Petelo wakaine jikwabo ne kuchipa amba: “Amiwa kechi namuyuka uno muntu ne!”

Petelo waikele monka mu kipango saka akeba kwifya amba babule kumumona. Kyamweka pa kikye kimye Petelo wakuminye ne kwakamwa shikombwe byo akokwele saka pakifitafita. Kabiji pa kikye kimye Yesu saka bakimutotolwesha kabiji bamutwajilenga mu kibamba kya peulu ya kipango. Petelo ne bantu bakwabo bapembejilenga munshi bamwenenga batumonyi bapusana pusana bakushinawina Yesu saka batwela ne kulupuka.

Papichile pepi jiola jimo kufuma po bamuyukile Petelo amba waendanga ne Yesu. Kabiji bantu bavula bamuzhokolokele baishile ne kumwambila’mba: “Kwambatu kine ne obewa wi mwananji wa bwanga, mambo mulaka ye ubena kwamba ye wakusolwesha.” Umo mu jino jibumba wajinga mulongo wa kwa Malikusa Petelo ye akopwele kutwi. Wamushikishe’mba: “Nanchi kechi naji kukumona mu bujimi na uno muntu nenyi?”

Petelo wakainetu nsalansala amba: “Amiwa kechi namuyuka uno muntu ne!” Kabiji waesekele bingi kwibashiina’mba byo baambilenga kechi byajinga bya kine ne, kupichila mu kwifingisha ne kuchipa ne kwamba’mba umvwe kechi ubena kwamba bya kine ne, byatama bimumwekele.

Petelo byo akaine ja busatu, shikombwe wakokwele. Kabiji pa kyonkakya kimye, kyamweka Yesu waishile peulu ya kipango, waalulukile ne kumutala. Ponkapo Petelo wavulukile byamwambijile Yesu byo bajinga mu kibamba kya peulu amba: “Shikombwe saka akyangye kukokola, usakunkana jisatu.” Petelo byo kyamukolele ku muchima na mambo a mambo o alengele, walupukile pangye ne kujila bingi.

Kino kyakonsheshe kumweka byepi? Pano ki ka kyalengejile Petelo kukana Nkambo yanji bimye bisatu saka ajinga muntu wakosele ku mupashi? Kyamweka Petelo kechi wayukile’mba bintu bya uno mutundu bisakumumwekela ne. Kafwako waambilenga bukine ne, kabiji Yesu bamumwenenga nobe kapondo. Kintu kyawama bekyalwile ke kyatama, muntu wabula mambo amba wazhatwa. Onkao mambo, na mambo a bino bintu byamwekelenga, Petelo wakankelwe ne kya kuba. Bukishinka bwanji bwaesekelwe, kabiji na mambo a kuchina bantu waubile kintu kyamulengejile kwikala na bulanda. Kintu kya uno mutundu kange kiketumwekele ne atweba ne! Mateo 26:57, 58, 69-75; Mako 14:30, 53, 54, 66-72; Luka 22:54-62; Yoano 18:15-18, 25-27.

▪ Ba Petelo ne Yoano batwelele byepi mu kipango kya ñanga mwine mukatampe?

▪ Ba Petelo ne Yoano byo bajinga mu kipango, ñanyi kintu kyamwekelenga mu nzubo?

▪ Shikombwe wakokwele bimye binga, kabiji Petelo wakaine bimye binga amba kechi wamuyuka Kilishitu ne?

▪ Kyatajile mu ka Petelo byo efingishe ne kuchipa?

▪ Ñanyi kintu kyalengejile Petelo kukana amba kechi wamuyuka Yesu ne?